ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນ ນະຄອນຫຼວງວຽງຈັນ(ນວ) ຊຸດທີ IV ໃຫ້ຮູ້ວ່າ: ຜ່ານການປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໄລຍະ 5 ປີຜ່ານມາເຮັດໃຫ້ເສດຖະກິດ ນວ ສາມາດສືບຕໍ່ຂະຫຍາຍຕົວຕາມແຜນການ 5 ປີ ກຳນົດສະເລ່ຍ 5,34% ຕໍ່ປີ (ສໍາລັບປີ 2025 ຄາດວ່າຈະຂະຫຍາຍຕົວໃນລະດັບ 6,6%) ໃນນີ້ ຂະແໜງກະສິກໍາຂະຫຍາຍຕົວສະເລ່ຍ 3,99% ຕໍ່ປີ ຂະແໜງອຸດສາຫະກໍາຂະຫຍາຍຕົວສະເລ່ຍ 7,17% ຕໍ່ປີ ແລະ ຂະແໜງບໍລິການຂະຫຍາຍຕົວສະເລ່ຍ 2,92% ຕໍ່ປີ ລວມຍອດຜະລິດຕະພັນພາຍໃນປີ 2025 ຄາດວ່າຈະບັນລຸ 89.278,8 ຕື້ກີບ (ແຜນການ 5 ປີ ຮອດປີ 2025 ໃຫ້ບັນລຸ 84.916 ຕື້ກີບ), ລວມຍອດຜະລິດຕະພັນພາຍໃນສະເລ່ຍຕໍ່ຄົນປີ 2025 ສະເລ່ຍ 85,17 ລ້ານກີບ ຫຼື ເທົ່າກັບ 3.871,6 ໂດລາ (ແຜນການ 5 ປີ ຮອດປີ 2025 ໃຫ້ບັນລຸ 8.750 ໂດລາ)
ໂຄງປະກອບເສດຖະກິດໄດ້ມີການຫັນປ່ຽນຄື: ກະສິກໍາຫຼຸດລົງຈາກ 14,3% ໃນປີ 2020 ມາເປັນ 13%, ໃນປີ 2025 ແຜນຮອດປີ 2025 ໃຫ້ກວມເອົາ 14% ຂອງລວມຍອດຜະລິດຕະພັນພາຍໃນ (GDP), ອຸດສາຫະກໍາຫຼຸດລົງຈາກ 49,5% ໃນປີ 2020 ມາເປັນ 49%, ໃນປີ 2025 (ແຜນຮອດປີ 2025 ໃຫ້ກວມເອົາ 49% ຂອງ GDP), ການບໍລິການໄດ້ເພີ່ມຂຶ້ນຈາກ 36,2% ໃນປີ 2020 ມາເປັນ 38%, ໃນປີ 2025 (ແຜນຮອດປີ 2025 ໃຫ້ກວມເອົາ 37% ຂອງ GDP), ສັງລວມແລ້ວໂດຍພື້ນຖານໂຄງປະກອບເສດຖະກິດ ໄດ້ມີການຫັນປ່ຽນໄປຕາມທິດທີ່ກຳນົດໄວ້.
ດ້ານງົບປະມານໄດ້ສືບຕໍ່ເອົາໃຈໃສ່ຈັດຕັ້ງປະຕິບັດແຜນງົບປະມານແຫ່ງລັດຕາມທິດບຸກທະລຸ ແລະ ເປັນເຈົ້າຕົນເອງສູງກວ່າເກົ່າ ໂດຍຖືເອົາວຽກງານການຫັນເປັນທັນສະໄໝເປັນວຽກງານບຸລິມະສິດໂດຍສະເພາະວຽກງານໃນຂົງເຂດການຄຸ້ມຄອງຈັດເກັບລາຍຮັບ, ຄຸ້ມຄອງລາຍຈ່າຍ ແລະ ບໍລິຫານຄຸ້ມຄອງອົງກອນ, ໂດຍການສືບຕໍ່ປັບປຸງ ແລະ ຈັດຕັ້ງຜັນຂະຫຍາຍລະບົບໄອທີ ທີ່ມີຢູ່ແລ້ວຂອງກະຊວງການເງິນໃຫ້ຄົບຊຸດ ແລະ ທົ່ວເຖິງເພື່ອປ່ຽນແທນການບໍລິຫານດ້ວຍລະບົບເຈ້ຍສໍເທື່ອລະກ້າວ, ຍົກລະດັບລະບົບແຈ້ງພາສີ (NSWA+) ໃຫ້ຮັບປະກັນໃນການບໍລິການແຈ້ງພາສີ, ຍົກລະດັບລະບົບການຊໍາລະຄ່າພາສີ-ອາກອນ, ຄ່າທໍານຽມ, ຄ່າບໍລິການແບບລວມສູນຜ່ານລະບົບ FINLINK, ປະຕິຮູບປ່ຽນຈາກລະບົບ TMIS ໃນເມື່ອກ່ອນຫັນມາໃຊ້ລະບົບ TaxRIS ແລະ ສາມາດເອົາຫົວໜ່ວຍທັງໝົດເຂົ້າໃນລະບົບດັ່ງກ່າວສຳເລັດ 100%, ນໍາໃຊ້ລະບົບອອກໃບສັ່ງມອບລາຍຮັບຊັບສິນຂອງລັດ(SAMS)ໂດຍເຊື່ອມຕໍ່ກັບລະບົບ EasyTax, ສືບຕໍ່ນໍາໃຊ້ລະບົບຄຸ້ມຄອງການເງິນແຫ່ງລັດ (LIFMIS) ແລະ ລະບົບ RTIS, ພັດທະນາລະບົບການຄຸ້ມຄອງສົ່ງເອກະສານລາຍງານການເງິນຜ່ານທາງເວັບໄຊ Accservice.la ເພື່ອຕິດຕາມຄຸ້ມຄອງການຖືບັນຊີໃຫ້ຖືກຕ້ອງຕາມກົດໝາຍ, ເພີ່ມທະວີການກວດກາຕ້ານ ແລະ ສະກັດກັ້ນການຮົ່ວໄຫຼຂອງງົບປະມານ, ໄດ້ແກ້ໄຂບັນດາຂອດຂັ້ນບໍລິຫານຕ່າງໆ ຢູ່ຈຸດບໍລິການຂອງເຈົ້າໜ້າທີ່ລັດອໍານວຍຄວາມສະດວກໃຫ້ຜູ້ປະກອບການສາມາດມອບພັນທະຜ່ານລະບົບເອເລັກໂຕຣນິກ ແລະ ຜ່ານເວັບໄຊໃຫ້ຫຼາຍຂຶ້ນ ປະຕິບັດກົນໄກການລົງກວດກາຫຼັງການຈ່າຍບາງລາຍຈ່າຍທີ່ປະຕິບັດບໍ່ຖືກເປົ້າໝາຍ, ເກັບຍອດເຫຼືອມອບຄືນເຂົ້າງົບປະມານ, ເຂັ້ມງວດປະຕິບັດມາດຕະການປະຢັດ ແລະ ຕ້ານການຟຸມເຟືອຍ, ກວດກາການຈັດສັນລາຍຈ່າຍຢ່າງລະອຽດເພືີ່ອຫຼຸດຜ່ອນລາຍຈ່າຍທີ່ບໍໍ່ຈໍາເປັນລົງ.
ຜ່ານການຈັດຕັ້ງປະຕິບັດບັນດາມາດຕະການຕ່າງໆເຮັດໃຫ້ສາມາດຈັດເກັບລາຍຮັບໄດ້ທັງໝົດ 41.510,27 ຕື້ກີບ (ແຜນ 5 ປີ ກໍານົດໃຫ້ໄດ້ 29.114,05 ຕື້ກີບ) ປະຕິບັດໄດ້ລື່ນແຜນ 42,58% ໃນນີ້ ພູດສູນກາງຈັດເກັບໄດ້ 28.389,61 ຕື້ກີບ (ແຜນ 5 ປີ ກໍານົດໃຫ້ໄດ້ 20.453,84 ຕື້ກີບ) ປະຕິບັດໄດ້ລື່ນແຜນ 38,80% ແລະ ພູດນະຄອນຫຼວງວຽງຈັນຈັດເກັບໄດ້ 13.120,66 ຕື້ກີບ (ແຜນ 5 ປີ ກໍານົດໃຫ້ໄດ້ 8.660,21 ຕື້ບກີບ) ປະຕິບັດໄດ້ລື່ນແຜນ 51,51% ອັນພົ້ນເດັ່ນແມ່ນສາມາດຈັດເກັບລາຍຮັບໄດ້ເກີນແຜນ 5 ປີຊ້ອນ ລວມເປັນເງິນ 4.460,45 ຕື້ກີບ ສະເພາະປີ 2025 ສາມາດຈັດເກັບໄດ້ 12.572,14 ຕື້ກີບ ປະຕິບັດໄດ້ລື່ນແຜນ 19,8% ຂອງແຜນການປີ.
ຄໍາເຫັນ