 |
ສະຫາຍ ອາລຸນໄຊ ສູນນະລາດ ໄດ້ກ່າວປາໄສໃນພິທີໂຮມຊຸມນຸມວ່າ: ປະທານໄກສອນພົມວິຫານ ສົມແລ້ວທີ່ເປັນວິລະບູລຸດ ທີ່ຍິ່ງໃຫຍ່ຂອງຊາດລາວ, ເປັນນັກປະຕິວັດທີ່ອົງອາດກ້າແກ່ນ, ນັກຮັກຊາດຜູ້ຍິ່ງໃຫຍ່, ລູກຜູ້ປະເສີດຂອງປະຊາຊົນລາວບັນດາເຜົ່າ. ປະທານ ໄກສອນ ພົມວິຫານ ທ່ານໄດ້ສ້າງຄຸນງາມ ຄວາມດີອັນໃຫຍ່ຫຼວງໃຫ້ແກ່ພັກປະຊາຊົນປະຕິວັດລາວ ແລະ ປະເທດຊາດຂອງເຮົາ ຊຶ່ງອຸດົມການ ແລະ ການອຸທິດ ຂອງເພີ່ນ ແມ່ນຕິດແໜ້ນກັບພາລະກິດປະຕິວັດຂອງພັກເຮົາ ເພື່ອສະແດງຄວາມອາໄລຮັກ, ຄວາມກະຕັນຍູຮູ້ບຸນຄຸນ ຢ່າງສຸດຊຶ້ງຕໍ່ຜົນງານ ແລະ ຄຸນງາມ ຄວາມດີອັນໃຫຍ່ຫຼວງ ຂອງປະທານ ໄກສອນ ພົມວິຫານ ຜູ້ນໍາພາກໍຕັ້ງ, ທະນຸບຳລຸງພັກປະຊາຊົນປະຕິວັດລາວ, ເປັນຜູ້ນໍາພາສ້າງຕັ້ງ ກຳລັງປະກອບອາວຸດປະຕິວັດຂອງປະຊາຊົນ, ນໍາພາ ຂະບວນການຕໍ່ສູ້ກູ້ຊາດ, ນໍາເອົາເອກະລາດ, ອິດສະຫຼະພາບມາສູ່ປະເທດຊາດ ກ້າວເຖິງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ແລະ ບູລະນະລະບອບປະຊາທິປະໄຕ ປະຊາຊົນ ເພື່ອສືບຕໍ່ກ້າວຂຶ້ນຕາມເສັ້ນທາງສັນຕິພາບ ເອກະລາດ ປະຊາທິປະໄຕ ເອກະພາບ ແລະ ວັດທະນະຖາວອນ. ສະຫາຍ ເລຂາພັກແຂວງ ຍັງໄດ້ຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຈົ່ງສາມັກຄີກັນເປັນປຶກແຜ່ນ, ພ້ອມກັນສືບທອດ ແລະ ເສີມຂະຫຍາຍພາລະກິດປະຕິວັດຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງພວກເຮົາໃຫ້ເຂົ້າສູ່ຊີວິດຕົວຈິງ. ວັນເວລາໄດ້ຜ່ານພົ້ນໄປ, ພາລະກິດປະຕິວັດຂອງພັກເຮົາ ກໍຄື ແນວທາງປ່ຽນແປງໃໝ່ ທີ່ປະທານ ໄກສອນ ພົມວິຫານ ໄດ້ລິເລີ່ມ ແລະ ນໍາພາມາແຕ່ຕົ້ນນັ້ນ ໄດ້ນໍາການປ່ຽນແປງ ໃໝ່ຢ່າງເລິກເຊິ່ງ, ຮອບດ້ານ ແລະ ນັບມື້ນັບເຂົ້າສູ່ລວງເລິກ, ປະເທດຊາດໄດ້ຮັບການ ພັດທະນາຢ່າງບໍ່ຢຸດຢັ້ງ. ໃນຈຸດເວລາຄືແນວນີ້, ພວກເຮົາຍິ່ງມີຄວາມຊາບຊຶ້ງໃຈໃນພາລະກຳອັນລໍ້າເລີດ ຂອງປະທານ ໄກສອນ ພົມວິຫານ ທີ່ໄດ້ປະໄວ້ໃຫ້ປະຊາຊົນລາວບັນດາເຜົ່າຂອງພວກເຮົາ ແລະ ພວກເຮົາຈະເດັດດ່ຽວໜຽວແໜ້ນ ສືບຕໍ່ສ້າງເປັນກຳລັງແຮງ ເພື່ອພັດທະນາຕໍ່ໆໄປ.
 |
ໃນໂອກາດດຽວກັນນີ້, ສະຫາຍ ອາລຸນໄຊ ສູນນະລາດ ໄດ້ໃຫ້ກຽດມອບຂອງຂວັນ ໃຫ້ອະດີດການນໍາ, ວິລະຊົນ ແລະ ມອບຫຼຽນລະນຶກ 50 ປີ ໃຫ້ນັກທຸລະກິດທີ່ມີຜົນງານດີເດັ່ນຕັ້ງໜ້າເຂົ້າໃນພາລະກິດປົກປັກຮັກກສາ ແລະ ສ້າງສາພັດທະນາປະເທດຊາດອີກດ້ວຍ.
( ຂ່າວ,ພາບ: ເກດສະໜາ)
ຄໍາເຫັນ