 |
ທ່ານ ພັນເອກ ຄໍາເພົາ ເດດບັນດິດ ຮອງຫົວໜ້າກອງບັນຊາການ ປກສ ແຂວງ ໄດ້ຜ່ານບົດລາຍງານວ່າ: ປີ 2026 ແຂວງຫຼວງພະບາງ ສາມາດມ້າງລາຍຄະດີໄດ້ 149 ລາຍ, ກັກຕົວຜູ້ຖືກຫາ 323 ຄົນ ຍິງ 70 ຄົນ, ໃນນັ້ນ ເປັນຄົນຕ່າງປະເທດ 17 ຄົນ, ຍຶດຂອງກາງຢາເສບຕິດປະເພດ ເຮໂຣອິນ ນໍ້າໜັກ 40,8 ກິໂລກຣາມ, ຢາໄອສ໌ ນໍ້າໜັກ 525,1 ກິໂລກຣາມ, ຢາບ້າ 1,228,259 ເມັດ, ນໍ້າໜັກ 122,8 ກິໂລກຣາມ, ຢາຝິ່ນ 18,7 ກຣາມ, ຢາເຄຕາມິນ 678,1 ກຣາມ, ຄໍລາເຈັນ 2,267 ຊອງ, ນໍ້າໜັກ 12,9 ກິໂລກຣາມ, ພັອດຢາເຄຕາມິນ 105 ອັນ ຫົວພັອດເຄຕາມິນ 453 ຫົວ, ນໍ້າຢາຫົວເຊື້ອເຕີມພັອດ 9 ກ່ອງ ນ້ຳໜັກ 2,3 ກິໂລກຣາມ, ໃບກະທ້ອມ 129,6 ກິໂລກຣາມ ນໍ້າກະທ້ອມ 70 ຂວດ, ນໍ້າຢາແກ້ໄອ 3,553 ກ່ອງ ແລະ ຢາສູບໄຟຟ້າ 1,776 ອັນ, ເຄື່ອງຈັກຜະລິດຢາສູບໄຟຟ້າ 1 ເຄື່ອງ, ຖົງຢາງໄວ້ຫຸ້ມຫໍ່ຢາສູບໄຟຟ້າ 1,000 ຖົງ, ກັບເຈ້ຍໄວ້ໃສ່ຢາສູບໄຟຟ້າ 1,074 ກັບ ແລະ ຊິ້ນສ່ວນອຸປະກອນຈໍານວນໜຶ່ງ, ຍຶດພາຫະນະລົດໃຫຍ່ 8 ຄັນ, ລົດຈັກ 98 ຄັນ, ໂທລະສັບມືຖື 323 ໜ່ວຍ, ຍຶດອາວຸດປືນສັ້ນ 3 ກະບອກ, ປືນດັດແປງ 2 ກະບອກ, ປືນແກັບລ່າເນື້ອ 7 ກະບອກ ແລະ ປືນສັ້ນປອມ 1 ກະບອກ ພ້ອມລູກປືນຈຳນວນໜຶ່ງ, ຍຶດວັດຖຸເງິນ-ຄໍາ ທີ່ກ່ຽວພັນກັບຢາເສບຕິດໄດ້ຈຳນວນໜຶ່ງ.
 |
ຄະດີພົ້ນເດັ່ນລາຍໃຫຍ່ ເກີດຂຶ້ນໃນວັນທີ 1 ຕຸລາ 2026 ສະຖານທີ່ມ້າງຄະດີຢູ່ສະໜາມບິນສາກົນຫຼວງພະບາງ ສາມາດຍຶດຢາເສບຕິດ ປະເພດຢາໄອສ໌ 500 ຫໍ່ ລວມນໍ້າໜັກ 521 ກິໂລກຣາມ ພ້ອມທັງອາຍັດຍົນສ່ວນຕົວ 1 ລໍາ ແລະ ລົດກະບະ 1 ຄັນ, ກັກຕົວຜູ້ຖືກຫາຄົນຕ່າງປະເທດ 3 ຄົນ ແລະ ກັກຕົວຜູ້ຖືກຫາຄົນລາວ 11 ຄົນ ຍິງ 4 ຄົນ, ພ້ອມທັງຍຶດຂອງກາງທີ່ກ່ຽວຂ້ອງ ເປັນຫຼັກຖານເພື່ອສືບຕໍ່ ດໍາເນີນຄະດີຕາມຂັ້ນຕອນ. ຈາກນັ້ນ, ຜູ້ຕາງໜ້າເມືອງ, ນະຄອນ-ຫຼວງພະບາງ ແລະ ຂະແໜງການກ່ຽວຂ້ອງ ໄດ້ພ້ອມກັນປະກອບຄຳເຫັນ ຕໍ່ການຈັດຕັ້ງປະຕິບັດວຽກງານຕ້ານ ແລະ ສະກັດກັ້ນບັນຫາຢາເສບຕິດ ໃນວຽກງານທີ່ຕົນຮັບຜິດຊອບໃນໄລຍະຜ່ານມາ, ທັງຄົ້ນຄວ້າບັນດາທິດທາງ-ແຜນການ ຈັດຕັ້ງປະຕິບັດການແກ້ໄຂບັນຫາຢາເສບຕິດໃນຕໍ່ໜ້າ. ໃນພິທີໄດ້ມອບໃບຍ້ອງຍໍໃຫ້ນາຍຕໍາຫຼວດ ທີ່ມີຜົນງານດີເດັ່ນ ປະກອບສ່ວນວຽກງານຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດໃນໄລຍະຜ່ານມາ. ຕອນທ້າຍພິທີ, ທ່ານ ບຸນເຫຼືອ ສິນໄຊວໍຣະວົງ ໄດ້ເນັ້ນໃຫ້ທຸກພາກສ່ວນ ພ້ອມກັນສຸມໃສ່ປະຕິບັດແຜນງານແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢ່າງມີຜົນສຳເລັດໃນຕໍ່ໜ້າ.
 |
ຂ່າວ-ພາບ: ອາພຸດເດດ ບຸບຜາ
ຄໍາເຫັນ