2 ທັນວາ ເປັນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດຂອງຊາດລາວ

ສະຫາຍ ພົນຕີ ສີພອນໄຊ ຄໍາທອງເຫວີນ ຮອງຫົວໜ້າກົມໃຫຍ່ເສນາທິການກອງທັບໄດ້ສະແດງຄວາມຮູ້ສຶກຕໍ່ວັນສະຖາປະນາ ສປປລາວ ຄົບຮອບ 50 ປີເມື່ອບໍ່ດົນມານີ້ວ່າ: ສໍາລັບກົມໃຫຍ່ເສນາທິການກອງທັບ ສາມາດຍາດໄດ້ຜົນສໍາເລັດຫຼາຍດ້ານ, ອັນພົ້ນເດັ່ນແມ່ນໄດ້ຮັບປະກັນເຮັດໃຫ້ປະເທດຊາດມີສະຖຽນລະພາບທາງດ້ານການ ເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ຮັບປະກັນໄດ້ຄວາມສະຫງົບປອດໄພໃຫ້ແກ່ປະເທດຊາດ, ສ້າງພື້ນຖານເອື້ອອໍານວຍໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ ຂະຫຍາຍຕົວຕາມທິດຊີ້ນໍາຂອງສູນກາງພັກ. ໄດ້ຊີ້ນໍາ-ບັນຊາກໍາລັງຫຼວງ ແລະ ກຳລັງທ້ອງຖິ່ນ ເຄື່ອນໄຫວເຮັດໃຫ້ສະພາບໃນຂອບເຂດທົ່ວປະເທດມີຄວາມສະຫງົບໂດຍພື້ນຖານ, ປະສານສົມທົບກັບບັນດາອົງການທີ່ກ່ຽວຂ້ອງໃນກອງທັບ ແລະ ພາກລັດ, ອົງການການປົກຄອງທ້ອງຖິ່ນແຕ່ລະຂັ້ນ, ຈັດຕັ້ງພະນັກງານຫຼັກແຫຼ່ງລົງກໍ່ສ້າງຮາກຖານການເມືອງຢູ່ບັນດາຈຸດເຂດຫ່າງໄກສອກຫຼີກໃນທົ່ວປະເທດ. ພ້ອມທັງຊີ້ນໍາກຳແໜ້ນ ສະພາບການຮອບດ້ານຢູ່ພາຍໃນ ແລະ ນອກຊາຍແດນ, ສົມທົບກັບບັນດາອົງການກ່ຽວຂ້ອງເພື່ອຄົ້ນຄວ້າ ແລະ ຕີລາຄາແຕ່ລະບັນຫາຢ່າງພາວະວິໄສ, ຖືກຕ້ອງຕາມທັດສະນະຂອງພັກ ແລະ ແກ້ໄຂສະພາບການທີ່ເກີດຂຶ້ນໄດ້ທັນເວລາ, ຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ, ເປັນພື້ນຖານອັນໜັກແໜ້ນໃຫ້ແກ່ການປົກປັກຮັກສາເອກະລາດ, ອໍານາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໃຫ້ໝັ້ນຄົງ. ຍົກສູງສະຕິລະວັງຕົວໃນການກຽມພ້ອມສູ້ຮົບ, ຈັດຕັ້ງກຽມພ້ອມທາງດ້ານກໍາລັງ, ພາຫະນະສູ້ຮົບ ແລະ ຮັບປະກັນສູ້ຮົບຂອງກອງທັບ, ເປັນກຳລັງຫຼັກແຫຼ່ງໃນການຊ່ວຍເຫຼືອ ແລະ ກອບກູ້ໄພພິບັດທາງ ທຳມະຊາດໄດ້ຢ່າງທັນການ, ແກ້ໄຂບັນຫາລະເບີດບໍ່ທັນແຕກທີ່ຕົກຄ້າງແຕ່ປາງສົງຄາມດ້ວຍກຳລັງຂອງກອງທັບ ແລະ ຮ່ວມມືກັບກອງທັບປະເທດເພື່ອນມິດ, ກໍ່ສ້າງພື້ນຖານໂຄງລ່າງທີ່ຈໍາເປັນເພື່ອນໍາໃຊ້ເຂົ້າໃນວຽກງານປ້ອງກັນຊາດ ແລະ ການພັດທະນາຂອງທ້ອງຖິ່ນຕາມການຕົກລົງຂອງລັດຖະບານ. ພ້ອມກັນນັ້ນ, ກໍໄດ້ເຮັດວຽກງານຮັກສາຄວາມສະຫງົບປອດໄພໃຫ້ແກ່ຜູ້ນໍາພັກ-ລັດ, ແຂກພາຍໃນ ແລະ ຕ່າງປະເທດ ປະກອບສ່ວນໃນການຍົກສູງຖານະບົດບາດຂອງຊາດໃນເວທີພາກພື້ນ ແລະ ສາກົນ. ໄປພ້ອມກັນນັ້ນ, ໄດ້ເອົາໃຈໃສ່ສຸມທຸກສະຕິປັນຍາ ແລະ ຄວາມສາມາດເພື່ອປັບປຸງກໍ່ສ້າງ ແລະ ຍົກລະດັບຄວາມສາມາດຂອງບັນດາກົມກອງກໍາລັງຫຼວງ-ກໍາລັງທ້ອງຖິ່ນໃນການອົບຮົມ-ຫັດແອບ ແລະ ຈັດຕັ້ງວຽກງານກຽມພ້ອມສູ້ຮົບຕາມທິດ "ສ້າງກອງທັບໃຫ້ເປັນກອງທັບປະຕິວັດ, ມີແບບແຜນ ແລະ ທັນສະໄໝ", ເອົາໃຈໃສ່ທາງດ້ານການປະກອບ ແລະ ຄຸ້ມຄອງກໍາລັງພົນ, ຄຸ້ມຄອງພາຫະນະ, ອາວຸດກະສູນຖືກຕ້ອງຕາມຫຼັກການ ແລະ ຫັນເປັນທັນສະໄໝຕາມເງື່ອນໄຂຕົວຈິງ.

ເນື່ອງໃນໂອກາດທີ່ມີຄວາມໝາຍສໍາຄັນນີ້, ສະຫາຍ ພົນຕີ ສີພອນໄຊ ຄໍາທອງເຫວີນ ໄດ້ຕາງໜ້າໃຫ້ນາຍ ແລະ ພົນທະຫານກອງທັບປະຊາຊົນລາວສະແດງຄວາມຮູ້ບຸນຢ່າງສູງມາຍັງບັນດາການນໍາພັກ-ລັດ ແລະ ອວຍ ພອນໄຊບັນດາທ່ານຈົ່ງມີສຸຂະພາບແຂງແຮງ ສືບຕໍ່ປະຕິບັດໜ້າທີ່ປົກປັກຮັກສາ ແລະ ພັດທະນາປະເທດຊາດ ໃຫ້ກ້າວສູ່ຈຸດໝາຍສັງຄົມນິຍົມສີວິໄລ.