ທ່ານ ທະນູສັກ ແກ້ວປັນຍາ ຫົວໜ້າທະນາຄານການຄ້າຕ່າງປະເທດລາວ (ທຄຕລ) ມະຫາຊົນ ສາຂາແຂວງໄຊຍະບູລີ ໄດ້ເປີດເຜີຍໃນພິທີສະເຫຼີມສະຫຼອງວັນຫັນເປັນທະນາຄານທຸລະກິດຂອງທະນາຄານການຄ້າຕ່າງປະເທດລາວ ມະຫາຊົນສາຂາ ແຂວງໄຊຍະບູລີ ຄົບຮອບ 35 ປີ ຖືວ່າເປັນເຫດການປະຫວັດສາດທາງດ້ານການເມືອງທີ່ສໍາຄັນຂອງ ທຄຕລ ມະຫາຊົນເຊິ່ງໄດ້ຫັນຈາກສາຂາທະນາຄານແຫ່ງລັດ ມາເປັນທະນາຄານທຸລະກິດຢ່າງເຕັມຮູບແບບໃນວັນທີ 1 ພະຈິກ 1989 ເປັນຕົ້ນມາ ຊຶ່ງໄດ້ສະແດງເຖິງການເຕີບໃຫຍ່ຂະຫຍາຍຕົວທາງດ້ານນໍານວນ ແລະ ຄຸນນະພາບອັນໄດ້ປະກອບສ່ວນຢ່າງຕັ້ງໜ້າໃນການພັດທະນາ ແລະ ສ້າງສາພັດທະນາປະເທດຊາດ ເວົ້າລວມເວົ້າສະເພາະກໍຄືແຂວງໄຊຍະບູລີ ຕາມຄວາມສາມາດ, ຕາມພາລະບົດບາດ ແລະ ໜ້າທີ່ ທີ່ພັກ-ລັດຖະບານມອບໝາຍໃຫ້ສໍາເລັດຜົນເປັນຢ່າງດີ ຊຶ່ງສະແດງອອກ ປີ 2008 ໂຄງປະກອບການຈັດຕັ້ງຂອງສາຂາໄຊຍະບູລີ ໃນເບື້ອງຕົ້ນປະກອບດ້ວຍ 6 ຄົນເທົ່ານັ້ນ, ມາເຖິງເດືອນ 6/2008 ມີພະນັກງານທັງໜົດ 18 ຄົນ, ຊຶ່ງປະກອບດ້ວຍ: ຄະນະສາຂາ 2 ທ່ານ, ຄະນະຂະແໜງ 4 ທ່ານ, ຮັບພະນັກງານໃໝ່ເຂົ້າເປັນພະນັກງານທົດສອບງານ 10 ຄົນ, ພະນັກງານສັນຍາຈ້າງ 2 ຄົນ. ຊຶ່ງມາຮອດປັດຈຸບັນມີພະນັກງານທັງໝົດ 69 ຄົນ ຍິງ 34 ຄົນ. ໃນນັ້ນ ມີສັນຍາຈ້າງ 9 ຄົນ ຍິງ 5 ຄົນ, ປະກອບມີ 4 ຂະແໜງການທີ່ຂຶ້ນກັບຄື: ຂະແໜງຫ້ອງການ-ບັນຊີ-ໄອທີ, ຂະແໜງສີນເຊື່ອ, ຂະແໜງບໍລິການ, ຂະແໜງຄັງເງີນສົດ. ໃນປີ 2008 ມີຍອດເງິນຝາກຈຳນວນ 10.65 ຕື້ກີບ, ຍອດສິນເຊື່ອທັງ ໝົດມີ 27.52 ຕື້ກີບ, ມີຕູ້ ATM 1 ໜ່ວຍ. ຊຶ່ງຜົນດຳເນີນທຸລະກິດຂອງສາຂາມາຮອດເດືອນ 10/2024 ມີຍອດເງິນຝາກເພີ່ມຂຶ້ນຈາກປີ 2008 ຈໍານວນ 258 ເທົ່າຕົວ; ຍອດສິນເຊື່ອເພີ່ມຂຶ້ນຈາກປີ 2008 ມີຈໍານວນ 10 ເທົ່າຕົວ; ມີຕູ້ ATM ທັງໝົດມີ 23 ໜ່ວຍ, ຕູ້ຝາກເງິນ 2 ໜ່ວຍ, ມີຕົວແທນເງິນດ່ວນຊູມຊົນ (Become)ມີ 40 ຕົວແທນ. ແຜນໃນຕໍ່ໜ້າທາງສາຂາຈະຂະຫຍາຍຕາໜ່າງບໍລິການ 1 ໜ່ວຍຄື: ໜ່ວຍບໍລິການຊຽງຮ່ອນ. ຄາດວ່າຈະໃຫ້ໄດ້ເປີດນໍາໃຊ້ໃນໄຕມາດ 3/2025. ຈາກນັ້ນ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ມີຄໍາເຫັນວ່າ: ພິທີສະເຫຼີມສະຫຼອງວັນຫັນເປັນທະນາຄານທຸລະກິດຂອງ ທຄຕລ ມະຫາຊົນ ສາຂາແຂວງໄຊຍະບູລີ ຄົບຮອບ 35 ປີ ໃນມື້ນີ້, ແມ່ນເປັນການຢັ້ງຢືນໃຫ້ເຫັນໄດ້ບັນດາໝາກຜົນ, ຜົນງານ ແລະ ຄວາມສາມັກຄີເປັນເອກະພາບ, ຄວາມທຸ້ມເທ, ຄວາມຫ້າວຫັນ ແລະ ຄວາມບຸກບືນຕື່ນຕົວຢ່າງຕັ້ງໜ້າໃນປະກອບສ່ວນວຽກງານດ້ານຕ່າງໆ ດ້ວຍຄວາມຮັບຜິດຊອບສູງຂອງທຸກພາກສ່ວນ, ເວົ້າລວມ, ເວົ້າສະເພາະ ກໍຄືພະນັກງານຂອງ ທຄຕລ ມະຫາຊົນ ທຸກຄົນ. ໃນຕໍ່ໜ້ານີ້ ຂ້າພະເຈົ້າ ມີຄວາມເຊື່ອໝັ້ນວ່າ ອົງການຈັດຕັ້ງທຸກພາກສ່ວນ ເວົ້າສະເພາະ ກໍຄື ທຄຕລ ມະຫາຊົນ ແລະ ບັນດາທະນາຄານອ້ອມຂ້າງ ສາຂາແຂວງໄຊຍະບູລີ ຈະພ້ອກັນເຮັດໜ້າທີ່ການບໍລິການຂອງຕົນໃຫ້ດີຂຶ້ນກວ່າເກົ່າ.
ພິທີສະເຫຼີມສະຫຼອງວັນຫັນເປັນທະນາຄານທຸລະກິດຂອງ ທຄຕລ ຄົບຮອບ 35 ປີ ສາຂາແຂວງໄຊຍະບູລີ ໄດ້ຈັດຂຶ້ນໃນວັນທີ 23 ພະຈິກຜ່ານມາ ທີ່ລີສອດ 3 ເອື້ອຍນ້ອງໂດຍໃຫ້ກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ, ທ່ານ ທະນູສັກ ແກ້ວປັນຍາ, ມີແຂກຖືກເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
(ຂ່າວ+ພາບ: ບຸນທີ)
ຄໍາເຫັນ