![]() |
ທ່ານ ນາງ ດີ່ນ້າ ສົມສະໝຸດ ວິຊາການພະແນກໂຄສະນາປະຊາສໍາພັນ ແລະ ການຕະຫຼາດ ບໍລິສັດ ສະມໍລບີ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 19 ພະຈິກຜ່ານມາທີ່ເດີ່ນພະທາດຫຼວງວ່າ: ງານບຸນນະມັດສະການພະທາດຫຼວງວຽງຈັນໃນປີນີ້ ບໍລິສັດ ສະມໍລບີ ໄດ້ກະກຽມແຜນວຽກລ່ວງໜ້າຢ່າງລະອຽດ ທັງດ້ານອຸປະກອນອະນາໄມ, ຖັງຂີ້ເຫຍື້ອ, ເຫຼັກຄີບ, ຖົງຢາງດໍາ, ພາຫະນະ ແລະ ບຸກຄະລາກອນ ໂດຍໄດ້ວາງຖັງຂີ້ເຫຍື້ອຈໍານວນ 300 ຖັງ ໃນ 3 ເຂດຮັບຜິດຊອບຄື: ເຂດວັດທາດຫຼວງ ແລະ ພະທາດຫຼວງ; ເຂດສະໜາມຫຼວງ ແລະ ສວນ; ເຂດຮອບນອກ ແລະ ບໍລິເວນຮອບເດີ່ນພະທາດຫຼວງ. ສ່ວນການຈັດວາງຖັງຈະເນັ້ນໜັກໃສ່ບໍລິເວນກົມມະລຽນ ແລະ ສະໜາມຫຼວງ ເພື່ອໃຫ້ປະຊາຊົນສາມາດນໍາໃຊ້ໄດ້ສະດວກ.
![]() |
ສໍາລັບກໍາລັງພະນັກງານ 280 ຄົນ ໄດ້ແບ່ງເປັນໄລຍະພາກເຊົ້າ, ບ່າຍ, ແລງ ແລະ ພາກເດິກ ເພື່ອປະຈໍາຢູ່ຕາມຈຸດຕ່າງໆ ໃນການອະນາໄມ ແລະ ເກັບມ້ຽນຂີ້ເຫຍື້ອຢ່າງຕໍ່ເນື່ອງ. ເມື່ອຈຸດຖັງຂີ້ເຫຍື້ອເຕັມ ຈະມີການຂົນຍ້າຍໄປຍັງຈຸດລວມ ເພື່ອລໍຖ້າລົດມາຂົນສົ່ງໄປກໍາຈັດ. ຕາມແຜນການຈະມີລົດເກັບຂີ້ເຫຍື້ອປະມານ 34 ຖ້ຽວຕະຫຼອດໄລຍະງານບຸນ ແຕ່ຈໍານວນຖ້ຽວອາດປັບເພີ່ມຕາມປະລິມານຂີ້ເຫຍື້ອຕົວຈິງ ເນື່ອງຈາກຂີ້ເຫຍື້ອປະເພດໂຟມ ແລະ ເສດອາຫານ ມີປະລິມານຫຼາຍ ເຮັດໃຫ້ພາຫະນະເຕັມໄວ.
ທ່ານ ນາງ ດີ່ນ້າ ສົມສະໝຸດ ກ່າວຕື່ມວ່າ: ການຈັດຕັ້ງປະຕິບັດວຽກງານອະນາໄມ ແມ່ເລີມແຕ່ວັນທີ 19-28 ພະຈິກ 2026 ລວມໄລຍະເວລາ 10 ວັນ. ນອກຈາກການອະນາໄມແລ້ວ ບໍລິສັດ ຍັງຈະຈັດຮ້ານກິດຈະກໍາປະຊາສໍາພັນເປັນເວລາ 5 ວັນ ເພື່ອເຜີຍແຜ່ ແລະ ແນະນໍາວິທີຖິ້ມຂີ້ເຫຍື້ອໃຫ້ຖືກວິທີ ແລະ ຖືກຖັງ ໂດຍຈະມີການສາທິດວິທີຖິ້ມຂີ້ເຫຍື້ອ ພ້ອມຮ່ວມມືກັບນັກຮຽນ ແລະ ກຸ່ມອາສາສະໝັກໃນການປະຊາສໍາພັນສ້າງຈິດສໍານຶກ. ສ່ວນພາຫະນະຮັບໃຊ້ ນອກຈາກລົດເກັບຂີ້ເຫຍື້ອແລ້ວ ຍັງມີລົດຄ່ຽນຖ່າຍຂີ້ເຫຍື້ອຂະໜາດນ້ອຍ 2 ຄັນ, ພ້ອມທັງເພີ່ມລົດດູດຝຸ່ນ ແລະ ລົດລ້າງທາງ ເພື່ອກະກຽມຮັບໃຊ້ໃນມື້ສໍາຄັນ ຄືວັນທີ 23 ພະຈິກ ມື້ແຫ່ຜາສາດເຜິ້ງ ແລະ ວັນທີ 24 ພະຈິກ ຊຶ່ງເປັນມື້ທີ່ມີປະຊາຊົນເຂົ້າຮ່ວມຫຼາຍ ແລະ ມີເວລາຈໍາກັດໃນການກະກຽມພື້ນທີ່ໃຫ້ພ້ອມຮອງຮັບກິດຈະກໍາໃສ່ບາດໃນຕອນເຊົ້າ. ທັງນີ້, ບັນຫາທີ່ພົບໃນການຈັດຕັ້ງປະຕິບັດຜ່ານມາແມ່ນຈໍານວນຮ້ານຄ້າ ແລະ ຮ້ານຈໍາໜ່າຍສິນຄ້າຕົວຈິງອາດບໍ່ກົງກັບແຜນທີ່ກໍານົດໄວ້ ເນື່ອງຈາກມີຮ້ານຄ້າຕ່າງໆເພີ່ມຂຶ້ນ ສົ່ງຜົນໃຫ້ປະລິມານຂີ້ເຫຍື້ອເພີ່ມຂຶ້ນ ແລະ ຍາກຕໍ່ການຄາດຄະເນ. ນອກນັ້ນ, ຍັງມີບາງຮ້ານຄ້າບໍ່ປິດຕາມເວລາທີ່ຄະນະກໍາມະການກໍານົດ ເຮັດໃຫ້ພາຍຫຼັງອະນາໄມແລ້ວຍັງມີຂີ້ເຫຍື້ອເກີດຂຶ້ນອີກ. ດັ່ງນັ້ນ, ບໍລິສັດຈຶ່ງເນັ້ນການຕິດຕາມ, ກວດກາ ແລະ ເພີ່ມກໍາລັງພະນັກງານອະນາໄມໃນຈຸດທີ່ມີຂີ້ເຫຍື້ອຫຼາຍ.ສໍາລັບການຄັດແຍກຂີ້ເຫຍື້ອໃນງານບຸນປີນີ້ ຍັງຈະເປັນການເກັບລວມ ເນື່ອງຈາກການຄັດແຍກຂີ້ເຫຍື້ອໃນງານທີ່ມີປະຊາຊົນເຂົ້າຮ່ວມຈໍານວນຫຼາຍຍັງເປັນສິ່ງທ້າທາຍ. ບໍລິສັດ ສະມໍລບີ ໄດ້ຈັດຕັ້ງປະຕິບັດວຽກງານອະນາໄມງານບຸນດັ່ງກ່າວ ເລີ່ມແຕ່ປີ 2022 ເປັນຕົ້ນມາ.
ທ່ານ ນາງ ດີ່ນ້າ ສົມສະໝຸດ ຍັງໄດ້ຝາກເຖິງປະຊາຊົນ ແລະ ນັກທ່ອງທ່ຽວທີ່ມາທ່ຽວ ແລະ ມາຮ່ວມງານບຸນໃຫ້ຊ່ວຍກັນຮັກສາຄວາມສະອາດ, ຖິ້ມຂີ້ເຫຍື້ອລົງຖັງທີ່ຈັດກຽມໄວ້ ໂດຍສະເພາະໄມ້ສຽບລູກຊີ້ນບໍ່ຄວນຖິ້ມຊະຊາຍ ເພາະອາດກໍ່ໃຫ້ເກີດອັນຕະລາຍຕໍ່ຜູ້ອື່ນ. ພ້ອມກັນນັ້ນ, ຂໍໃຫ້ບັນດາຮ້ານຄ້າປະຕິບັດຕາມເວລາເປີດ-ປິດຮ້ານຂອງຕົນເອງຕາມທີ່ເພິ່ນກໍານົດໄວ້ ເພື່ອອໍານວຍຄວາມສະດວກໃຫ້ແກ່ການອະນາໄມ ແລະ ຂົນສົ່ງຂີ້ເຫຍື້ອ ໃຫ້ງານບຸນພະທາດຫຼວງມີຄວາມສະອາດງາມຕາ, ເປັນລະບຽບຮບຮ້ອຍ ແລະ ປອດໄພສໍາລັບທຸກຄົນ.
(ຂ່າວ-ພາບ: ວັນເພັງ)


ຄໍາເຫັນ