 |
ທ່ານ ນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນ ນວ, ໄດ້ຊີ້ແຈງກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ຄັ້ງທີ IX (2021- 2025) ບາງເນື້ອໃນ ວ່າ: ຜ່ານການຈັດຕັ້ງປະຕິບັດກໍເຫັນວ່າສາມາດແກ້ໄຂບັນຫາໜີ້ສິນໃຫ້ຫຼຸດລົງ ແລະ ມີອັນພົ້ນເດັ່ນໃນຫຼາຍດ້ານ. ໃນນັ້ນ, ການແກ້ໄຂໜີ້ສິນໂຄງການລົງທຶນຂອງລັດ ມາຮອດປີ 2024, ນະຄອນຫຼວງວຽງຈັນມີໜີ້ສິນໂຄງການລົງທຶນຂອງລັດ ທັງໝົດ 247 ໂຄງການ, ລວມມູນຄ່າຄ້າງຊຳລະທັງໝົດ 1,663.12 ຕື້ກີບ. ໃນນັ້ນ, ໜີ້ສິນເກົ່າ (2015 ຄືນຫຼັງ) ມີຈໍານວນທັງໝົດ 45 ໂຄງການ, ລວມມູນຄ່າຄ້າງຊຳລະ 331.03 ຕື້ກີບ; ໂຄງການໜີ້ສິນແຕ່ປີ 2016 ຮອດປັດຈຸບັນ: ຈໍານວນທັງໝົດ 202 ໂຄງການ, ລວມມູນຄ່າຄ້າງຊຳລະ 1,332.09 ຕື້ກີບ.
ສໍາລັບການແກ້ໄຂໜີ້ສິນໂຄງການລົງທຶນຂອງລັດ ນວ ໃນປີ 2024 ໄດ້ອີງໃສ່ແຫຼ່ງງົບປະມານ ຈາກ 3 ແຫຼ່ງຕົ້ນຕໍ ເປັນຕົ້ນ: ງົບປະມານການລົງທຶນຂອງລັດປະຈຳປີ, ບ້ວງຈົດຮັບ-ຈົດຈ່າຍ ແລະ ລາຍຮັບຈາກເງິນເກີນແຜນໃນແຕ່ລະປີ ຊຶ່ງມີລາຍລະອຽດຄື: 1) ໃນປີ 2024 ນະຄອນຫຼວງວຽງຈັນ ໄດ້ຮັບອະນຸມັດງົບປະມານການລົງທຶນຂອງລັດ ຈຳນວນ 190.93 ຕື້ກີບ. ໃນນັ້ນ: ໄດ້ຈັດສັນມາແກ້ໄຂໜີ້ສິນໂຄງການລົງທຶນຂອງລັດ 24.92 ຕື້ກີບ, ແກ້ໄຂໜີ້ຈໍານວນ. 247 ໂຄງການ ແລະ ສາມາດປົດໂຄງການໜີ້ສິນໄດ້ 12 ໂຄງການ; 2) ແກ້ໄຂໜີ້ສິນດ້ວຍເງິນເກີນແຜນ ປະຈໍາປີ 2023 ຈັດຕັ້ງປະຕິບັດ ປີ 2024 ຈໍານວນ 35.23 ຕື້ກີບ ຊຶ່ງລວມມີ 235 ໂຄງການ ແລະ ສາມາດປົດໂຄງການໜີ້ສິນໄດ້ 6 ໂຄງການ, ລວມມູນຄ່າໂຄງການ 26.29 ຕື້ກີບ; 3) ບ້ວງຈົດຮັບ-ຈົດຈ່າຍ ດັດແກ້ 6 ເດືອນທ້າຍປີ 2024 ຈໍານວນ 48.79 ຕື້ກີບ. ໃນນັ້ນ. ໄດ້ມາຊຳລະໃຫ້ໂຄງການໜີ້ສິນ ຈໍານວນ 15.34 ຕື້ກີບ ຊຶ່ງສາມາດປົດໂຄງການໜີ້ສິນໄດ້ 7 ໂຄງການ, ລວມມູນຄ່າໂຄງການ 33.93 ຕື້ກີບ.
ສັງລວມເຫັນວ່າ: ໃນປີ 2024 ນະຄອນຫຼວງວຽງຈັນ ສາມາດປົດໜີ້ສິນໂຄງການລົງທຶນຂອງລັດໄດ້ 25 ໂຄງການ, ລວມມູນຄ່າໂຄງການ 103.71 ຕື້ກີບ ເຮັດໃຫ້ໂຄງການລົງທຶນຂອງລັດຫຼຸດລົງ ຊຶ່ງມາຮອດປັດຈຸບັນ ໜີ້ສິນໂຄງການລົງທຶນຂອງລັດ ຍັງມີທັງໝົດ 250 ໂຄງການ, ລວມມູນຄ່າຄ້າງຊຳລະທັງໝົດ 2,139.81 ຕື້ກີບ. ໃນນັ້ນ, ໜີ້ສິນເກົ່າແຕ່ປີ 2015 ຄືນຫຼັງ ຍັງເຫຼືອ 44 ໂຄງການ, ລວມມູນຄ່າຄ້າງຊຳລະ 307.92 ຕື້ກີບ ແລະ ໂຄງການໜີ້ສິນແຕ່ປີ 2016 ຮອດປັດຈຸບັນ ມີທັງໝົດ 206 ໂຄງການ, ລວມມູນຄ່າຄ້າງຊຳລະ 1,831.89 ຕື້ກີບ.
ສໍາລັບທິດທາງໃນການແກ້ໄຂໜີ້ສິນໂຄງການລົງທຶນຂອງລັດໃນຕໍ່ໜ້າ ນະຄອນຫຼວງວຽງຈັນ ຈະສູ້ຊົນ ແລະ ສຸມໃສ່ການແກ້ໄຂໜີ້ສິນໂຄງການລົງທຶນຂອງລັດແຕ່ ປີ 2015 ຄືນຫຼັງ ຈໍານວນ 44 ໂຄງການໃຫ້ສໍາເລັດ.
ໂຄງການທີ່ໄດ້ເຊັນສັນຍາສໍາປະທານ ກັບອົງການປົກຄອງ ນວ ແຕ່ຍັງຊົດເຊີຍບໍ່ສໍາເລັດ ມີທັງໝົດ 6 ໂຄງການ ຄື: (1) ໂຄງການສໍາປະທານເນື້ອທີ່ດິນ ແລະ ແຫຼ່ງນໍ້າໜ້າດິນຂອງລັດ (ເຂດໜອງແວງ) ເມືອງຫາດຊາຍຟອງ ນວ ຂອງບໍລິສັດ ລິນຊິນ ບໍລິການ ຈຳກັດຜູ້ດຽວ, (2) ໂຄງການສໍາປະທານໂຄງການພັດທະນາເນື້ອທີ່ດິນໜອງອໍ້ ເມືອງສີໂຄດຕະບອງ ນວ ຂອງບໍລິສັດ ພັດທະນາອະສັງຫາລິມະຊັບຫົວມັງກອນ ຈຳກັດ, (3) ໂຄງການສໍາປະທານເນື້ອທີ່ດິນ ເພື່ອພັດທະນາເຂດເມືອງໃໝ່ໜອງທາ ເມືອງຈັນທະບູລີ ນະຄອນຫຼວງວຽງຈັນ ຂອງບໍລິສັດ ຮຸ້ນສ່ວນລົງທຶນ ສາກົນ ຮ່າໂດ, (4) ໂຄງການສໍາປະທານເນື້ອທີ່ດິນເຂດໜອງປົວໄໝ້ ເມືອງສີສັດຕະນາກ ນວ ຂອງ ບໍລິສັດ ຮົງກົງ ໂລຕັສ ເລັກ ໂຮນດິງ ຈຳກັດ, (5) ໂຄງການທາງດ່ວນ ນະຄອນຫຼວງວຽງຈັນ ໝາຍເລກ 1 ເຂດເສດຖະກິດສະເພາະບຶງທາດຫຼວງ ຫາ ດົງໝາກຄາຍນະຄອນຫຼວງວຽງຈັນ ຂອງບໍລິສັດ ທາງດ່ວນວຽງຈັນ ໝາຍເລກ 1 ຈຳກັດຜູ້ດຽວ, (6) ໂຄງການສໍາປະທານດິນລັດ ຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ຂອງ ບໍລິສັດ ລາວ ຮົງເຈ່ຍ ອາຊຽນ ບໍລິການ ແລກປ່ຽນສິນຄ້າ ກະສິກຳ ຈຳກັດ.
 |
ສາເຫດທີ່ປະຕິບັດການຊົດເຊີຍຊັກຊ້າ: ຍ້ອນວ່າປະຊາຊົນບາງຄອບຄົວບໍ່ຍອມຮັບເອົາຄ່າຊົດເຊີຍ ຕາມຄະນະກຳມະການຂອງພາກລັດໄດ້ຄິດໄລ່ມາ, ປະຊາຊົນມີການຮຽກຮ້ອງເອົາຄ່າຊົດເຊີຍທີ່ສູງ ເຮັດໃຫ້ໂຄງການບໍ່ສາມາດຊົດເຊີຍໃຫ້ໄດ້, ນອກຈາກນັ້ນ ກໍຍັງເຫັນວ່າບາງໂຄງການ ມີການຮັບເອົາເງິນຄ່າຊົດເຊີຍໄປແລ້ວ ແຕ່ຄົນໃນຄອບຄົວຂອງຕົນເອງມາຮ້ອງຟ້ອງລັດ ວ່າບໍ່ຮັບຮູ້ໃນການຮັບເອົາຄ່າຊົດເຊີຍ (ໂຄງການໜອງອໍ້) ມີການສະເໜີລັດຖະບານ, ສະເໜີສະພາແຫ່ງຊາດ ເຮັດໃຫ້ເກີດຄວາມບໍ່ສະຫງົບ ແລະ ເຮັດໃຫ້ບໍ່ສາມາດດໍາເນີນການຈັດຕັ້ງປະຕິບັດໂຄງການໄດ້. ການອະນຸຍາດປູກກ້ວຍ ຢູ່ຂອບເຂດເມືອງນາຊາຍທອງ ທີ່ ນວ ອະນຸຍາດໃນໄລຍະຜ່ານມາ ມີ 1 ບໍລິສັດ ຄື: ບໍລິສັດ ເຊີນຊາງຊິງ ແລະ ສົ່ງເສີມການປູກຝັງ ຂາເຂົ້າ-ຂາອອກ ຈຳກັດຜູ້ດຽວ, ມີທີ່ຕັ້ງໂຄງການຢູ່ບ້ານແສນດິນ ແລະ ບ້ານນາໜາດ ເມືອງນາຊາຍທອງ ນວ, ເປັນການລົງທຶນຕ່າງປະເທດ 100% (ຈີນ), ມີເນື້ອທີ່ 117,31 ເຮັກຕາ (ດິນເຊົ່າ ກັບປະຊາຊົນ). ຜ່ານມາໂຄງການດັ່ງກ່າວໄດ້ດໍາເນີນເອກະສານຖືກຕ້ອງຕາມຂັ້ນຕອນຂອງກົດໝາຍ, ເພື່ອປູກໝາກກ້ວຍຫ້ອມ (GAP); ສ່ວນບໍລິສັດອື່ນໆ ທີ່ໄດ້ເຄື່ອນໄຫວດໍາເນີນກິດຈະການປູກກ້ວຍ ຢູ່ເມືອງນາຊາຍທອງ ນັ້ນ ໂດຍອີງຕາມດໍາລັດ ວ່າດ້ວຍການຮັບຮອງເອົາບັນຊີກິດຈະການຄວບຄຸມ ຂອງ ສປປ ລາວ, ແມ່ນຫ້ອງການບໍລິການການລົງທຶນປະຕູດຽວ, ພະແນກແຜນການ ແລະ ການລົງທຶນ ນວ ບໍ່ໄດ້ຄົ້ນຄວ້າພິຈາລະນາອອກອະນຸຍາດ ຊຶ່ງຜ່ານຂະແໜງການ ກ່ຽວຂ້ອງເປັນຜູ້ອອກອະນຸຍາດດໍາເນີນທຸລະກິດໃຫ້ເລີຍ. ສໍາລັບກິດຈະການສິລະປະ, ການບັນເທິງ ແລະ ກິດຈະການພັກຜ່ອນຢ່ອນໃຈ ແມ່ນໄດ້ຜ່ານຫ້ອງການບໍລິການ ການລົງທຶນປະຕູດຽວ, ພະແນກແຜນການ ແລະ ການລົງທຶນ ນວ ເພື່ອຄົ້ນຄວ້າພິຈາລະນາອອກອະນຸຍາດລົງທຶນ.
(ຂ່າວ: ແສງຈັນ)
ຄໍາເຫັນ