ທ່ານ ນາງ ບັນທະໄລ ແກ້ວມະນີວົງ ກຳມະການພັກແຂວງ, ຄະນະບໍລິຫານງານສູນສະຫະພັນກຳມະບານລາວ ປະທານຄະນະບໍລິຫານງານສະຫະພັນກຳມະບານແຂວງອັດຕະປື ໄດ້ໃຫ້ສໍາພາດຕໍ່ນັກທ້ອງຖິນໃນວັນທີ 27 ມັງກອນຜ່ານມານີ້ວ່າ: ວັນທີ 1 ກຸມພາ 1956 ສູນກາງພັກໄດ້ຕົກລົງສ້າງຕັ້ງສະຫະພັນກຳມະບານລາວ ຊຶ່ງເປັນເຫດການທາງດ້ານການເມືອງສຳຄັນຂອງຊົນຊັ້ນກຳມະກອນ-ຊາວຜູ້ອອກແຮງລາວບັນດາເຜົ່າ, ພວກເຮົາພ້ອມກັນທົບທວນຄືນມູນເຊື້ອຕໍ່ສູ້ອັນນຢຶດເຢື້ອຍາວນານຂອງຊົນຊັ້ນກຳມະກອນເພື່ອຍາດເອົາເອກະລາດ, ສິດເສລີພາບ ແລະ ຜືນແຜ່ນດິນອັນຄົບຖ້ວນເຕັມໄປດ້ວຍການເສຍສະຫຼະຂອງກຳມະກອນ ແລະ ຊາວຜູ້ອອກແຮງງານ ເພື່ອຫວນຄືນມູນເຊື້ອແຫ່ງການກຳເນີດຂອງສະຫະພັນກຳມະບານລາວກໍຍ້ອນຊົນຊັ້ນກຳມະກອນ ແລະ ຊາວຜູ້ອອກແຮງງານບັນດາເຜົ່າ ຖືກກົດຂີ່ຂູດຮີດເປັນຂ້ອຍຂ້າຮັບໃຊ້ຊົນຊັ້ນນາຍທຶນເປັນຜູ້ຮັບຈ້າງເຮັດວຽກ 14-16 ຊົ່ວໂມງຕໍ່ມື້, ອອກແຮງງານຫຼາຍແຕ່ຄ່າຕອບແທນໜ້ອຍ, ຖືກທູບຕີທໍລະມານຢ່າງໂຫດຮ້າຍຢ່າງປ່າເຖື່ອນຈາກພວກນາຍທຶນ, ຊີວິດການເປັນຢູ່ຂອງກຳມະກອນ ແລະ ຊາວຜູ້ອອກແຮງງານອຶດຢາກ, ບໍ່ໄດ້ຮັບຄວາມເປັນທຳ, ຂາດເສລີ ພາບທາງດ້ານການເມືອງ ແລະ ກົດໜາຍ, ບໍ່ໄດ້ຮັບການດູແລສະຫວັດດີການ, ການສຶກສາ ແລະ ອື່ນໆເຫດການດັ່ງກ່າວຈຶ່ງສ້າງຄວາມເຈັບແຄ້ນທີ່ສຸດສຳລັບຄົນລາວທຸກຄົນ.
ໂດຍສຶບທອດມູນເຊື້ອຮັກຊາດອັນແຮງກ້າ, ເດັດຂາດບໍ່ຍອມຈຳນົນຂອງບັນພະບຸລຸດລາວ, ຍ້ອນທົນຕໍ່ການກົດຂີ່ຂູດຮີດຂອງພວກລ່າເມືອງຂຶ້ນຂອງພວກສັກດີນາປະຕິການ, ກຳມະກອນ ແລະ ຊາວຜູ້ອອກແຮງງານບັນ ດາເຜົ່າຈຶ່ງລຸກຂຶ້ນຕໍ່ສູ້ໂດຍພາຍໃຕ້ການນຳພາຂອງພັກ, ຂະບວນການຕໍ່ສູ້ກຳມະກອນຢູ່ບໍ່ກົ່ວໂພນຕິ້ວ, ກຳມະກອນໄຟຟ້າວຽງຈັນ, ກຳມະກອນແລ່ນເຮືອຈັກຈຳປາສັກ, ກຳມະກອນສ້າງທາງເລກ 9 ແລະ ພາກສ່ວນອື່ນໆຢ່າງກ້ວາງຂວາງໃນທົ່ວປະເທດ.
ການເຕີບໃຫ່ຍຂະຫຍາຍຕົວຂອງສະຫະພັນກຳມະບານລາວໂດຍພາຍໃຕ້ການນຳພາ-ຊີ້ນຳຂອງພັກປະຊາຊົນລາວ. ມາຮອດວັນທີ 1 ກຸມພາ 1956 ສູນກາງພັກໄດ້ມີມະຕິຕົກລົງສ້າງຕັ້ງສະຫະພັນກຳມະບານລາວຢ່າງເປັນທາງການນັບແຕ່ປີ 1983-2020 ໄດ້ເປີດກອງປະຊຸມໃຫຍ່ຜູ້ແທນກໍາມະບານທັງໜົດ 8 ຄັ້ງ, ແຕ່ລະຄັ້ງກໍມີແຜນງານ, ໂຄງການໄລຍະ 5 ປີ, ຈາກສະມາຊິກກຳມະບານທົ່ວປະເທດ 5,000 ກ່ວາຄົນ, ກຳມະບານຮາກຖານ 1,424 ຮາກຖານ, ມາຮອດຄັ້ງທີ 8 ມີສະມາຊິກກໍາມະບານທົ່ວປະເທດ 227,718 ຄົນ, ຄຽງຄູ່ການເຕີບໃຫ່ຍຂອງສະມາຊິກກຳມະບານແຂວງອັດຕະປືເລີ່ມແຕ່ມື້ສ້າງຕັ້ງປີ 1983-2025 ກອງປະຊຸມໃຫຍ່ໄດ້ເປີດຂຶ້ນ 6 ຄັ້ງ, ປັດຈຸບັນມີ 1 ສະຫະພັນກໍາມະບານແຂວງ, 5 ສະຫະພັນກຳມະບານເມືອງ, 4 ສະຫະພັນກໍາມະບານຂະແໜງການ, ມີ 230 ຮາກຖານທົ່ວແຂວງ, ມີສະ ມາຊິກກຳມະບານທົ່ວແຂວງ 6,000 ກວ່າຄົນ, ຕະຫຼອດໄລຍະຜ່ານມາຄະນະນຳສະຫະພັນກຳມະບານແຕ່ລະຂັ້ນໄດ້ເຮັດພາລະບົດບາດ, ສິດ ແລະ ໜ້າທີ່ໃນນາມອົງການຈັດຕັ້ງກຳມະບານເປັນຕົວແທນແຫ່ງການປົກປ້ອງສິດຜົນປະໂຫຍດອັນຊອບທຳໃຫ້ແກ່ ກຳມະກອນ ແລະ ຊາວຜູ້ອອກແຮງງານອື່ນຢ່າງຕັ້ງໜ້າ.
(ໂດຍ: ເພັດທະນົງສອນ ໄຊຍະແສງ)
ຄໍາເຫັນ