 |
ໃນພິທີ, ສະຫາຍ ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານບັນດານິຕິກໍາຕ່າງໆ ເປັນຕົ້ນ ຄຳສັ່ງຂອງກົມການເມືອງສູນກາງພັກ, ສະບັບເລກທີ 05/ກມສພ, ລົງວັນທີ 16 ມັງກອນ 2026 ວ່າດ້ວຍການຍົກຍ້າຍ ພະນັກງານການນຳຂັ້ນສູງໄປຮັບໜ້າທີ່ໃໝ່ ໂດຍຍົກຍ້າຍ ສະຫາຍ ພົທ ວັນທອງ ກອງມະນີ ຄະນະເລຂາທິການສູນກາງພັກ, ເລຂາຄະນະບໍລິຫານງານພັກແຂວງອັດຕະປື ຜູ້ເກົ່າ ໄປຮັບໜ້າທີ່ໃໝ່ຢູ່ກະຊວງປ້ອງກັນຄວາມສະຫງົບ, ຜ່ານມະຕິກົມການເມືອງສູນກາງພັກ, ສະບັບເລກທີ 14/ກມສພ, ລົງວັນທີ 16 ມັງກອນ 2026 ວ່າດ້ວຍການແຕ່ງຕັ້ງ ເລຂາຄະນະບໍລິຫານງານພັກແຂວງອັດຕະປື ໂດຍແຕ່ງຕັ້ງ ສະຫາຍ ບຸນເຖິງ ດວງສະຫວັນ ກຳມະການສູນກາງພັກ, ເປັນເລຂາພັກແຂວງ ອັດຕະປື ຜູ້ ໃໝ່.
ໃນພິທີ, ໄດ້ຜ່ານ ດໍາລັດຂອງນາຍົກລັດຖະມົນຕີ ສະບັບເລກທີ 821/ນຍ ລົງວັນທີ 23 ທັນວາ 2025 ວ່າດ້ວຍການແຕ່ງຕັ້ງ ທ່ານ ທະນູໄຊ ບັນຊາລິດ ເປັນປະທານຄະນະກໍາມະການປົກຄອງແຂວງອັດຕະປື, ຜ່ານຂໍ້ຕົກລົງ ຄະນະກໍາມະການປົກຄອງແຂວງ ສະບັບເລກທີ 30/ປຄປຂ ລົງວັນທີ 16 ມັງກອນ 2026 ວ່າດ້ວຍການແຕ່ງຕັ້ງ ທ່ານ ສຸລິວົງ ອະໄພວົງ ແລະ ທ່ານ ສີໄລ ສີສະແຫວງສຸກ ທັງສອງ ເປັນຮອງປະທານຄະນະກໍາມະການປົກຄອງແຂວງອັດຕະປື.
 |
ໂອກາດນີ້, ສະຫາຍ ສອນໄຊ ສີພັນດອນ ໄດ້ເນັ້ນນັກໃຫ້ບັນດາສະຫາຍການນຳທຸກຂັ້ນຂອງແຂວງອັດຕະປື ເປັນເອກະພາບນຳຂັ້ນເທິງ ຕໍ່ກັບການສັບປ່ຽນພະນັກງານການນຳຂັ້ນສູງຂອງແຂວງ ກໍຄືຂອງພັກ, ສືບຕໍ່ປົກປັກຮັກສາ ແລະ ເສີມສ້າງຄວາມສາມັກຄີພາຍໃນພັກ, ເອົາໃຈໃສ່ນໍາພາ-ຊີ້ນໍາວຽກພັກ-ພະນັກງານໃຫ້ດີ, ເພີ່ມທະວີວຽກງານກວດກາໃຫ້ເຂັ້ມແຂງ ແລະ ແກ້ໄຂຜົນການກວດກາ, ຕ້ານການເຊື້ອມຄຸນປ່ຽນທາດ, ຕ້ານການສໍ້ລາດບັງຫຼວງຂອງພະນັກງານໃຫ້ເຂັ້ມງວດ ໄປພ້ອມກັບການເຮັດວຽກງານສຶກສາອົບຮົມການເມືອງ-ແນວຄິດ ຂອງສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫຼວດ ແລະ ປະຊາຊົນບັນດາເຜົ່າ ຮັບຮູ້ເຂົ້າໃຈແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ສືບຕໍ່ເອົາໃຈໃສ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ກໍຄືມະຕິກອງປະຊຸມໃຫຍ່ຂອງອົງຄະນະພັກແຂວງອັດຕະປື ສະໄໝປັດຈຸບັນ ແລະ ແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການປະຕິບັດ 2 ວາລະແຫ່ງຊາດບົນຈິດໃຈສືບຕໍ່ສ້າງການຫັນປ່ຽນໃໝ່ ຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ບັນຫາໄພເງິນເຟີ້, ຄ່າຄອງຊີບສູງ, ການເໜັງຕີງແຮງຂອງອັດຕາແລກປ່ຽນ ທີ່ສົ່ງຜົນກະທົບເຖິງແນວຄິດ, ຈິດໃຈ ແລະ ຊີວິດການເປັນຢູ່ຂອງສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫຼວດ ແລະ ປະຊາຊົນບັນດາເຜົ່າ ໂດຍສະເພາະບຸກທະລຸການສ້າງເສັ້ນທາງເຊື້ອມຈອດພາຍໃນແຂວງ, ຕ່າງແຂວງ, ຕ່າງປະເທດໃຫ້ສະດອກສາບາຍ, ບຸກທະລຸການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ແລະ ພັດທະນາແຫຼ່ງທ່ອງທ່ຽວພາຍໃນແຂວງໃຫ້ສໍາເລັດຕາມແຜນການ, ສືບຕໍ່ຍູ້ແຮງການພັດທະນາເສດຖະກິດ-ສັງຄົມຂອງແຂວງ ໃຫ້ແຂງແຮງກວ່າເກົ່າ ເປັນຕົ້ນແມ່ນສຸມໃສ່ຊຸກຍູ້ສົ່ງເສີມຂະບວນການຜະລິດເປັນສິນຄ້າ ໃຫ້ສືບຕໍ່ຂະຫຍາຍຕົວຢ່າງແຂງແຮງ, ກວ້າງຂວາງ ແລະ ມີຄຸນນະພາບສູງຂຶ້ນ ເພື່ອທົດແທນການນຳເຂົ້າ ແລະ ສົ່ງອອກຫຼາຍຂຶ້ນຕື່ມ, ສ້າງພື້ນຖານລາຍຮັບທີ່ໝັ້ນຄົງ ແລະ ຍາວນານຂອງແຂວງ, ໂດຍຕິດພັນກັບການແກ້ໄຂຄວາມທຸກຍາກຂອງປະຊາຊົນ, ຊຸກຍູ້ສົ່ງເສີມການຜະລິດ ທີ່ເປັນໜໍ່ແໜງໃໝ່ຂອງປະຊາຊົນ ໃຫ້ເປັນຂະບວນການກວ້າງຂວາງ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນ, ອັນສໍາຄັນແມ່ນຕ້ອງຊຸກຍູ້ໃຫ້ປະຊາຊົນເປັນເຈົ້າຕົນເອງໃນການພັດທະນາຊີວິດການເປັນຢູ່ ແລະ ຍົກລະດັບແບບແຜນດໍາລົງຊີວິດທີ່ກ້າວໜ້າກວ່າເກົ່າ ເພື່ອເຮັດໃຫ້ຄອບຄົວຫຼຸດພົ້ນອອກຈາກຄວາມທຸກຍາກ, ເອົາໃຈໃສ່ເພີ່ມທະວີ ແລະ ຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ສືບຕໍ່ເອົາໃຈໃສ່ຊີ້ນຳວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມສະຫງົບປອດໄພ,ສືບຕໍ່ປັບປຸງກົງຈັກການຈັດຕັ້ງໃຫ້ເຂັ້ມແຂງ, ໜັກແໜ້ນ ຕາມທິດກະທັດຮັດ, ມີປະສິດທິພາບ, ຕິດພັນກັບການກະກຽມດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງ ຊຸດທີ V.
(ຂ່າວ: ວີເດັນ)
ຄໍາເຫັນ