 |
ທ່ານ ວຽງພອນ ສຸກຂະວົງ ກ່າວເປີດງານວ່າ: ງານໃນຄັ້ງນີ້, ບໍ່ພຽງແຕ່ເປັນເວທີສຳລັບການສະ ແດງຄວາມສາມາດທາງດ້ານສິລະປະການລະຄອນເທົ່ານັ້ນແຕ່ຍັງເປັນ "ຂົວຕໍ່ແຫ່ງມິດຕະພາບ ແລະ ວັດ ທະນະທຳ". ສິລະປະການສະແດງ ຄືພາສາສາກົນທີ່ບໍ່ມີພົມແດນ, ສາມາດສື່ສານຄວາມຮູ້ສຶກ, ແນວຄິດ ແລະ ຈິດວິນຍານ ໃຫ້ເຂົ້າໃຈກັນໄດ້ ໂດຍບໍ່ຈຳເປັນຕ້ອງໃຊ້ຄຳເວົ້າສະເໝີໄປ. ກະຊວງ ວທ ຍາມໃດກໍໃຫ້ຄວາມສຳຄັນໃນການສົ່ງເສີມຄວາມຄິດສ້າງສັນ ແລະ ສົ່ງເສີມຄົນຮຸ່ນໃໝ່ ໃນການອະນຸລັກຮັກສາວັດທະນະທໍາອັນດີງາມຂອງຊາດ ແລະ ຂອງມວນມະນຸດ. ສະນັ້ນ, ຮຽກຮ້ອງໃຫ້ນັກສະແດງທຸກຄົນຈົ່ງສະ ແດງອອກຢ່າງເຕັມທີ່, ຮຽນຮູ້ເຊິ່ງກັນ ແລະ ກັນ, ແລກປ່ຽນວັດທະນະທຳ, ສ້າງສາຍພົວພັນໄມຕີຈິດ ລະຫວ່າງເພື່ອນມິດສາກົນ, ສືບທອດ ແລະ ພັດທະນານຳເອົາສິ່ງທີ່ໄດ້ຮຽນຮູ້, ໄປພັດທະນາວົງການສິລະປະໃນປະເທດຂອງຕົນ ໃຫ້ນັບມື້ນັບກ້າວໄກຍິ່ງຂຶ້ນ.
 |
ທ່ານ ລັດຕະນະກອນ ອິນສີຊຽງໃໝ່ ອຳນວຍການບໍລິສັດເຂົ້າໜຽວການສະແດງ ແລະ ໂຮງລະຄອນ ກ່າວວ່າ: ການຈັດງານໃນຄັ້ງນີ້, ກໍເພື່ອເປັນການຈັດຕັ້ງຜັນຂະຫຍາຍນະໂຍບາຍການຕ່າງປະ ເທດຂອງພັກ ແລະ ລັດຖະບານ ກໍຄືແຜນພັດທະນາວຽກງານວັດທະນະທໍາ ແລະ ການທ່ອງທ່ຽວ ຂອງກະຊວງ ວທ ໄດ້ວາງອອກ. ທັງເປັນການສືບຕໍ່ພົວພັນຮ່ວມມືກັບບັນດາປະເທດໃນຂົງພາກພື້ນ ແລະ ສາກົນ, ເພື່ອການແລກປ່ຽນ ແລະ ຮຽນຮູ້ເຕັກໂນໂລຊີ, ວິທະຍາສາດທີ່ທັນສະໄໝ ແລະ ການຮຽນ-ການສອນ ເພື່ອພັດທະນາຂົງເຂດສິລະປະການສະແດງຂອງລາວເຮົາໃຫ້ນັບມື້ນັບພັດທະນາທຽບທັນສາກົນ.
 |
ພ້ອມນີ້, ເປັນການຈັດຕັ້ງຜັນຂະຫຍາຍສົ່ງເສີມວຽກງານການຮຽນ-ການສອນ ທາງດ້ານການສະແດງລະຄອນເວທີ ເພື່ອເຮັດໃຫ້ນັກຮຽນ, ນັກສຶກສາໄດ້ຮັບຮູ້ບົດຮຽນອັນໃໝ່ການສ້າງສັນຂອງບົດລະຄອນເຮັດໃຫ້ໄວໝຸ່ມຫ່າງໄກຈາກສິ່ງເສບຕິດ, ໄດ້ຮັບຮູ້ເຖິງຄວາມຫຼາກຫຼາຍຂອງສິດທິເດັກ, ສິດທິມະນຸດ ແລະ ນັກສຶກສາກໍຈະໄດ້ຮຽນຮູ້ວິທີການຂຽນບົດລະຄອນເລື່ອງສັ້ນ, ເລື່ອງຍາວ, ຮູ້ນໍາໃຊ້ແສງສີ, ສຽງດົນຕີປະກອບໃນບົດລະຄອນ ແລະ ອື່ນໆອີກຫຼວງຫຼາຍ. ພ້ອມນີ້, ນັກຮຽນ, ນັກສຶກສາ ໄວໜຸ່ມລາວ ແລະ ຄູ-ອາຈານ ຈະໄດ້ຮຽນຮູ້ບົດຮຽນ ແລະ ປະສົບການໃນການສະແດງໂດຍການແລກປ່ຽນກັບບັນດາປະເທດອາຊຽນ ແລະ ພາກພື້ນ ເພື່ອນໍາໄປຖອດຖອນບົດຮຽນ ແລະ ປັບປຸງວຽກງານການຮຽນ-ການສອນຢ່າງບໍ່ຢຸດຢັ້ງ, ຮຽນຮູ້ໃນການເຮັດວຽກເປັນທີມເພື່ອພັດທະນາຕົນເອງ, ເສີມສ້າງທັກສະດ້ານການສະແດງຄວາມຮັບຮູ້-ເຂົ້າໃຈ ຂອງການສະແດງລະຄອນເວທີໃຫ້ມີຫຼາຍຮູບຫຼາຍສີຍິ່ງຂຶ້ນ. ງານໃນຄັ້ງນີ້, ມີນັກສະແດງເຂົ້າຮ່ວມທັງໝົດ 30 ທີມ ຈາກປະເທດໃນອາຊຽນ, ປະເທດຍີ່ປຸ່ນ, ເນປານ ແລະ ສີລັງກາ, ມີຫຼາຍກ່ວາ 150 ຄົນ. ນອກນີ້, ຍັງມີບັນດານັກສະແດງໜຸ່ມ, ນັກຮຽນ-ນັກສຶກສາ, ຄູອາຈານຈາກວິທະຍາໄລສິລະປະແຫ່ງຊາດ ແລະ ທີມເຂົ້າໜຽວ, ທີມຟັງລາວ, ທີມດົງໂດກ, ສູນສຸຈິປຸລິ ເຂົ້າຮ່ວມເປັນຈໍານວນຫຼວງຫຼາຍ.ງານມະໂຫລານການສະແດງລະຄອນໄວໜຸ່ມອາຊີ ປີ 2025 ຈະໄດ້ຈັດຂຶ້ນໃນລະຫວ່າງ ວັນທີ 4-7 ທັນວາ ປີ 2025, ຢູ່ວິທະຍາໄລສິລະປະແຫ່ງຊາດ ນະຄອນຫຼວວຽງຈັນ.
 |
ໂດຍໄດ້ຮັບການສະໜັບສະໜູນຈາກສະພາໄວໜຸ່ມແຫ່ງຊາດ, ກອງທຶນຊາວໜຸ່ມອາຊຽນ ແລະ ໂຮງລະຄອນ Buds ຈາກສິງກະໂປ ແລະ ບັນດາພາກສ່ວນຕ່າງໆ.
(ຂ່າວ-ພາບ: ວັນເພັງ)
ຄໍາເຫັນ