ຮອງນາຍົກລັດຖະມົນຕີ ພົບປະໂອ້ລົມຄະນະພັກ, ຄະນະນໍາແຂວງອັດຕະປື

ໃນພິທີ, ທ່ານ ນາງ ມີນາພອນ ໄຊສົມພູ ໄດ້ລາຍງານສະພາບລວມ ຜົນການນຳພາ-ຊີ້ນຳວຽກງານຮອບດ້ານໃນໄລຍະ 9 ເດືອນ ແລະ ທິດທາງແຜນການ 3 ເດືອນທ້າຍປີ 2026 ໃຫ້ຄະນະຮັບຊາບ. ເນື້ອໃນລາຍງານກວມເອົາວຽກງານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການແກ້ໄຂບັນຫາສັງຄົມ ເຊັ່ນ: ຢາເສບຕິດ, ອາຊະຍາກຳທາງອິນເຕີເນັດ ແລະ ການລັກລອບຂຸດຄົ້ນແຮ່ທາດ ພ້ອມທັງຜົນການພັດທະນາເສດຖະກິດ-ສັງຄົມ ແລະ ຄວາມຄືບໜ້າການຊົດເຊີຍຜົນກະທົບໃຫ້ປະຊາຊົນ ຜູ້ປະສົບໄພພິບັດຢູ່ເມືອງສະໜາມໄຊ.

ໂອກາດນີ້, ທ່ານ ພົນເອກ ຄຳລຽງ ອຸທະໄກສອນ ໄດ້ໃຫ້ທິດຊີ້ນໍາຫຼາຍປະເດັນສຳຄັນ ຄື: ໃຫ້ຄະນະພັກ, ຄະນະນໍາແຂວງອັດຕະປື ສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ, ຂອງອົງຄະນະພັກແຂວງໃຫ້ເປັນຮູບປະທຳ, ສືບຕໍ່ສ້າງຮາກຖານການເມືອງໃຫ້ເຂັ້ມແຂງ, ຄວບຄູ່ກັບການພັດທະນາວຽກງານປ້ອງກັນຊາດ-ປ້ອງກັນຄວາມສະຫງົບ, ແກ້ໄຂບັນຫາທີ່ອາດກໍ່ໃຫ້ເກີດຄວາມບໍ່ສະຫງົບ, ຮັກສາຄວາມເປັນລະບຽບຮຽບຮ້ອຍຕາມແນວຊາຍແດນ ແລະ ຄຸ້ມຄອງອາວຸດຕາມລະບຽບກົດໝາຍ, ສ້າງພັກ ແລະ ພັດທະນາພະນັກງານສືບທອດໃຫ້ມີຄຸນນະພາບ, ສ້າງສອງກຳລັງປ້ອງກັນຊາດ-ປ້ອງກັນຄວາມສະຫງົບໃຫ້ເຂັ້ມແຂງ ແລະ ນຳພາການພັດ ທະນາເສດຖະກິດ-ສັງຄົມ ໃຫ້ບັນລຸຕາມຄາດໝາຍທີ່ວາງໄວ້. ທ່ານ ພົນເອກ ຄຳລຽງ ອຸທະໄກສອນ ຍັງໄດ້ຕາງໜ້າໃຫ້ບັນດາບໍລິສັດທີ່ດຳເນີນກິດຈະການຢູ່ແຂວງອັດຕະປື ມອບເງິນອຸປະຖຳໃຫ້ແຂວງ ລວມມູນຄ່າ 700 ລ້ານກີບ, ໃນນັ້ນ ບໍລິສັດ ພົງຊັບທະວີ ຈຳກັດຜູ້ດຽວ ມອບ 500 ລ້ານກີບ, ບໍລິສັດ ບຸຜາພັດທະນາກໍ່ສ້າງ ຈຳກັດ ມອບ 100 ລ້ານກີບ ແລະ ບໍລິສັດ ສີສະເກດ ກໍ່ສ້າງຄົບວົງຈອນ ມອບ 100 ລ້ານກີບ.

ຂ່າວ: ວິໄລສັກ ແກ້ວຫຼວງໂຄດ