ຮອງຫົວໜ້າຄະນະຊີ້ນຳລະດັບຊາດ ເຄື່ນໄຫວຕິດຕາມການເດີນສໍາຫຼວດ ພົນລະເມືອງ ຢູ່ແຂວງວຽງຈັນ.

ໃນໂອກາດນີ້, ກໍໄດ້ຈັດກອງປະຊຸມຮ່ວມກັນລະຫວ່າງຄະນະຊີ້ນຳລະດັບຊາດ ແລະ ຄະນະຊີ້ນຳຂັ້ນແຂວງ ການສຳຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ແລະ ອົງການສາກົນຜູ້ໃຫ້ທຶນ ເພຶ່ອລາຍງານຄວາມຄືບໜ້າ ການຈັດຕັ້ງປະຕິບັດ ການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ v ປີ 2025 ຂອງແຂວງວຽງຈັນ. ມາຮອດປັດຈຸບັນນີ້, ແມ່ນສຳເລັດແລ້ວ 65,32% ຊຶ່ງແຂວງວຽງຈັນ ມີເຂດສຳຫຼວດ ທັງໝົດ 551 ເຂດ, ເຂດສຳຮອງ 55 ເຂດ ແລະ ເຂດສຸດທ້າຍ 496 ເຂດ, ປະກອບມີ ນັກເດີນສຳຫຼວດ ແລະ ນັກກວດກາ ທັງໝົດ 775 ຄົນ. ໃນນັ້ນ, ນັກເດີນສຳຫຼວດ 612 ຄົນ, ສຳຮອງ 61 ຄົນ ແລະ ນັກກວດກາ 163 ຄົນ, ສຳຮອງ 19 ຄົນ. ການຄາດຄະເນຈຳນວນທີ່ຢູ່ອາໄສ ທັງໝົດທົ່ວແຂວງວຽງຈັນ ແມ່ນ 171,672 ທີ່ຢູ່ອາໄສ, ມາຮອດປັດຈຸບັນ ສາມາດຈົດນັບທີ່ຢູ່ອາໄສ ໄດ້ທັງໝົດ 103,602 ທີ່ຢູ່ອາໄສ, ເທົ່າກັບ 65.32% ຂອງທີ່ຢູ່ອາໄສທັງໝົດ. ຄາດວ່າທີ່ຢູ່ອາໄສ ທີ່ຍັງເຫຼືອ ຈະສາມາດເກັບກຳຂໍ້ມູນ ໃຫ້ສຳເລັດຕາມແຜນການ ຂອງການສໍາຫຼວດພົນລະເມືອງ ແລະ ທີ່ຢູ່ອາໄສ ໄດ້ວາງໄວ້. ໃນນັ້ນ, ປະກອບມີຄື: ສາມາດຈົດນັບທີ່ຢູ່ອາໄສມີຄົນຢູ່ໄດ້ 107,443 ທີ່ຢູ່ອາໄສ ແລະ ຈົດນັບທີ່ຢູ່ອາໄສ ວ່າງເປົ່າໄດ້ 13,483 ທີ່ອາໄສ, ເກັບກໍາຄົວເຮືອນສ່ວນບຸນຄົນໄດ້ 89,710 ຄົວເຮືອນ, ຄົວເຮືອນລວມໝູ່ 801 ຄົວເຮືອນ ແລະ ເກັບກຳພົນລະເມືອງ ໄດ້ 397,158 ຄົນ ຍິງ 196,471 ຄົນ.

ທ່ານ ສັນຕິພາບ ພົມວິຫານ ໄດ້ມີບາງຄຳເຫັນຊີ້ນຳ ໃຫ້ບັນດາທ່ານ ຄະນະຊີ້ນຳແຕ່ລະຂັ້ນ ສຶບຕໍ່ເພີ່ມທະວີວຽກງານໂຄສະນາ ແລະ ເຜີຍແຜ່ການສຳຫຼວດດ້ວຍຮູບແບບໃຫ້ກວ້າງຂວາງ ແລະ ທົ່ວເຖິງໃນແຕ່ລະຊຸມຊົນ ເພື່ອໃຫ້ເປັນຂະບວນການຟົດພື້ນ, ພ້ອມທັງ ໃຫ້ຖືເອົາວຽກງານການສຳຫຼວດພົນລະເມືອງເປັນບູລິມະສິດ ແລະ ຕິດພັນກັບທຸກຂະບວນການເຄື່ອນໄຫວວຽກງານໃນຂັ້ນທ້ອງຖິ່ນ ເຮັດໃຫ້ປະຊາຊົນມີຄວາມເຂົ້າໃຈ ແລະ ໃຫ້ການຮ່ວມມືຢ່າງຕັ້ງໜ້າຕະຫຼອດໄລຍະຂອງການສຳຫຼວດ; ຄະນະນຳທຸກຂັ້ນຕ້ອງສຶບຕໍ່ເພີ່ມທະວີການຊຸກຍູ້ຕິດຕາມ ແລະ ໃຫ້ການສະໜັບສະໜູນ ທາງດ້ານວິຊາການ ແລະ ອື່ນໆທີ່ຈຳເປັນ. ສິ່ງສຳຄັນທີ່ສຸດ, ນັກກວດກາຂັ້ນແຂວງ ແລະ ຂັ້ນເມືອງຕ້ອງເປັນເຈົ້າການ ແລະ ເຮັດໜ້າທີ່ໃນການຕິດຕາມກວດກາ ການຈັດຕັ້ງປະຕິບັດການເກັບກຳຂໍ້ມູນພາກສະໜາມ ຂອງນັກເດີນສຳຫຼວດຢ່າງໃກ້ຊິດໃຫ້ຖືກຕາມຫຼັກການ ເພື່ອຮັບປະກັນສາມາດຕິດຕາມທຸກບັນຫາທີ່ເກີດຂຶ້ນໃນພາກສະໜາມ ແລະ ແກ້ໄຂໃຫ້ທັນເວລາແຕ່ນີ້ຮອດທ້າຍເດືອນ ທັນວາ 2025 ໃຫ້ສຳເລັດຕາມລະດັບຄາດໝາຍ.

ໃນໂອກາດນີ້, ທ່ານ ສັນຕິພາບ ພົມວິຫານ ພ້ອມດ້ວຍຄະນະ ໄດ້ລົງຕິດຕາມ ແລະ ຊຸກຍູ້ ຂະບວນການພາກສະໜາມຕົວຈິງຢູ່ບ້ານພູສັນ ແລະ ບ້ານໜອງນາກ ເມືອງໂພນໂຮງ ແລະ ຮັບຟັງການລາຍງານຈາກນາຍບ້ານທັງສອງບ້ານ.

(ແຫຼ່ງຂ່າວ: ແຂວງວຽງຈັນ)