 |
ວັນແຫ່ງຄວາມປອດໄພ ແມ່ນໜຶ່ງໃນກິດຈະກໍາທີ່ທາງບໍລິສັດ ໄຟຟ້ານໍ້າເທີນ 2 ໄດ້ໃຫ້ຄວາມສໍາຄັນ ແລະ ຈັດຂຶ້ນໃນທຸກໆປີ ໂດຍເລີ່ມແຕ່ປີ 2010 ເປັນຕົ້ນມາ, ເພື່ອເປັນການນໍາສະເໜີ ແລະ ສະໜັບສະໜູນວັດຖຸປະສົງຕາມນະໂຍບາຍດ້ານຄຸນນະພາບ, ສຸຂະພາບ, ຄວາມປອດໄພ ແລະ ສິ່ງແວດລ້ອມຂອງບໍລິສັດ, ມາຮອດປັດຈຸບັນຍິ່ງເຫັນໄດ້ຢ່າງຊັດເຈນ ແລະ ເປັນຮູບປະທໍາຫຼາຍຂຶ້ນໂດຍຜ່ານການຈັດງານ ວັນແຫ່ງຄວາມປອດໄພ ໃນຊຸມປີຜ່ານມາ. ຍ້ອນເຫັນໄດ້ຄວາມສໍາຄັນດັ່ງກ່າວ, ຜູ້ບໍລິຫານງານຂອງບໍລິສັດໄຟຟ້ານໍ້າເທີນ 2 ຈຶ່ງຕັດສິນໃຈຫັນປ່ຽນຮູບແບບການຈັດງານ ຈາກສັບປະດາແຫ່ງຄວາມປອດໄພ ມາເປັນວັນແຫ່ງຄວາມປອດໄພ ນັບແຕ່ປີ 2019 ເປັນຕົ້ນມາ ຈົນເຖິງປັດຈຸບັນ.
ພາຍໃນງານບັນດາທ່ານທີ່ເຂົ້າຮ່ວມ ໄດ້ຮັບຊົມການປະກວດຜົນງານວິດີໂອ ພາຍໃຕ້ຫົວຂໍ້ "10 ກົດຫຼັກພິທັກຊີວິດ" ທີ່ສ້າງຂຶ້ນໂດຍພະແນກການ-ຂະແໜງການປິ່ນອ້ອມ ພ້ອມທັງໄດ້ທ່ຽວຊົມ ແລະ ຮ່ວມຫຼິ້ນກິດຈະກໍາຕາມບູດຕ່າງໆ ທີ່ທາງບໍລິສັດໄດ້ຈັດຂຶ້ນ ຊຶ່ງມີກິດຈະກໍາທີ່ສໍາຄັນ ສາມາດຖອດຖອນບົດຮຽນ ແລະ ຄວາມຮູ້ພື້ນຖານ ກ່ຽວກັບຄວາມປອດໄພໃຫ້ແກ່ຜູ້ເຂົ້າຮ່ວມໄດ້ເປັນຢ່າງດີ ເປັນຕົ້ນແມ່ນ: ກິດຈະກໍາຄວາມປອດໄພຈາກໄຟຟ້າ,ຄວາມປອດໄພໃນການຂັບຂີ່ ແລະ ກິດຈະກໍາຄວາມປອດໄພດ້ານອື່ນໆ ບົ້ນພື້ນຖານປະຕິບັດຕາມນະໂຍບາຍດ້ານຄວາມປອດໄພຂອງບໍລິສັດໄດ້ວາງອອກ. ພ້ອມນີ້ ຍັງໄດ້ຮັບຊົມວິດີໂອ 15 ປີຂອງການເດີນທາງດ້ວຍຄວາມປອດໄພ ຂອງນໍ້າເທີນ 2, ພິທີລົງນາມກົດລະບຽບດ້ານຄວາມປອດໄພ ຂອງພະນັກງານນໍ້າເທີນ 2 ແລະ ບັນດາຜູ້ຮັບເໝົາ. ຈາກນັ້,ກໍໄດ້ມອບລາງວັນ ໃຫ້ແກ່ທີມທີ່ຊະນະໃນການປະກວດວິດີໂອ.
ທ່ານ ມາກ ອັງຕວນຣຸບ ໄດ້ກ່າວໃນພິທີເປີດງານໃນຄັ້ງນີ້ວ່າ: ວັນແຫ່ງຄວາມປອດໄພ ປະຈຳປີ 2025 ຂອງ ນ້ຳເທີນ 2, ເປັນວັນທີ່ພວກເຮົາຢ້ຳເຕືອນກັນເຖິງຄວາມຕັ້ງໃຈຕໍ່ດ້ານຄວາມປອດໄພ ສະຫຼອງຕໍ່ຄວາມສຳເລັດ ແລະ ພ້ອມກັນເບິ່ງໄປໃນອະນາຄົດຂ້າງໜ້າທີ່ປອດໄພຍິ່ງຂຶ້ນ. ໃນວັນນີ້ ພວກເຮົາຂໍຢືນຢັນກັບຄວາມຕັ້ງໃຈຕໍ່ດ້ານຄວາມປອດໄພຜ່ານ " 10 ກົດຫຼັກ ພິທັກຊີວິດ" ຊຶ່ງເປັນການປະຕິບັດທີ່ເປັນປະໂຫຍດຕໍ່ກັບທຸກຄົນ ກໍຄື ບັນດາ ພະນັກງານ, ທີ່ປຶກສາ ແລະ ຜູ້ຮັບເໝົາ ກໍເພື່ອໃຫ້ພວກເຮົາທຸກຄົນໄດ້ກັບບ້ານໄປຫາຄົນທີ່ເຮົາຮັກຢ່າງປອດໄພ.
ມື້ນີ້ ພວກເຮົາຍັງໄດ້ສະເຫຼີມສະຫຼອງການຄົບຮອບ 15 ປີ ຂອງການເດີນທາງດ້ານຄວາມປອດໄພຂອງພວກເຮົານຳກັນ ຊຶ່ງເຕັມໄປດ້ວຍການປັບປຸງຢ່າງຕໍ່ເນື່ອງ ພ້ອມດ້ວຍວັດທະນະທຳຄວາມປອດໄພທີ່ເຂັ້ມແຂງ ໂດຍສະເພາະຢ່າງຍິ່ງກໍຄື ນ້ຳເທີນ 2 ໄດ້ບັນລຸເປົ້າໝາຍທີ່ສຳຄັນ ຄືການປະຕິບັດວຽກງານໂດຍບໍ່ມີອຸບັດຕິເຫດທີ່ເຮັດໃຫ້ພັກວຽກຈາກການບາດເຈັບ ເປັນເວລາ 3,100 ວັນແລ້ວ ຫຼື ຫຼາຍກວ່າ 8 ປີ. ນີ້ຄືຄວາມສຳເລັດທີ່ໜ້າພາບພູມໃຈ ແລະ ເປັນສິ່ງເຕືອນໃຈໃຫ້ພວກເຮົາມີຄວາມລະມັດລະວັງສູງຢູ່ຕະຫຼອດ. ຂໍໃຫ້ພວກເຮົາຈົດຈຳໄວ້ວ່າ ຄວາມປອດໄພ ບໍ່ແມ່ນການພະຍາຍາມພຽງຄັ້ງດຽວ ແຕ່ເປັນຄວາມຮັບຜິດຊອບຮ່ວມກັນ ແລະ ຢ່າງຕໍ່ເນື່ອງ. ຈົ່ງພາກັນຕື່ນຕົວ ຕັ້ງໃຈ ແລະ ຮ່ວມກັນເຮັດໃຫ້ນ້ຳເທີນ 2 ເປັນສະຖານທີ່ ທີ່ປອດໄພສຳລັບທຸກຄົນ.
(ຂ່າວ-ພາບ: ກອງຄໍາ)
ຄໍາເຫັນ