ບໍລິສັດ ແລະ ສະມາຄົມຊາວຄ້າຂາຍຫວຽດນາມ ອວຍພອນການນຳແຂວງໄຊສົມບູນ

ທ່ານ ຫງວຽນ ຫວຽດ ກວັນ ຮອງຜູ້ອໍານວຍການບໍລິສັດແຮ່ທາດ ແລະ ຫຼອມໂລຫະວຽງຈັນ ຈໍາກັດຜູ້ດຽວ ພ້ອມດ້ວຍຄະນະ ແລະ ສະມາຄົມຊາວຄ້າຂາຍຫວຽດນາມ ທີ່ອາໄສຢູ່ແຂວງໄຊສົມບູນ ໄດ້ເຂົ້າອວຍພອນການນໍາ ແຂວງໄຊສົມບູນ ເນື່ອງໃນໂອກາດວັນຊາດ ຄົບຮອບ 48 ປີ (2/12/1975-2/12/2023) ແລະ ວັນເກີດປະທານ ໄກສອນ ພົມວິຫານ ຄົບຮອບ 103 ປີ ໃນທ້າຍອາທິດຜ່ານມານີ້ທີ່ຫ້ອງວ່າການແຂວງໄຊສົມບູນ ໂດຍການຕ້ອນຮັບຂອງທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍຄະນະ.
ໂອກາດດັ່ງກ່າວ, ທ່ານ ຫງວຽນ ຫວຽດ ກວັນ ໄດ້ຕີລາຄາສູງຕໍ່ການພັດທະນາຂອງ ສປປ ລາວ ຊຶ່ງຕະຫຼອດໄລຍະ 48 ປີ ຜ່ານມາ, ພາຍໃຕ້ການນໍາພາອັນສະຫຼາດສ່ອງໃສ ຂອງພັກປະຊາຊົນ ປະຕິວັດລາວ ເວົ້າລວມ, ເວົ້າສະເພາະອົງຄະນະພັກແຂວງໄຊສົມບູນ ທີ່ສາມາດຍາດໄດ້ຜົນສຳເລັດອັນຍິ່ງໃຫຍ່ຫຼາຍດ້ານ, ມີຄວາມສະຖຽນລະພາບທາງດ້ານການເມືອງ, ເສດຖະກິດ-ສັງຄົມ ນັບມື້ໄດ້ຮັບການພັດທະນາ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການຍົກລະດັບນັບມື້ນັບດີຂຶ້ນ, ສະຖານະຂອງ ສປປ ລາວ ນັບມື້ໄດ້ຮັບການຍົກລະດັບເທົ່າທຽມກັບສາກົນ, ສາຍພົວພັນມູນເຊື້ອຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງຊາດຫວຽດນາມ-ລາວ ກໍຄືສາຍພົວພັນລະຫວ່າງ ບັນດາແຂວງ ແລະ ວິສາຫະກິດຂອງຫວຽດນາມ ກັບແຂວງໄຊສົມບູນ ນັບມື້ຮັດແໜ້ນກ້າວເຂົ້າສູ່ລວງເລິກ ແລະ ປະກົດຜົນເປັນຈິງ ພ້ອມທັງອວຍພອນໄຊອັນປະເສີດ ມາຍັງອົງຄະນະພັກ, ອົງການປົກຄອງ, ປະຊາຊົນບັນດາເຜົ່າ ທົ່ວແຂວງໄຊສົມບູນ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດໃນທຸກໜ້າທີ່ວຽກງານ, ອວຍພອນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ກໍຄືແຂວງໄຊສົມບູນ ຈົ່ງຂຽວສົດງົດງາມ, ໝັ້ນຄົງຂະໜົງແກ່ນຕະຫຼອດກາລະນານ.
ໃນໂອກາດນີ້, ທ່ານ ພອຍຄຳ ຮຸ່ງບຸນຍວງ ກໍໄດ້ສະແດງຄວາມຂອບໃຈ ມາຍັງຄະນະບໍລິສັດແຮ່ທາດ ແລະ ຫຼອມໂລຫະວຽງຈັນ ຈໍາກັດຜູ້ດຽວແລະ ສະມາຄົມຊາວຄ້າຂາຍຫວຽດນາມ ຢູ່ແຂວງໄຊສົມບູນທີ່ໄດ້ປະກອບສ່ວນສ້າງສາພັດທະນາແຂວງໄຊສົມບູນ ມາໂດຍຕະຫຼອດ ແລະ ໄດ້ເຂົ້າມາອວຍພອນການນຳແຂວງໄຊສົມບູນໃນຄັ້ງນີ້ຊຶ່ງເປັນການຢັ້ງຢືນເຖິງມິດຕະພາບອັນພິເສດ ທີ່ບໍ່ມີປະເທດໃດຄື ລະຫວ່າງສອງປະເທດລາວ ແລະ ຫວຽດນາມ, ຫວັງວ່າ ໃນຕໍ່ໜ້ານີ້ ພວກເຮົາຈະສືບຕໍ່ຮ່ວມມືປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຂອງສອງປະເທດ ໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
(ຂ່າວ-ພາບ: ພຸດທະສອນ ເວດສະວົງ)