ຈັດງານບຸນດັ່ງກ່າວຂຶ້ນໃນລະຫວ່າງວັນທີ 28 ຕຸລາ ຫາ 3 ພະຈິກຜ່ານມາ, ງານບຸນຊ່ວງເຮືອປະເພນີຍັງເປັນໜຶ່ງງານບຸນຈັດຂຶ້ນເພື່ອເພີ່ມພູນຄູນສ້າງມໍຣະດົກທາງດ້ານວັດທະນະທຳໜຶ່ງໃນຮີດ 12ຄອງ 14 ປະເພນີລາວ ກໍຄືຮີດຄອງປະເພນີອັນດີງາມຂອງທ້ອງຖິ່ນ, ຂອງຊາວລ້ອງງື່ມ ກໍຄືຊາດລາວເຮົາທີ່ໄດ້ສືບສານຕໍານານຕາມຮອຍບັນພະບູລຸດ ສືບທອດກັນມາແຕ່ບູຮານນະການ. ໃນນັ້ນ, ງານບຸນຊ່ວງເຮືອປະເພນີປີນີ້ຍັງຮັກສາໄດ້ຄວາມເປັນລະບຽບຮຽບຮ້ອຍ, ຄວາມສະຫງົບ ແລະ ປອດໄພເປັນຢ່າງດີ.
ທ່ານ ພັທ ໄຊພອນ ຈັນທະລາດ ຮອງຫົວໜ້າກອງບັນຊາການປ້ອງກັນຄວາມສະຫງົບ (ປກສ) ເມືອງທຸລະຄົມ ແຂວງວຽງຈັນ ທັງເປັນອະນຸກໍາມະການຮັກສາຄວາມສະຫງົບໃນງານບຸນຊ່ວງເຮືອປະເພນີປະຈໍາປີ 2024 ໄດ້ໃຫ້ສໍາພາດຜ່ານນັກຂ່າວໜັງສືພິມປະຊາຊົນໃນວັນທີ 3 ພະຈິກຜ່ານມາ ທີ່ງານບຸນດັ່ງກ່າວວ່າ: ເພື່ອປະຕິບັດຕາມຮີດຄອງປະເພນີອັນດີງາມຂອງແຂວງວຽງຈັນ ເມືອງທຸລະຄົມໄດ້ຮັບກຽດເປັນເຈົ້າພາບຈັດງານບຸນຊ່ວງເຮືອປະຈໍາປີ 2024. ສໍາລັບວຽກງານປ້ອງກັນຊາດ (ປກຊ)-ປ້ອງກັນຄວາມສະຫງົບ (ປກສ) ເປັນວຽກງານໜຶ່ງທີ່ມີຄວາມສໍາຄັນຫຼາຍ ເພື່ອເຮັດໃຫ້ມວນຊົນມາທ່ຽວງານບຸນມີຄວາມເປັນລະບຽບ, ມີຄວາມສະຫງົບ ແລະ ປອດໄພ ໂດຍລວມແລ້ວພວກເຮົາໄດ້ກະກຽມໃສ່ປ້ອງກັນຄວາມສະຫງົບໃນງານບຸນຊ່ວງເຮືອປະເພນີດັ່ງກ່າວ. ຕະຫຼອດໄລຍະການຈັດງານບຸນ ສາມາດຮັກສາໄດ້ຄວາມສະຫງົບປອດໄພໄດ້ 100% ໂດຍໄດ້ເຕົ້າໂຮມກໍາລັງ ປກສ-ປກຊໄດ້ມີການວາງແຜນສົມທົບກັນໃນອະນຸກໍາມະການຈັດງານບຸນເປັນຢ່າງດີ. ໃນນັ້ນການຈັດຕັ້ງປະຕິບັດຕົວຈິງແມ່ນໄດ້ເອົາໃຈໃສ່ນໍາກໍາລັງຂອງພວກເຮົາລົງແຕ່ລະຈຸດໂດຍສະເພາະຢູ່ໃນຂອບເຂດຂອງເມືອງທຸລະຄົມໄດ້ຈັດວາງກໍາລັງຢູ່ໃນ 8 ຈຸດ. ໃນນັ້ນ, ກໍາລັງປ້ອງກັນຄວາມສະຫງົບມີທັງໝົດ 92 ສະຫາຍ, ກໍາລັງປ້ອງກັນຊາດມີ 52 ສະຫາຍ, ຜ່ານການຈັດຕັ້ງປະຕິບັດຕົວຈິງໃນຕະຫຼອດງານບຸນຜ່ານມາ ແມ່ນຮັກສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍເປັນຢ່າງດີ. ພ້ອມກັນນັ້ນ, ຍັງບໍ່ມີບັນຫາເລື່ອງຮ້າຍແຮງເກີດຂຶ້ນ, ມີພຽງອຸບັດເຫດເລັກນ້ອຍເທົ່ານັ້ນ.
ທ່ານ ພັທ ໄຊພອນ ຈັນທະລາດ ກ່າວຕື່ມວ່າ: ທັງໝົດນັ້ນ, ມີຄວາມສະຫງົບໄດ້ ກໍຍ້ອນມີຫຼາຍພາກສ່ວນ ກໍຄືຜູ້ມາທ່ຽວງານບຸນໄດ້ເອົາໃຈໃສ່ມີສ່ວນຮ່ວມຊ່ວຍກັນເປັນເຈົ້າການຮັກສາຄວາມສະຫງົບ ຈຶ່ງເຮັດໃຫ້ພາຍໃນງານມີຄວາມເປັນລະບຽບຮຽບຮ້ອຍ, ສະຫງົບປອດໄພຮອບດ້ານຕາມຄາດໝາຍວາງໄວ້.
ຄໍາເຫັນ