ທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກໍາ ແລະ ປ່າໄມ້ແຂວງ ໄດ້ລາຍງານຜົນສໍາເລັດຂອງໂຄງການ ກ່ຽວກັບການຄຸ້ມຄອງ ແລະ ຈັດຕັ້ງປະຕິບັດ ທຶນໂຄງການຮ່ວມມືລາວ-ເກົາຫຼີ ຫຼື ເອີ້ນວ່າ: ໂຄງການສ້າງແຜນກິດຈະກໍາ ເພື່ອສ້າງລາຍຮັບໃຫ້ປະຊາຊົນເຂດພາກເໜືອ ແລະ ພາກກາງ ສປປ ລາວ). ຈຸດປະສົງຂອງໂຄງການ ເພື່ອປັບປຸງພື້ນຖານໂຄງລ່າງດ້ານກະສິກໍາ, ສ້າງຄວາມເຂັ້ມແຂງໃຫ້ພະນັກງານລັດ ແລະ ຜູ້ນໍາຊຸມຊົນ, ສົ່ງເສີມການສ້າງອາຊີບ, ສ້າງລາຍຮັບ ແລະ ການແກ້ໄຂຄວາມທຸກຍາກຂອງປະຊາຊົນ; ເປົ້າໝາຍໂຄງການຮ່ວມມື ລາວ-ເກົາຫຼີ ກວມເອົາ 3 ແຂວງ 7 ເມືອງ 14 ບ້ານ ມູນຄ່າການຊ່ວຍເຫຼືອທັງໝົດ 12 ລ້ານ 5 ແສນໂດລາສະຫະລັດ.
ສໍາລັບແຂວງບໍລິຄໍາໄຊ ໄດ້ຮັບການຊ່ວຍເຫຼືອຈາກໂຄງການມີ 3 ເມືອງ 6 ບ້ານຄື: ເມືອງບໍລິຄັນ 2 ບ້ານ (ບ້ານຜາເມືອງ ແລະ ບ້ານດົງ), ເມືອງຄໍາເກີດ 2 ບ້ານ (ບ້ານທົ່ງແສນ ແລະ ບ້ານປຸ່ງປ່າຕາວ), ເມືອງວຽງທອງ 2 ບ້ານ (ບ້ານຈອມທອງ ແລະ ບ້ານໂພນດູ່) ມູນຄ່າການຊ່ວຍເຫຼືອຢູ່ແຂວງບໍລິຄໍາໄຊ ທັງໝົດ 1,590,000 ໂດລາສະຫະລັດ; ລວມມີ 77 ກິດຈະກໍາ. ໃນນັ້ນ, ທຶນໂຄງການຂັ້ນແຂວງມູນຄ່າ 600,000 ໂດລາສະຫະລັດ ແລະ ທຶນຂອງແຂວງສົມທົບກັບໂຄງການມູນຄ່າ 1 ຕື້ກີບ. ຈາກນັ້ນ, ທ່ານ ວິລອນ ວັນນະບົວທອງ ຕາງໜ້າບໍລິສັດພູທອນພັດທະນາຄົບວົງຈອນ ຈໍາກັດຜູ້ດຽວ ໃນນາມຜູ້ຮັບເໝົາຈັດຕັ້ງປະຕິບັດໂຄງການປັບປຸງສູນບໍລິການເຕັກນິກກະສິກໍາປ່າໄມ້ ແລະ ພັດທະນາຊົນນະບົດຂອງແຂວງ ໄດ້ລາຍງານການຈັດຕັ້ງປະຕິບັດໂຄງການ ຊຶງມີ 2 ສັນຍາຄື: ສັນຍາ 1 ແມ່ນການຈັດຕັ້ງປະຕິບັດກິດຈະກໍາກໍ່ສ້າງ ແລະ ສັນຍາ 2 ແມ່ນການຈັດຊື້, ສະໜອງອຸປະກອນ ແລະ ປັດໃຈການຜະລິດກະສິກໍາ ມູນຄ່າລວມທັງ 2 ສັນຍາ 316,687 ໂດລາ. ມີ 7 ກິດຈະກໍາ ໄດ້ຈັດຕັ້ງປະຕິບັດມາແຕ່ວັນທີ 19 ຕຸລາ 2024 ແລະ ໄດ້ກວດກາຢັ້ງຢືນຜົນສໍາເລັດຂອງໂຄງການ 100% ຈາກຄະນະກໍາມະການຂັ້ນແຂວງຮ່ວມກັບໂຄງການ ຄັ້ງວັນທີ 26 ມີນາ 2025. ໃນພິທີ, ໄດ້ລົງນາມເຊັນບົດບັນທຶກມອບ-ຮັບໂຄງການ ລະຫວາງທ່ານ ພູທອນ ວັນນະບົວທອງ ປະທານບໍລິສັດ ພູທອນພັດທະນາຄົບວົງຈອນ ຈໍາກັດຜູ້ດຽວ ແລະ ທ່ານ ຫົວໜ້າພະແນກກະສິກໍາ ແລະ ປ່າໄມ້ແຂວງ.
(ຂ່າວ-ພາບ: ວຽງສະຫວັນ)
ຄໍາເຫັນ