ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 19 ມີນາຜ່ານມາທີ່ກະຊວງການຕ່າງປະເທດວ່າ:ພາຍໃຕ້ການນໍາພາຂອງພັກ ປປ ລາວ ຕະຫຼອດໄລຍະ 70 ປີ ຜ່ານມາ, ພັກເຮົາມີຄວາມສະຫຼາດສ່ອງໃສ ໃນການປັບປ່ຽນນະໂຍບາຍ ໃຫ້ແທດເໝາະກັບສະພາບການຕົວຈິງ, ພັກຍັງເປັນແກນນໍາທີ່ມີຄວາມເຂັ້ມແຂງ, ໜັກແໜ້ນ ເປັນເຈົ້າການນໍາພາປະເທດຊາດ ເຮັດວຽກງານການຕ່າງປະເທດ ແລະ ສາມາດເຂົ້າຮ່ວມກັບທ່າອ່ຽງລວມຂອງຍຸກສະໄໝ, ເປັນເຈົ້າການເຊື່ອມໂຍງກັບພາກພື້ນ ແລະ ສາກົນ.
ສະຫາຍ ທອງສະຫວັນ ພົມວິຫານ ຍັງໄດ້ຍົກໃຫ້ເຫັນ ມູນເຊື້ອແຫ່ງການເຕີບໃຫຍ່ຂະຫຍາຍຕົວຂອງພັກ ກໍຄື ມູນເຊື້ອແຫ່ງການຕໍ່ສູ້ປົດປ່ອຍປະເທດຊາດ ຂອງນັກຮົບປະຕິວັດ ພາຍໃຕ້ການນຳພາ-ຊີ້ນຳ ຂອງພັກ ປປ ລາວ ຈົນສາມາດຍາດໄດ້ໄຊຊະນະ ແລະ ສະຖາປະນາ ສປປ ລາວ ໃນວັນທີ 2 ທັນວາ 1975 ຈົນຮອດປັດຈຸບັນ. ພ້ອມນີ້, ຍົກໃຫ້ເຫັນ ການນໍາພາຂອງພັກ ຕໍ່ວຽກງານການຕ່າງປະເທດໃນໄລຍະຜ່ານມາ ຊຶ່ງຕະຫຼອດໄລຍະ 70 ປີ ຜ່ານມາ, ການເຄື່ອນໄຫວວຽກງານການຕ່າງປະເທດ ແມ່ນໄດ້ຜັນຂະຫຍາຍແນວທາງການຕ່າງປະເທດຂອງພັກ ເຂົ້າໃນການເຄື່ອນໄຫວໃນແຕ່ລະໄລຍະ ຢ່າງແທດເໝາະກັບສະພາບຄວາມເປັນຈິງ,ນັບແຕ່ມື້ສ້າງຕັ້ງ ພັກ ປປ ລາວ ເປັນຕົ້ນມາ ໄດ້ກຳນົດວຽກງານການຕ່າງປະເທດ ເປັນວຽກງານໜຶ່ງທີ່ສຳຄັນໃນການເຄື່ອນໄຫວຂອງພັກ, ໄດ້ຫັນເປັນອັນລະອຽດວຽກງານການຕ່າງປະເທດ ໃນແຕ່ລະໄລຍະ ແມ່ນມີຄວາມແຕກຕ່າງກັນ ຊຶ່ງໃນສະໄໝຕໍ່ສູ້ກູ້ຊາດ ຂະແໜງການຕ່າງປະເທດ ໄດ້ສຸມໃສ່ຮັກສາການພົວພັນທີ່ດີກັບບັນດາປະເທດ, ຍາດແຍ່ງເອົາການສະໜັບສະໜູນກັບບັນດາປະຊາຄົມຂອງໂລກ ຜູ້ຮັກຫອມສັນຕິພາບ ເພື່ອສະໜັບສະໜູນ ການຕໍ່ສູ້ອັນເປັນທຳຂອງປະຊາຊົນລາວ. ໃນໄລຍະຫຼັງການປົດປ່ອຍປະເທດຊາດ ແຕ່ປີ 1975 -1982 ພັກໄດ້ປະຕິບັດນະໂຍບາຍ ສັນຕິພາບ, ເອກະລາດ, ມິດຕະພາບ ແລະ ບໍ່ຮ່ວມກຸ່ມ, ການທີ່ພັກເຮົາກໍານົດນະໂຍບາຍບໍ່ຮ່ວມກຸ່ມນັ້ນ ສະແດງໃຫ້ເຫັນທາງດ້ານຍຸດທະສາດ ກໍຄື ຍຸດໂທບາຍຂອງລາວ ເພື່ອແນໃສ່ຮັກສາສາຍພົວພັນສາມັກຄີກັບຂະບວນການບໍ່ຮ່ວມກຸ່ມ, ຊຶ່ງເປັນກຸ່ມປະເທດທີ່ກ້າວໜ້າໃນໂລກ, ມີເປົ້າໝາຍຕ້ານຈັກກະພັດ ແລະ ລັດທິລ່າເມືອງຂຶ້ນ. ໄລຍະແຕ່ປີ 1982-1986 ພັກໄດ້ອອກນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ສັງຄົມນິຍົມ. ນັບແຕ່ກອງປະຊຸມໃຫຍ່ ຄັ້ງທີIV ປີ 1986 ເປັນຕົ້ນມາ ພັກ ປປ ລາວ ໄດ້ຢຶດໝັ້ນໃນແນວທາງການຕ່າງປະເທດ ອັນສະເໝີຕົ້ນສະເໝີປາຍ ຄື: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຈົນມາຮອດປັດຈຸບັນ. ທັງນີ້, ສະແດງເຖິງນະໂຍບາຍ ທີ່ໄດ້ກຳນົດໃນແຕ່ລະໄລຍະ ໂດຍສອດຄ່ອງກັບສະພາບຄວາມເປັນຈິງ ໃນພາກພື້ນ ແລະ ສາກົນ.
ສະຫາຍ ທອງສະຫວັນ ພົມວິຫານກ່າວຕື່ມວ່າ:ຕະຫຼອດໄລຍະ 70 ປີ ຜ່ານມາພາຍໃຕ້ການນຳພາຂອງພັກ ປປ ລາວ ເຮັດໃຫ້ວຽກງານການຕ່າງປະເທດມີຜົນສຳເລັດອັນພົ້ນເດັ່ນ ໃນຫຼາຍດ້ານ ເປັນຕົ້ນດ້ານວຽກງານການທູດ ໄດ້ເປີດກວ້າງການພົວພັນກັບຕ່າງປະເທດແບບຫຼາຍທິດ, ຫຼາຍຝ່າຍ, ຫຼາຍຮູບການ ເປີດກວ້າງເປັນແຕ່ລະບາດກ້າວຢ່າງເໝາະສົມ ຕາມເງື່ອນໄຂ ແລະ ຄວາມສາມາດຕົວຈິງ; ເອົາການພົວພັນດ້ານການເມືອງ, ການທູດ ຕິດພັນກັບການພົວພັນດ້ານເສດຖະກິດ, ປະຕິບັດນະໂຍບາຍການທູດເສດຖະກິດ, ການນທູດປ້ອງກັນເຫດ, ການທູດປະຊາຊົນ ຢ່າງເປີດກວ້າງ ນັບແຕ່ຂັ້ນສູນກາງ ລົງເຖິງ ທ້ອງຖິ່ນ, ມາຮອດປັດຈຸບັນ ສປປ ລາວ ມີການພົວພັນທາງການທູດ ກັບ 151 ປະເທດ ແລະ ມີສໍານັກງານຕັ້ງຢູ່ຕ່າງປະເທດ 40 ກວ່າແຫ່ງ. ອັນພົ້ນເດັ່ນ ໃນຂົງເຂດພາກພືຶ້ນ ສປປ ລາວ ໄດ້ເຂົ້າເປັນສະມາຊິກອາຊຽນ ແລະ ໄດ້ເປັນເຈົ້າພາບຈັດກອງປະຊຸມສຸດຍອດອາຊຽນມາແລ້ວ 3 ຄັ້ງ. ນອກຈາກນັ້ນ, ໃນຂົງເຂດເສດຖະກິດ-ການຄ້າ-ການລົງທຶນ ຂະແໜງການຕ່າງປະເທດ ກໍໄດ້ປະກອບສ່ວນ ໃນການສ້າງເງື່ອນໄຂໂຄສະນາເຜີຍແຜ່ ເພື່ອດຶງດູດການລົງທຶນຈາກຕ່າງປະເທດ ແລະ ອື່ນໆ.
ໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ຍັງໄດ້ຕາງໜ້າໃຫ້ຄະນະພັກ ແລະ ສະມາຊິກພັກ-ພະນັກງານ ກະຊວງການຕ່າງປະເທດ ທຸກສະຫາຍ ສະແດງຄວາມຊົມເຊີຍ, ຍ້ອງຍໍສັນລະເສີນ ຕໍ່ການຊີ້ນໍາ-ນໍາພາອັນສະຫຼາດສ່ອງໃສຢ່າງຮອບດ້ານ ຂອງບັນດາການນໍາພັກ ຕະຫຼອດໄລຍະເວລາ 70 ປີ. ພ້ອມທັງ ສະແດງຄວາມຮູ້ບຸນຄຸນ ຕໍ່ການເສຍສະຫຼະເລືອດເນື້ອ, ເຫື່ອແຮງ ແລະ ສະຕິປັນຍາ ຂອງບັນດາການນໍາພັກແຕ່ລະຮຸ່ນ ຕໍ່ການນໍາພາການປະຕິວັດລາວ ຈົນສາມາດເຕົ້າໂຮມຄວາມສາມັກຄີຊາດ-ຍາດໄດ້ທຸກໄຊຊະນະ ພ້ອມທັງການສ້າງສາພັດທະນາປະເທດຊາດ ປະສົບຜົນສໍາເລັດຍິ່ງໃຫຍ່. ພ້ອມທັງ ອວຍພອນໃຫ້ການນໍາພັກ-ລັດ ຈົ່ງມີສຸຂະພາບເຂັ້ມແຂງ, ມີຜົນສໍາເລັດໃນໜ້າທີ່ການເມືອງ ອັນມີກຽດສະຫງ່າ ແລະ ສືບຕໍ່ໃຫ້ທິດຊີ້ນໍາ ແກ່ບັນດາສະມາຊິກພັກທົ່ວປະເທດ ນໍາເອົາຜົນສໍາເລັດອັນໃຫຍ່ຫຼວງ ແລະ ສະຫງ່າງາມມາໃຫ້ປະເທດຊາດ.
ຄໍາເຫັນ