 |
ໜຶ່ງ, ສະຫະພັນກຳມະບານແຕ່ລະຂັ້ນ ໄດ້ເອົາໃຈໃສ່ຈັດຕັ້ງຜັນຂະຫຍາຍແນວທາງປ່ຽນແປງຂອງພັກເຂົ້າສູ່ວຽກງານຕົວຈິງ ໂດຍຖືເອົາການສຶກສາອົບຮົມການເມືອງແນວຄິດໃຫ້ສະມາຊິກກຳມະບານ, ກຳມະກອນ, ຜູ້ອອກແຮງງານ ແລະ ມະຫາຊົນເປັນບັນຫາທີ່ສຳຄັນແມ່ນວຽກງານແຖວໜ້າ; ໂດຍເນັ້ນໃສ່ການໂຄສະນາສຶກສາອົບຮົມ, ປຸກລະດົມຂົນຂວາຍ, ປູກຈິດສຳນຶກກ່ຽວກັບສະຕິຮັກຊາດ, ແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ກົດໝາຍ, ລະບຽບການຂອງລັດ ເປັນຕົ້ນ ໂຄສະນາຜ່ານສື່ຕ່າງໆ ຂອງສະ ຫະພັນກຳມະບານລາວ ແລະ ຂອງພາກສ່ວນອື່ນ ຊຶ່ງໄດ້ເຮັດໃຫ້ບົດບາດຂອງສະຫະພັນກຳມະບານລາວນັບມື້ສູງເດັ່ນຂຶ້ນທັງພາຍໃນ ແລະ ຕ່າງປະເທດ ໂດຍສະເພາະດ້ານການເມືອງແນວຄິດ, ດ້ານການຈັດຕັ້ງ, ດ້ານແບບ ແຜນວິທີການນຳພາ, ດ້ານການຕິດຕາມ, ກວດກາ, ການຄຸ້ມຄອງ, ການກໍ່ສ້າງ-ບໍາລຸງພະນັກງານ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວບັນດາເຜົ່າ.
ສອງ, ຄົ້ນຄວ້າທິດສະດີ ແລະ ພຶດຕິກຳກ່ຽວກັບວຽກງານກຳມະບານ, ພາລະກໍາປະຫວັດສາດຂອງຊົນຊັ້ນກຳມະກອນລາວ, ຈັດກອງປະຊຸມສຳມະນາວິທະຍາສາດ ແລະ ຂຽນບົດວິທະຍາສາດແນວຄິດໄກສອນ ພົມວິຫານ ກ່ຽວກັບວຽກງານກໍາມະບານ, ຜັນຂະຫຍາຍຍຸດທະສາດການປົກປ້ອງສັງຄົມແຫ່ງຊາດ ມາເປັນຍຸດທະສາດໃນການປົກປ້ອງທາງສັງຄົມຂອງສະຫະພັນກຳມະບານລາວ, ກົດໝາຍວ່າດ້ວຍກຳມະບານລາວ, ກົດລະບຽບຂອງສະຫະພັນກຳມະບານລາວ, ຄຳແນະນໍາວ່າດ້ວຍສອງວາລະແຫ່ງຊາດ, ຄຳແນະນໍາວ່າການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານໃນຂົງເຂດວຽກງານກຳມະບານ, ເນື້ອໃນໂຄສະນາປາຖະກະຖາ; ຂໍ້ກຳນົດວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະຫະພັນກຳມະບານແຕ່ລະຂັ້ນ, ສ້າງຄູ່ມືໃນການຝຶກອົບຮົມທິດສະດີກຳມະບານຢູ່ໃນຫົວໜ່ວຍແຮງງານທັງພາກລັດ ແລະ ເອກະຊົນ.
ສາມ, ປັບປຸງການຈັດຕັ້ງແຕ່ຂັ້ນສູນກາງຮອດທ້ອງຖິ່ນ ຊຶ່ງປະກອບມີຄະນະບໍລິຫານງານສູນກາງສະຫະພັນກຳມະບານລາວ 61 ສະຫາຍ ຍິງ 20 ສະຫາຍ, ມີຄະນະປະທານ 4 ສະຫາຍ, ມີ 34 ສະຫະພັນກຳມະບານກະ ຊວງ ແລະ ອົງການ; 17 ສະຫະພັນກຳມະບານແຂວງ, 1 ນະຄອນຫຼວງ. ໃນນັ້ນ, ມີ 214 ສະຫະພັນກໍາມະບານ ທີ່ຂຶ້ນກັບສະຫະພັນກໍາມະບານກະຊວງ, ນະຄອນຫຼວງ ແລະ ແຂວງມີ 148 ສະຫະພັນກໍາມະບານນະ ຄອນ, ເມືອງ; ມີສະມາຊິກກຳມະບານທັງໝົດ 211,092 ສະຫາຍ ຍິງ 99,531 ສະຫາຍ, ມີຮາກຖານທັງໝົດ 7,716, ມີພະນັກງານກຳມະບານອາຊີບທັງໝົດ 1,626 ສະຫາຍ ຍິງ 681 ສະຫາຍ, ເອົາໃຈໃສ່ກໍ່ສ້າງ-ບຳລຸງພະນັກງານກຳມະບານ ເປັນຕົ້ນຍົກລະດັບດ້ານທິດສະດີການເມືອງ-ການປົກຄອງ, ທິດສະດີກຳມະບານໄລຍະສັ້ນ, ຝຶກອົບຮົມວິຊາຊີບ, ພັດທະນາສີມືແຮງງານ, ວຽກງານວິຊາສະເພາະໃຫ້ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວທັງພາຍໃນ ແລະ ຕ່າງປະເທດ.
ສີ່, ສະຫະພັນກຳມະບານແຕ່ລະຂັ້ນ ໄດ້ເອົາໃຈໃສ່ເຮັດວຽກງານປົກປ້ອງແຮງງານຕາມພາລະບົດບາດ, ສິດ ແລະ ໜ້າທີ່ຂອງຕົນ ດ້ວຍການສະເໜີໃຫ້ຄະນະກໍາມະການແຮງງານແຫ່ງຊາດ ໄດ້ມີການປັບປຸງເພີ່ມຄ່າແຮງງານຂັ້ນຕໍ່າສຸດໃຫ້ຜູ້ອອກແຮງງານໄດ້ 5 ຄັ້ງ, ໂດຍເລີ່ມຈາກ 900,000 ກີບມາເປັນ 1,600,000 ກີບ/ຄົນ/ເດືອນ ແລະ ໄດ້ເພີ່ມເງິນອຸດໜູນຄ່າຄອງຊີບໃຫ້ຜູ້ອອກແຮງງານຈໍານວນ 900,000 ກີບ ລວມຄ່າແຮງງານ ຫຼື ເງິນເດືອນເປັນ 2,500,000 ກີບ/ຄົນ/ເດືອນ ແລະ ໄດ້ຄົ້ນຄວ້າ, ນໍາສະເໜີລັດຖະບານພິຈາລະນາເພີ່ມເງິນ ເດືອນ ແລະ ສະຫວັດດີການໃຫ້ພະນັກງານ-ລັດຖະກອນພາກລັດ ໃຫ້ແທດເໝາະກັບສະພາບເສດຖະກິດໃນປັດຈຸບັນ; ສະຫະພັນກໍາມະບານລາວແຕ່ລະຂັ້ນໄດ້ເປັນເຈົ້າການຕິດຕາມ, ເກັບກໍາຜົນກະທົບຕໍ່ຊີວິດການເປັນຢູ່ຂອງຜູ້ອອກແຮງງານໃນລະບົບ, ນອກລະບົບ ແລະ ແຮງງານເຄື່ອນຍ້າຍກັບຄືນປະເທດ; ຮັບຄໍາຮ້ອງທຸກ ແລະ ໃຫ້ຄຳປຶກ ສາຜູ້ອອກແຮງງານ ແກ້ໄຂຂໍ້ຂັດແຍ່ງທາງດ້ານແຮງງານ ສາມາດທວງເງິນຄືນໄດ້ທັງໝົດ 59,462,386,756 ກີບ; ຊຸກຍູ້ໃຫ້ຫົວໜ່ວຍແຮງງານເຮັດສັນຍາແຮງງານບຸກຄົນ, ສ້າງສັນຍາແຮງງານລວມໝູ່ໃນຫົວໜ່ວຍແຮງງານ, ຊຸກຍູ້ໃຫ້ຜູ້ໃຊ້ແຮງງານນໍາເອົາຜູ້ອອກແຮງງານເຂົ້າປະກັນສັງຄົມ ແລະ ສ້າງຕັ້ງກຸ່ມແຮງງານນອກລະບົບຂອບເຂດທົ່ວປະເທດໄດ້ 165 ກຸ່ມ; ປັບປຸງເບີສາຍດ່ວນຈາກເບີ 8 ໂຕເລກ ມາເປັນເບີ 4 ໂຕເລກ (1512) ເພື່ອ ໃຫ້ຄໍາປຶກສາຜູ້ອອກແຮງງານ, ຂະຫຍາຍສູນໃຫ້ຄໍາປຶກສາ ແລະ ຊ່ວຍເຫຼືອແຮງງານເຄື່ອນຍ້າຍ (MRC); ພ້ອມທັງຊຸກຍູ້ໃຫ້ສ້າງຕັ້ງຄະນະກຳມະການຄວາມປອດໄພ ແລະ ສຸຂະພາບແຮງງານປະຈຳຢູ່ຫົວໜ່ວຍແຮງງານ, ກວດສຸຂະ ພາບປະຈຳປີ, ເກັບກຳການເກີດອຸບັດເຫດແຮງງານ ແລະ ພະຍາດອາຊີບຢູ່ຫົວໜ່ວຍແຮງງານ;
ຫ້າ, ວຽກງານຂະບວນການ ໄດ້ຮັບການຈັດຕັ້ງຜັນຂະຫຍາຍຂໍ້ແຂ່ງຂັນຮັກຊາດ ແລະ ພັດທະນາຂອງພັກຢ່າງຕໍ່ເນື່ອງ ຕິດພັນກັບຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ, ປຸກລະດົມສະມາຊິກກຳມະ ບານ, ກຳມະກອນ ແລະ ຜູ້ອອກແຮງງານເຂົ້າຮ່ວມຂະບວນການແກ້ໄຂຄວາມທຸກຍາກ, ການສ້າງເສດຖະກິດຄອບຄົວ, ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ, ຕ້ານ, ສະກັດກັ້ນປະກົດການຫຍໍ້ທໍ້ຕ່າງໆໃນສັງຄົມ, ຊອກຫາບຸກຄົນດີເດັ່ນຈາກຂະບວນການຕົວຈິງ ແລະ ສ້າງຄອບຄົວຕົວແບບໃນການພັດທະນາເສດຖະ ກິດຄອບຄົວຢ່າງກ້ວາງຂວາງ. ເປັນເຈົ້າການຕິດຕາມ, ກວດກາ ການເຄື່ອນໄຫວວຽກງານຂອງຄະນະບໍລິຫານງານສະຫະພັນກຳມະບານແຕ່ລະຂັ້ນ ເປັນຕົ້ນການປະຕິບັດກົດໝາຍ, ກົດລະບຽບສະຫະພັນກຳມະບານລາວ, ມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ, ແຜນພັດທະນາວຽກງານກຳມະບານລາວ, ມະຕິກອງປະຊຸມໃຫຍ່ໃນແຕ່ລະໄລຍະ, ການຄຸ້ມຄອງ ແລະ ການນຳໃຊ້ງົບປະມານ, ເງິນບຳລຸງ, ເງິນກອງທຶນ ແລະ ລາຍຮັບອື່ນໆ ຂອງກໍາມະບານ; ເກັບກຳສະພາບຫາງສຽງສັງຄົມ, ຄໍາຮ້ອງ, ຄໍາສະເໜີ ຈາກສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ເພື່ອສ່ອງແສງລາຍງານໃຫ້ຄະນະພັກຂັ້ນເທິງຮັບຊາບ.
 |
ຫົກ, ສະຫະພັນກຳມະບານແຕ່ລະຂັ້ນ ໄດ້ຕັ້ງໜ້າປະຕິບັດແນວທາງການຕ່າງປະເທດຂອງພັກ ຕາມຄຳຂວັນທີ່ວ່າ:“ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື”, ເປັນເຈົ້າການເສີມຂະຫຍາຍສາຍພົວພັນຮ່ວມມືກັບບັນດາປະເທດເພື່ອນມິດຍຸດທະສາດ, ເພື່ອນມິດສາກົນ, ອົງການຈັດຕັ້ງສາກົນໄດ້ມີບາດກ້າວຂະຫຍາຍຕົວອັນໃໝ່, ເພື່ອຜົນປະໂຫຍດລວມຂອງຊາດ ແລະ ຂອງສະຫະພັນກຳມະບານລາວ. ນອກຈາກນັ້ນ, ກໍໄດ້ຊຸກຍູ້ໃຫ້ບັນດາສະຫະ ພັນກຳມະບານແຂວງ ເພີ່ມທະວີການພົວພັນຮ່ວມມືສ້າງເງື່ອນໄຂເປັນແຂວງແຮກສ່ຽວກັບບັນດາແຂວງ ທີ່ມີຊາຍແດນຕິດຈອດກັນ ເພື່ອແລກປ່ຽນບົດຮຽນຊຶ່ງກັນ ແລະ ກັນ, ຍາດແຍ່ງເອົາການຊ່ວຍເຫຼືອທາງດ້ານບົດຮຽນ, ທຶນຮອນ, ວັດຖຸອຸປະກອນມາພັດທະນາວຽກງານກຳມະບານໃຫ້ມີຄວາມເຂັ້ມແຂງ.
ຄໍາເຫັນ