ຝຶກອົບຮົມໃຫ້ຜູ້ລົງສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ວຽງຈັນ ຊຸດທີ V

ທ່ານ ພູທະນູເພັດ ໄຊສົມບັດ ກຳມະການສູນກາງພັກເລຂາຄະນະບໍລິຫານງານພັກແຂວງໄດ້ກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້, ແມ່ນເພື່ອເຮັດໃຫ້ຜູ້ສະໝັກຮັບເລືອກຕັ້ງມີຄວາມຮັບຮູ້, ເຂົ້າໃຈທັດສະນະຊີ້ນໍາຂອງກົມການເມືອງສູນກາງພັກ ພ້ອມທັງກຳແໜ້ນທີ່ຕັ້ງພາລະບົດບາດ, ສິດ ແລະ ໜ້າທີ່ ຂອງສະພາ ແລະ ສະມາຊິກສະພາ ແຕ່ລະຂັ້ນ ຮັບຮູ້, ເຂົ້າໃຈຕໍ່ກັບເນື້ອໃນ ແລະ ວິທີການໂຄສະນາຫາສຽງໃຫ້ມີຄວາມເປັນເອກະພາບໃນທົ່ວແຂວງ.

ກອງປະຊຸມຄັ້ງນີ້, ຈະໄດ້ແນະນໍາການຈັດກອງປະຊຸມຝຶກອົບຮົມການໂຄສະນາຫາສຽງ ໃຫ້ຜູ້ສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຊຸດທີ V ໂດຍມີເນື້ອໃນສໍາຄັນຄື: ເຜີຍແຜ່ຮໍ່າຮຽນ ລົງເລິກສະເພາະ 5 ຈຸດປະສົງລະດັບຄາດໝາຍ ແລະ 5 ທັດສະນະຊີ້ນໍາ ຕາມທີ່ໄດ້ກຳນົດ ໄວ້ ໃນມະຕິກົມການເມືອງສູນກາງພັກ ສະບັບເລກທີ 26/ກມສພ, ລົງວັນທີ 12 ກັນຍາ 2025 ກ່ຽວກັບ ການ ເພີ່ມທະວີການນໍາພາ-ຊີ້ນໍາຂອງອົງຄະນະພັກ ທຸກຂັ້ນຕໍ່ການເລືອກຕັ້ງຄັ້ງນີ້; ເຜີຍແຜ່, ຮໍ່າຮຽນລົງເລິກຄໍາແນະນໍາຂອງຄະນະກຳມະການເລືອກຕັ້ງລະດັບຊາດ ກ່ຽວກັບການຈັດຕັ້ງໂຄສະນາຫາສຽງ ແລະ ການຕິດຮູບ-ປະຫວັດຫຍໍ້ ຂອງຜູ້ສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຊຸດທີ V ສະບັບເລກທີ 16/ຄລຊ, ລົງວັນທີ 12 ມັງກອນ 2026; ເຜີຍແຜ່ຮໍ່າຮຽນເອກະສານແນະນໍາເພີ່ມເຕີມ ກ່ຽວກັບການໂຄສະນາຫາສຽງຜູ້ສະໝັກຮັບເລືອກຕັ້ງເປັນ ສສຊ ແລະ ສສຂ ແຕ່ລະທ່ານ ແລະ ເຜີຍແຜ່ເອກະສານບາງມາດຕາຂອງກົດໝາຍ ວ່າດ້ວຍສະພາແຫ່ງຊາດ ສະບັບປີ 2024 ແລະ ສະພາປະຊາຊົນຂັ້ນແຂວງ ສະບັບປີ 2024; ເຜີຍແຜ່ແຜນການເຄື່ອນໄຫວໃຫ້ຜູ້ລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນແຂວງວຽງຈັນ ຊຸດທີ V.

(ແຫຼ່ງຂ່າວ: ແຂວງວຽງຈັນ)