ສະຫາຍ ສີໄຄ້ ລຽງສະຫວັດ ຮອງຫົວໜ້າພະແນກການເງິນແຂວງເຊກອງ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນເມື່ອບໍ່ດົນມານີ້ວ່າ: ຕະຫຼອດໄລຍະຜ່ານມາ, ນັບແຕ່ກອງປະຊຸມໃຫຍ່ອົງຄະນະພັກແຂວງເຊກອງ ສະໄໝທີ X ແຂວງໄດ້ຈັດຕັ້ງປະຕິບັດຕິດພັນກັບຂະແໜງການເງິນໃນການຂຸດຄົ້ນລາຍຮັບ ແລະ ຄຸ້ມຄອງລາຍຈ່າຍງົບປະມານໃນທົ່ວແຂວງ ແລະ 4 ຕົວເມືອງ, ແຂວງເຊກອງເປັນແຂວງຂາດດຸ່ນ 80-90%, ແຕ່ມາຮອດປັດຈຸບັນ ການຂາດດຸ່ນງົບປະມານຂອງແຂວງນັບມື້ຫຼຸດລົງ ກາຍເປັນແຂວງກຸ້ມດຸ່ນ ແລະ ເກີນດຸ່ນ. ພິເສດໃນການຈັດຕັ້ງປະຕິບັດ 6 ເດືອນຕົ້ນປີ 2025 ແຂວງເຊກອງໄດ້ຈັດເກັບລາຍຮັບຄຸ້ມຄອງລາຍຈ່າຍ ເວົ້າສະເພາະການຈັດເກັບລາຍຮັບພົ້ນເດັ່ນແມ່ນຂະແໜງຄຸ້ມຄອງຊັບສິນແຫ່ງລັດ ສາມາດປະຕິບັດໄດ້ລື່ນແຜນ 100.66%. ສະນັ້ນ, ຕະຫຼອດໄລຍະຜ່ານມາ, ການຈັດຕັ້ງປະຕິບັດລາຍຮັບແຂວງເຊກອງຕິດພັນກັບການຂຸດຄົ້ນລາຍຮັບທີ່ບົ່ມຊ້ອນຫຼາຍຢ່າງໄດ້ຫັນເຂົ້າສູ່ການຈັດຕັ້ງປະຕິບັດຄຸ້ມຄອງລາຍຈ່າຍ, ຫັນເຂົ້າສູ່ເຕັກໂນໂລຊີທີ່ທັນສະໄໝ. ດັ່ງນັ້ນ, ຈຶ່ງເຮັດໃຫ້ການຈັດເກັບລາຍຮັບມາຮອດປັດຈຸບັນໃກ້ຄຽງກັບຄວາມເປັນຈິງໃນການຈັດຕັ້ງປະຕິບັດສຳລັບແຂວງເຊກອງ.
ສະຫາຍ ສີໄຄ້ ລຽງສະຫວັດ ກ່າວເນັ້ນຕື່ມອີກວ່າ: ສຳລັບການພັດທະນາເສດຖະກິດ-ສັງຄົມຂອງແຂວງຄາດຄະເນວ່າໃນປີ 2027 ແຂວງເຊກອງຈະກຸ້ມດຸ່ນ ແລະ ເກີນດຸ່ນ ແຕ່ມາຮອດປັດຈຸບັນມະຕິຂອງກົມການເມືອງ ຕິດພັນກັບກະຊວງການເງິນມອບຖານລາຍຮັບໃຫ້ຂະແໜງການເງິນແຂວງໃນປີ 2025 ເປັນແຂວງກຸ້ມດຸ່ນ ແລະ ເກີນດຸ່ນ ຖືເປັນສິ່ງທ້າທາຍໃຫ້ພະແນກການເງິນແຂວງໃນການຈັດເກັບລາຍຮັບ-ຄຸ້ມຄອງລາຍຈ່າຍເພື່ອຫັນເຂົ້າສູ່ລະບຽບຫຼັກການ. ຄຽງຄູ່ກັບການກວດກາ, ຕ້ານການຟຸ່ມເຟືອຍ, ປະຢັດມັດ ທະຍັດເຮັດໃຫ້ແຂວງເຊກອງນໍາໃຊ້ທຸກເມັດເງິນໃຫ້ມີປະໂຫຍດເພື່ອສັງຄົມ. ສະນັ້ນ, ໃນປີ 2026-2030 ແຜນໃນການຈັດເກັບລາຍຮັບຄາດຄະເນວ່າຈະຢູ່ໃນ 3,500 ຕື້ກວ່າກີບ ແລະ ລາຍຈ່າຍຄາດຄະເນຈະບັນລຸ 2,553 ຕື້ກວ່າກີບ, ເຖິງຢ່າງໃດກໍຕາມໃນການຈັດຕັ້ງປະຕິບັດຄາດຄະເນວ່າສຳລັບປີ 2028 ເມືອງດາກຈຶງຈະເປັນເມືອງກຸ້ມດຸ່ນ, ປີ 2029 ຄາດວ່າເມືອງກະລຶມຈະເປັນເມືອງກຸ້ມດຸ່ນ. ໃນໄລຍະຜ່ານມາເມືອງລະມາມ ແລະ ເມືອງທ່າແຕງເປັນເມືອງເສດຖະກິດ ແຕ່ມາຮອດປັດຈຸບັນເມືອງພູດອຍໄດ້ກາຍເປັນເມືອງເສດຖະກິດພົ້ນເດັ່ນຂອງແຂວງ ຕະຫຼອດໄລຍະສະໄໝທີ X (2021-2025) ນີ້ ເຫັນວ່າການຈັດເກັບລາຍຮັບໄດ້ລື່ນແຜນໃນແຕ່ລະປີເປັນກ້າວໆ. ຕິດພັນກັບການຈັດຕັ້ງປະຕິບັດຖານລາຍຮັບທີ່ບົ່ມຊ້ອນບາງອັນ ຈະຕ້ອງໄດ້ສູ້ຊົນປະຕິບັດເພື່ອໃຫ້ແຂວງເຊກອງມີຄວາມເຂັ້ມແຂງຫຼຸດພົ້ນຈາກຄວາມດ້ອຍພັດທະນາໃນປີ 2026-2030.
ຂ່າວ: ພູວັນ
ຄໍາເຫັນ