ຕະຫຼອດໄລຍະຜ່ານມາ ພັກ-ລັດຖະບານ ໄດ້ມີແນວທາງປ່ຽນແປງໃໝ່ເພື່ອຊຸກຍູ້ປະຊາຊົນ ໃຫ້ຫັນມາເຮັດອາຊີບຄົງທີ່ ເພື່ອສ້າງລາຍຮັບເຂົ້າສູ່ຄອບຄົວໃຫ້ຫຼາຍຂຶ້ນ ດ້ວຍການນຳໃຊ້ທ່ແຮງທີ່ມີຂອງທ້ອງຖິ່ນ ແລະການເຂົ້າເຖິງແຫຼ່ງທຶນ ເພື່ອເຮັດໃຫ້ການດຳເນີນທຸລະກິດໄດ້ຮັບຜົນດີ.
 |
| |
ທ່ານ ນາງ ແຂກ ອາຍຸ 33 ປີ ຢູ່ບ້ານໂພນສະຫວ່າງເມືອງປາກອູ ເປັນຄອບຄົວໜຶ່ງທີ່ຫັນຈາກການຄ້າຂາຍພືດຜັກ ມາສຸມໃສ່ການລ້ຽງ ແລະຊື້-ຂາຍສັດໃຫຍ່ ໂດຍສະເພາະງົວ ເປັນຕົ້ນຕໍ ເຮັດໃຫ້ມີລາຍຮັບບໍ່ຕໍ່າກວ່າ 300 ລ້ານກີບຕໍ່ປີ. ທ່ານ ນາງ ແຂກ ໄດ້ໃຫ້ສຳພາດຕໍ່ນັກຂ່າວແຂວງຫຼວງພະບາງວ່າ: ການດຳລົງຊີວິດໃນເມື່ອກ່ອນແມ່ນພົບຄວາມຫຍຸ້ງຍາກຫຼາຍ ເບື້ອງຕົ້ນ ພາຍຫຼັງສ້າງຄອບຄົວ ໄດ້ເປັນພະນັກງານຢູ່ໂຮງແຮມ, ຈາກນັ້ນ ໄດ້ຫັນມາປູກ ແລະຊື້-ຂາຍພືດຜັກ ເຫັນວ່າຍັງບໍ່ກຸ້ມກິນ ຈິ່ງຫັນມາລ້ຽງ ແລະຊື້-ຂາຍງົວ ເປັນຫຼັກ ໂດຍໝູນໃຊ້ທ່ແຮງທີ່ມີຂອງຄອບຄົວ ເປັນຕົ້ນ ນຳໃຊ້ເນື້ອທີ່ດິນຂອງຕົນເອງ ແລະພໍ່-ແມ່, ປູກຕົ້ນໄມ້ໃຫ້ໝາກ ແລະລ້ຽງສັດໃຫຍ່ ຕິດພັນກັບການປູກຫຍ້າອາຫານສັດ, ໂດຍນຳໃຊ້ເຕັກນິກວິຊາການທີ່ເປັນປະສົບການຂອງຕົນເຂົ້າຊ່ວຍ, ຈາກນັ້ນ ໄດ້ຂໍກູ້ຢືມເງິນນຳທະນາຄານນະໂຍບາຍ ຈຳນວນ 250 ລ້ານ ເພື່ອມາຊື້ສັດປະເພດງົວ-ຄວາຍ ເຂົ້າລ້ຽງຢູ່ສວນບ້ານໂພນສະຫວ່າງ ແລະບ້ານເຄຍລວງ ເມືອງປາກອູ, ປັດຈຸບັນມີສັດລ້ຽງທີ່ຮັກສາໄວ້ຢູ່ສວນທັງໝົດ 39 ໂຕ, ໃນນັ້ນ ງົວ 33 ໂຕ ແລະຄວາຍ 6 ໂຕ, ທັງໄດ້ນຳໃຊ້ທຶນເພື່ອຊື້ສັດປະເພດງົວເພື່ອມາທອມຂາຍເປັນໄລຍະ, ປີຜ່ານມາສາມາດສ້າງລາຍຮັບຈາກການຂາຍງົວ-ຄວາຍ ທີ່ລ້ຽງຄົງທີ່ປະມານ 150 ລ້ານກີບ, ການຊື້-ຂາຍງົວ ປະມານ 100 ລ້ານກີບ, ພ້ອມນັ້ນ ໄດ້ເກັບແກ່ນຫຍ້າອາຫານສັດທີ່ປູກພາຍໃນສວນ ຂາຍເປັນສິນຄ້າ ມີລາຍຮັບປະມານ 40 ລ້ານກີບ ແລະມີຕົ້ນໄມ້ໃຫ້ໝາກ ປະເພດໝາກເງາະ ປະມານ 100 ຕົ້ນ ລວມແລ້ວສາມາດສ້າງລາຍຮັບໄດ້ບໍ່ລຸດ 300 ລ້ານກີບ.
 |
| |
ທ່ານ ນາງ ແຂກ ເວົ້າສູ່ຟັງຕື່ມວ່າ: ຜ່ານການດຳລົງຊີວິດມາຮອດປັດຈຸບັນ ຊີວິດການເປັນຢູ່ຂອງຄອບຄົວດີຂື້ນຫຼາຍເທົ່າຫາກທຽບໃສ່ໃນເມື່ອກ່ອນ ຍ້ອນມີສິ່ງອຳນວຍຄວາມສະດວກບາງດ້ານ ເປັນຕົ້າມີເນື່ອທີ່ດິນ ໄວ້ສຳລັບລ້ຽງສັດປະເພດງົວ-ຄວາຍ, ມີທຶນທີ່ໄດ້ຮັບການກູ້ຢືມຈາກທະນາຄານນະໂຍບາຍ ເພື່ອໝູນໃຊ້ເຂົ້າໃນການດຳເນີນທຸລະກິດ ແລະສິ່ງສຳຄັນ ແມ່ນທຸກຄົນໃນຄອບຄົວມີຄວາມສາມັກຄີ, ມີຄວາມດຸໝັ່ນ ໃນການປູກ-ຝັງລ້ຽງສັດ, ສຳລັບແຜນການຕໍ່ໜ້າ ຈະສືບຕໍ່ໃນການບົວລະບັດສວນຫຍ້າ ແລະຕົ້ນໄມ້ໃຫ້ໝາກ ເພື່ອໃຫ້ມີຫຍ້າໃຫ້ສັດກິນຕະຫຼອດປີ ແລະໃຫ້ຜົນຜະລິດທີ່ສູງ ສາມາດສ້າງລາຍຮັບໃຫ້ກັບຄອບຄົວ ທັງປະຕິບັດພັນທະຕໍ່ທະນາຄານນະໂຍບາຍຕາມລະບຽບ.
ຄໍາເຫັນ