 |
ໃນພິທີ, ທ່ານ ຄໍາຂອດ ໝື່ນຫຼວງ ປະທານຄະນະກໍາມະການປົກຄອງເມືອງປາກຊ່ອງ ໄດ້ກ່າວຕ້ອນຮັບແຂກ ແລະ ລາຍງານການກະກຽມຄວາມພ້ອມຂອງງານ ເປັນຕົ້ນ: ໃນງານບຸນກາເຟ-ຊາ ແລະ ຜະລິດຕະພັນກະສິກໍາ ພູພຽງບໍລະເວນ 2025 ຄະນະກໍາມະການຈັດງານໄດ້ກໍານົດ 6 ກິດຈະກຳເພື່ອໃຫ້ງານມີຫຼາກຫຼາຍສີສັນ ແລະ ມີຄວາມໝາຍສໍາຄັນຢ່າງເລິກເຊິ່ງ ຄື: ກິດຈະກຳທາງສາດສະໜາໄດ້ວາງກະຕ່າດອກໄມ້ຈຸດທູບທຽນຢູ່ອະນຸສອນສະຖານປະທານ ໄກສອນ ພົມວິຫານ, ອະນຸສາວະລີຮ່ວມສູ້ຮົບລາວ-ຫວຽດ ແລະ ອະນຸສາວະລີ ທ່ານ ສີທົນ ກົມມະດໍາ, ກິດຈະກຳແຂ່ງຂັນກິລາ, ສິລະປະ ແລະ ປະກວດນາງສາວທິດາກາເຟ-ຊາ, ກິດຈະກໍາງານວາງສະແດງສິນຄ້າຜະລິດຕະພັນຕ່າງໆທັງພາຍໃນ ແລະ ຕ່າງປະເທດ, ກິດຈະກຳງານສໍາມະນາວິທະຍາສາດ, ກິດຈະກຳການແຂ່ງຂັນຂົ້ວ, ຊົງ, ຊິມກາເຟ ແລະ ກິດຈະກຳທັດສະນະສຶກສາລົງຢ້ຽມຢາມການຜະລິດຂອງຊາວສວນ ແລະ ບໍລິສັດ. ພ້ອມນີ້, ກໍມີການຈັດວາງຮ້ານຈໍາໜ່າຍສິນຄ້າຂອງ ຜູ້ປະກອບການທັງພາຍໃນ ແລະ ຕ່າງປະເທດເຂົ້າຮ່ວມວາງສະແດງສິນຄ້າ ມີ 72 ຮ້ານ, ມີ 66 ຫົວໜ່ວຍ ປະກອບມີ: ຫົວໜ່ວຍທີມາຈາກກຸ່ມ, ສະຫະກອນຜູ້ຜະລິດ, ບໍລິສັດເກັບຊື້ ແລະ ສົ່ງອອກສະມາຄົມກາເຟ, ສະມາຄົມຫັດຖະກຳໂຮງງານອຸດສາຫະກຳປຸງແຕ່ງ, ທະນາຄານທຸລະກິດ, ທຸລະກິດຈໍາໜ່າຍພາຫະນະກຸ່ມ ສິນຄ້າໜຶ່ງເມືອງໜຶ່ງຜະລິດຕະພັນ (ODOP).
 |
ທ່ານ ສຸກສະຫວັນ ວິໄລວົງ ປະທານຄະນະກໍາມະການປົກຄອງແຂວງ ກ່າວເປີດງານວ່າ: ການຈັດງານບຸນກາເຟ, ຊາ ແລະ ຜົນຜະລິດກະສິກຳ ພູພຽງບໍລະເວນ ແມ່ນໜຶ່ງໃນ 12 ຂະບວນການສໍາຄັນຂອງແຂວງ ແລະ ບັນດາກິດຈະກຳປິ່ນອ້ອມຕ່າງໆ ທີ່ໄດ້ຈັດຕັ້ງປະຕິບັດ ແຕ່ປີ 2024 ເປັນຕົ້ນມາ ເພື່ອເປັນຂະບວນການຂໍ່ານັບຮັບຕ້ອນ ວັນຊາດ ທີ 2 ທັນວາ ຄົບຮອບ 50 ປີ; ເປັນກິດຈະກຳໜຶ່ງ ທີ່ຄະນະກຳມະການປົກຄອງແຂວງ ນອກຈາກໄດ້ກຳນົດເປັນວຽກບູລິມະສິດສໍາຄັນ ໃນການຈັດຕັ້ງປະຕິບັດ ຍຸດທະສາດການສົ່ງ ອອກຂະແໜງກາເຟ ແລະ ຜົນຜະລິດກະສິກຳ ເພື່ອແນໃສ່ສົ່ງເສີມທ່າແຮງຄວາມສາມາດໃນການຜະລິດ ຕາມທິດຍືນຍົງ ເພື່ອສ້າງຄວາມເຂັ້ມແຂງ ໃຫ້ແກ່ລະບົບການຄຸ້ມຄອງຄຸນນະພາບ ແລະ ການປະຕິບັດມາດຕະຖານສາກົນ, ເພື່ອສົ່ງເສີມຄຸນລັກສະນະພິເສດຂອງຂະແໜງການກາເຟ, ຜົນຜະລິດກະສິກຳ ໃຫ້ຂະຫຍາຍຕົວໃນອະນາຄົດ ແລະ ເພື່ອສົງເສີມຜູ້ປູກກາເຟ, ສົ່ງເສີມຜູ້ຜະລິດ ກາເຟ ໃຫ້ພົບປະກັບຜູ້ຊື້-ຜູ້ຂາຍ ຕະຫຼອດຮອດ ການເຊື່ອມຕໍ່ໃສ່ຂະແໜງ ໃສ່ບັນດາໂອກາດໃໝ່ ໃນລະດັບສາກົນ, ໂດຍສ້າງພື້ນຖານໃນການປັບປຸງຄວາມສາມາດແຂ່ງຂັນຢູ່ພາຍໃນ, ປັບປຸງການເຂົ້າເຖິງຕະຫຼາດ, ການສົ່ງອອກກາເຟ ແລະ ຜົນຜະລິດກະສິກຳ.
 |
ຜົນສໍາເລັດຈາກການຈັດງານບຸນກາເຟ, ຊາ ແລະ ຜົນຜະລິດກະສິກຳ ພູພຽງບໍລະເວນ ໃນປີ ຜ່ານໆ ມາ ໄດ້ຊ່ວຍຊຸກຍູ້ການສ້າງສໍາພັນເສດຖະກິດຢູ່ພາຍໃນ ລະຫວ່າງຜູ້ຜະລິດ ແລະ ຜູ້ຈຳໜ່າຍ ແລະ ການສົ່ງເສີມການສົ່ງອອກໃນຂະແໜງກາເຟລາວ ມີລັກຊະນະຟົດຟື້ນຫຼາຍຂຶ້ນ.
ໃນໂອກາດເຂົ້າຮ່ວມງານຄັ້ງນີ້, ຄະນະຜູ້ແທນ ໄດ້ທ່ຽວຊົມຮ້ານວາງສະແດງສິນຄ້າກາເຟ-ຊາ ແລະ ຜະລິດຕະພັນກະສິກໍາ, ທ່ຽວຊົມສວນກາເຟ, ສວນໝາກໄມ້ຂອງຊາວກະສິກອນອີກດ້ວຍ.
(ຂ່າວ-ພາບ: ຈັນທະວີສັກ)
ຄໍາເຫັນ