ປາຖະກະຖາ ສປປ ລາວ ຄົບຮອບ 50 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ

ໃນພິທີດັ່ງກ່າວ ສະຫາຍ ທອງສະຫວັນ ພົມວິຫານ ໄດ້ຍົກໃຫ້ເຫັນມູນເຊື້ອ ການຕໍ່ສູ້ອັນອົງອາດກ້າຫານຂອງບັນພະບູລຸດລາວ ທີ່ລະອິດລະອ້ຽວ, ຍືດເຍື້ອຍາວນານ ມາຫຼາຍຮ້ອຍປີສືບທອດກັນມາ ຈົນກ້າວມາເຖິງໄລຍະແຫ່ງການນໍາພາຕໍ່ສູ້ຂອງພັກ ປະຊາຊົນປະຕິວັດລາວ, ກອງທັບ ແລະ ປະຊາຊົນລາວບັນດາເຜົ່າ ໄດ້ສືບຕໍ່ມູນເຊື້ອອັນອົງອາດກ້າຫານດັ່ງກ່າວ ຕໍ່ສູ້ຕ້ານກັບການຮຸກຮານ ແລະ ຄອບຄອງຂອງຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ປະກາດສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ຈົນກ້າວມາເຖິງໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ໂດຍໄດ້ຍົກໃຫ້ເຫັນເຖິງຜົນງານໃນດ້ານຕ່າງໆ ຕະຫຼອດໄລຍະ 50 ປີ ຜ່ານມາ ພາຍໃຕ້ການນຳພາ ອັນສະຫຼາດສ່ອງໃສ ຂອງ ພັກປະຊາຊົນ ປະຕິວັດລາວ.

ໃນໂອກາດດຽວກັນນີ້, ສະຫາຍ ທອງສະຫວັນ ພົມວິຫານ ໄດ້ຍົກໃຫ້ເຫັນຊີວິດ ແລະ ບົດບາດການນໍາພາການປະຕິວັດ ຂອງ ປະທານ ໄກສອນ ພົມວິຫານ, ວິລະບູລຸດ ຜູ້ກໍາຄັນທຸງນໍາໜ້າໃນພາລະກິດການປະຕິວັດຊາດ ປະຊາທິປະໄຕ ເຮັດສຳເລັດພາລະກຳປະຫວັດສາດ ແລະ ປົດປ່ອຍຊາດຢ່າງສະຫງ່າຜ່າເຜີຍ ໃນປີ 1975. ສະຫາຍ ຍັງໄດ້ຍົກໃຫ້ເຫັນ ແນວຄິດ, ຄຸນສົມບັດສິນທຳປະຕິວັດ ແລະ ແບບແຜນການດຳລົງຊີວິດ ຂອງ ປະທານໄກສອນ ພົມວິຫານ ທີ່ຕິດພັນສະໜິດແໜ້ນກັບຂະບວນຕໍ່ສູ້ ແລະ ໄຊຊະນະ ຂອງ ການປະຕິວັດຂອງ ສປປ ລາວ ແລະ ກາຍເປັນທວນໄຟເຍືອງທາງ ໃຫ້ແກ່ການປະຕິວັດທຸກຍຸກທຸກສະໄໝ.

ໃນຕອນທ້າຍຂອງການບັນຍາຍ,ສະຫາຍ ທອງສະຫວັນ ພົມວິຫານ ໄດ້ຮຽກຮ້ອງມາຍັງຄະນະພັກ-ຄະນະນຳ, ຄະນະກົມ, ສະມາຊິກພັກ, ພະນັກງານທັງໝົດ ຂອງກະຊວງການຕ່າງປະເທດ ຈົ່ງພ້ອມກັນຍົກສູງສະຕິຊາດ, ນໍ້າໃຈຮັກຊາດ ຮັກລະບອບໃໝ່ ຂອງ ສປປ ລາວ, ພ້ອມກັນປົກປ້ອງໝາກຜົນຂອງການປະຕິວັດໃຫ້ໝັ້ນຄົງ, ເສີມຂະຫຍາຍມູນເຊື້ອການຕໍ່ສູ້ອັນບາກບັ່ນພະຍາຍາມ ຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກ ເພື່ອສືບຕໍ່ບຸກທະລຸທາງດ້ານຈິນຕະນາການ ຂອງສະມາຊິກພັກ-ພະນັກງານ ເພື່ອເຮັດໃຫ້ສໍາເລັດໜ້າທີ່ທີ່ພັກແລະປະຊາຊົນມອບໝາຍໃຫ້ ແລະ ຮໍ່າຮຽນເອົາແນວຄິດ,ຄຸນສົມບັດແລະແບບແຜນການດໍາຊີວິດອັນດີງານຂອງປະທານໄກສອນພົມວິຫານເພື່ອໝູນໃຊ້ເຂົ້າໃນການຝຶກຝົນຫຼໍ່ຫຼອມຕົນເອງ ໃຫ້ເປັນສະມາຊິກພັກ-ພະນັກງານທີ່ດີແລະ ເປັນຜູ້ສືບທອດທີ່ດີຂອງພັກແລະຂອງຊາດ, ນໍາພາວຽກງານການຕ່າງປະທດ ໄປສູ່ຈຸດໝາຍ. (ຂ່າວ: ກຕທ)