 |
ທ່ານ ປະດິດ ວັນນະລັດສະໜີ ຫົວໜ້າຄະນະໂຄສະນາອົບຮົມແຂວງຈຳປາສັກ ໄດ້ສະຫຼຸບການຝຶກອົບຮົມໂດຍສັງເຂບ, ໃນນັ້ນ, ດ້ານເນື້ອໃນເອກະສານຝຶກອົບຮົມປະກອບມີ 4 ບົດ ຄື: ເອກະສານບັນຫາພື້ນຖານກ່ຽວກັບວຽກງານແນວຄິດ-ຫາງສຽງສັງຄົມ, ເອກະສານວິທີການຕິດຕາມ, ເກັບກຳ ແລະ ການນໍາໃຊ້ສະພາບແນວຄິດ-ຫາງສຽງສັງຄົມ ເຂົ້າໃນວຽກງານການເມືອງ-ແນວຄິດ, ເອກະສານຕາໜ່າງເພື່ອນຮ່ວມງານ ແລະ ວຽກງານຄົ້ນຄວ້າສັງລວມ. ຮູບແບບການບັນຍາຍເອກະສານ, ວິທະຍາກອນ ໄດ້ມີການຍົກເອົາບັນຫາຕົວຈິງມາປະກອບໃສ່ເອກະສານ, ສາມາດສົມທຽບໄດ້ບັນຫາທາງດ້ານທິດສະດີ ແລະ ພຶດຕິກໍາທີ່ແທດເຖິງຕົວຈິງ. ພ້ອມນີ້, ສໍາມະນາກອນ ຍັງມີຄວາມຕື່ນຕົວເອົາໃຈໃສ່ໃນການຮັບຟັງການບັນລະຍາຍເອກະສານ, ມີການປະກອບຄໍາເຫັນ, ກ້າຍົກເອົາບັນຫາຫາງສຽງສັງຄົມທີ່ເກີດຂຶ້ນໃນຂົງເຂດຂອງຕົນ ມາສົນທະນາແລກປ່ຽນບົດຮຽນເຊິ່ງກັນ ແລະ ກັນ ເຮັດໃຫ້ບັນຍາກາດການຝຶກອົບຮົມຄັ້ງນີ້ ມີລັກສະນະຟົດຟື້ນ, ມີຄວາມໜັກແໜ້ນທາງດ້ານເນື້ອໃນ, ພ້ອມທັງມີຄວາມເຂົ້າໃຈ ກໍາແໜ້ນຕໍ່ຄວາມໝາຍຄວາມສໍາຄັນ ແລະ ແບບແຜນວິທີການເກັບກໍາ ແລະ ລາຍງານບັນຫາຫາງສຽງສັງຄົມ ເພື່ອຈະນໍາໄປຈັດຕັ້ງປະຕິບັດຕາມພາລະບົດບາດ ແລະ ຄວາມຮັບຜິດຊອບຂອງຕົນ.
ໂອກາດນີ້, ທ່ານ ອາລຸນໄຊ ສູນນະລາດ ໄດ້ກ່າວວ່າ: ວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ເປັນວຽກໜຶ່ງທີ່ມີຄວາມສໍາຄັນ ຂອງວຽກງານການເມືອງ-ແນວຄິດ ຊຶ່ງເປັນວຽກງານປະຈັນບານ ແລະ ສອດຫ້ອຍໄປໃນທຸກຂົງເຂດວຽກງານ, ເປັນວຽກວິທະຍາສາດລະອຽດອ່ອນທີ່ສຸດ ເນື່ອງຈາກມັນໄດ້ກະທົບໂດຍກົງ ໃສ່ລະບົບແນວຄິດຈິດໃຈຂອງຄົນ. ຍ້ອນແນວນັ້ນ, ພັກ-ລັດຖະບານ ກໍຄືຄະນະພັກ-ອົງການປົກຄອງແຂວງ ຈຶ່ງໄດ້ເອົາໃຈໃສ່ຍົກສູງ ແລະ ຖືສໍາຄັນວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ດ້ວຍການອະນຸມັດໃຫ້ຄະນະໂຄສະນາອົບຮົມແຂວງ ຈັດຊຸດອົບຮົມຄັ້ງນີ້ຂຶ້ນ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ ຂອງບັນດາຕາໜ່າງເພື່ອນຮ່ວມງານ ໃຫ້ໄດ້ຮັບການເຄື່ອນໄຫວຢ່າງເປັນປົກກະຕິ, ຕໍ່ເນື່ອງ ແລະ ສາມາດຍາດໄດ້ຜົນສໍາເລັດເປັນທີ່ປະຈັກຕາຫຼາຍຂຶ້ນ, ທັງເປັນການປະກອບສ່ວນເຮັດໃຫ້ສັງຄົມມີຄວາມສະຫງົບ, ມີຄວາມສາມັກຄີເປັນເອກະພາບ ເຮັດໃຫ້ປະເທດຊາດ ແລະ ແຂວງຈໍາປາສັກ ມີສະຖຽນລະພາບ, ໝັ້ນຄົງ ແລະ ກ້າວຂຶ້ນຢ່າງບໍ່ຢຸດຢັ້ງ ທັງເປັນການເພີ່ມທະວີຄວາມເອົາໃຈໃສ່ ຕໍ່ການຍົກລະດັບຄວາມຮູ້ຄວາມສາມາດ ຂອງບັນດາອົງການທີ່ເຮັດວຽກງານແນວຄິດ ເປັນຕົ້ນ ການບຳລຸງສ້າງຍົກລະດັບຖັນແຖວພະນັກງານໂຄສະນາອົບຮົມແຕ່ລະຂັ້ນ ໃຫ້ມີຄຸນນະພາບ ແລະ ຫຼາຍຂຶ້ນກວ່າເກົ່າ.
 |
ຄຽງຄູ່ກັນນີ້, ການປັບປຸງການນໍາພາທາງດ້ານການເມືອງ-ແນວຄິດຂອງພັກໃນໄລຍະໃໝ່ ຕ້ອງເພີ່ມທະວີການນໍາພາຂອງພັກ ແລະ ການຄຸ້ມຄອງຂອງລັດ ຕໍ່ວຽກງານຫາງສຽງສັງຄົມ ທັງເກັບກໍາ ທັງແກ້ໄຂໄປພ້ອມກັນ, ເພີ່ມທະວີດ້ານເຕັກນິກໃນການເກັບກໍາຫາງສຽງຫາງສັງຄົມ, ວິທີຢາກໄດ້ຫາງສຽງ ແລະ ວິທີແກ້ໄຂຫາງສຽງ, ການເກັບກໍາສະພາບຫາງສຽງສັງຄົມ, ການຄາດຄະເນຫາງສຽງທີ່ອາດຈະເກີດຂຶ້ນ ທັງສະພາບແວດລ້ອມພາຍໃນ ແລະ ພາຍນອກ, ສືບຕໍ່ຮັກສາ, ເສີມຂະຫຍາຍມູນເຊື້ອວຽກງານການນໍາພາ ດ້ານການເກັບກໍາຫາງສຽງສັງຄົມຂອງພັກ ໃຫ້ມີການເຕີບໃຫຍ່ຂະຫຍາຍຕົວ ໂດຍການນໍາໃຊ້ພະນັກງານພື້ນຖານ ແລະ ຕາໜ່າງຂ່າວ, ເພີ່ມທະວີຄວາມເປັນແບບຢ່າງໃຫ້ແກ່ມະຫາຊົນ ທັງເວົ້າທັງເຮັດ; ຍົກສູງສະຕິຕື່ນຕົົວຂອງຜູ້ທີ່ເຮັດວຽກງານການເມືອງ-ນໍາພາແນວຄິດ ເຮັດໃຫ້ລະບອບປະຊາທິປະໄຕ ມີຄວາມສະຫງົບ, ປະຊາຊົນມີຊີວິດການເປັນຢູ່ດີຂຶ້ນ, ມີກົນໄກໃນການປະສານງານຢ່າງລະອຽດ, ເຮັດໃຫ້ວຽກງານຫາງສຽງສັງຄົມ ກາຍເປັນວຽກງານຂອງທຸກຂະແໜງການ, ຄະນະພັກ- ອົງການປົກຄອງແຕ່ລະຂັ້ນ ຕ້ອງເອົາໃຈໃສ່ເພີ່ມທະວີການນໍາພາ-ຊີ້ນຳຮອບດ້ານ.
ພ້ອມນີ້, ທ່ານຍັງຮຽກຮ້ອງໃຫ້ຜູ້ທີ່ເຂົ້າຮ່ວມຝຶກອົບຮົມ ວຽກງານສັງລວມ-ຫາງສຽງສັງຄົມຄັ້ງນີ້ ຈົ່ງນໍາເອົາບົດຮຽນຈາກຊຸດອົບຮົມໄປນໍາໃຊ້ໃຫ້ມີປະໂຫຍດ ແລະ ເປັນບ່ອນອີງອັນສໍາຄັນໃນການຈັດຕັ້ງປະຕິບັດວຽກງານ ຂອງບັນດາຕາໜ່າງເພື່ອນຮ່ວມງານທີ່ເຮັດວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ໃນສະພາບເງື່ອນໄຂໃໝ່ ໃຫ້ມີປະສິດທິພາບ ແລະ ຫັນປ່ຽນໄປສູ່ຄຸນນະພາບໃໝ່ຢ່າງຕັ້ງໜ້າ.
ຂ່າວ-ພາບ: ທູນທອງໃຈ
ຄໍາເຫັນ