 |
ທ່ານ ບຸນລິດ ເທບບຸນສູງ ກໍາມະການພັກແຂວງ ເລຂາພັກເມືອງປາກຊ່ອງ ມີຄໍາເຫັນວ່າ: ເມືອງປາກຊ່ອງ ຖືກຂະໜານນາມວ່າ ເປັນເມືອງຜືນແຜ່ນດິນຄຳ ມີຈຸດທີ່ຕັ້ງອັນໂດດເດັ່ນ ເພາະວ່າຕັ້ງຢູ່ເທິງພູພຽງບໍລະເວນ ສູງກວ່າລະດັບໜ້ານໍ້າທະເລ ແຕ່ 600 – 1,400 ແມັດ, ຜ່ານມາ ຄະນະພັກ - ຄະນະກໍາມະການປົກຄອງເມືອງ ໄດ້ສຸມໃສ່ສ້າງເມືອງປາກຊ່ອງ ຕາມທິດ 6 ສ ຄື: ສະອາດ, ສີຂຽວ, ສວຍງາມ, ສະຫງົບ, ສະຫວ່າງ ແລະ ສີວິໄລ. ປີ 2026 ນີ້ ຈະສູ້ຊົນປູກໄມ້ໃນທົ່ວເມືອງໃຫ້ໄດ້ 257 ເຮັກຕາ, ຟື້ນຟູປ່າດ້ວຍທໍາມະຊາດ (ປູກເສີມກ້ອງປ່າ) ໃຫ້ໄດ້ 3 ພັນເຮັກຕາ, ຮອດປັດຈຸບັນ ຜະລິດເບັ້ຍໄມ້ ໄດ້ 423,100 ເບັ້ຍ, ລື່ນແຜນ 5.7 %, ມີປະເພດ ໄມ້ດູ່, ໄມ້ຂະຍຸງ, ກໍ່ແກ້ວ, ຈໍາປາປ່າ, ໄມ້ແປກ 3 ຍອຍ ແລະ ອື່ນໆ.ຂະບວນການປູກໄມ້ພາຍໃນເມືອງເລີ່ມແຕ່ 29 ພຶດສະພາທີ່ຜ່ານມາ ໂດຍປູກຢູ່ອະນຸສາວະລີ ທ່ານ ສີທົນ ກົມມະດໍາ, ປູກຕາມແຄມທາງ ໄລຍະທາງ 4 ພັນແມັດ, ປະເພດຕົ້ນໄມ້ແປກ 3 ຍອຍ ແລະ ຈະສືບຕໍ່ປູກອີກໃນຫຼາຍຈຸດ.
ທ່ານ ຄໍາ ນິລາວົງ ກໍາມະການພັກແຂວງ ຫົວໜ້າພະແນກກະສິກໍາ ແລະ ສິ່ງແວດລ້ອມແຂວງຈໍາປາສັກ ໄດ້ລາຍງານວ່າ: ການປູກໄມ້ບໍລິເວນຊາຍແດນຮ່ວມກັນ ລະຫວ່າງ ເມືອງປາກຊ່ອງ ແຂວງຈໍາປາສັກ ແລະ ເມືອງ ທ່າແຕງ ແຂວງເຊກອງ ເພື່ອສ້າງເຂດແດນສອງເມືອງແຫ່ງນີ້ ໃຫ້ກາຍເປັນເອກະລັກສະເພາະໃນອະນາຄົດ ໂດຍໄດ້ຮັບການສະໜັບສະໜູນເບັ້ຍໄມ້ແປກ ຈໍານວນ 15 ພັນເບັ້ຍ, ໃນນັ້ນ ບໍລິສັດ ປາລະມີການຂົນສົ່ງຂາເຂົ້າ - ຂາອອກ ຈຳກັດຜູ້ດຽວ ມອບເບ້ຍໄມ້ແປກ 5 ພັນເບ້ຍ ແລະ ໂຮງງານປຸງແຕ່ງມັນຕົ້ນ ຄູນມີໄຊ ຈຳກັດຜູ້ດຽວ ມອບເບ້ຍໄມ້ແປກ 10 ພັນເບ້ຍ ເຊິ່ງຈະປູກຕາມແຄມທາງຈາກຊາຍແດນເມືອງປາກຊ່ອງ ຫາ ຕົວເມືອງປາກຊ່ອງ ໄລຍະທາງແມ່ນ 11 ກິໂລແມັດ ແລະ ຈະສືບຕໍ່ຊອກເງື່ອນໄຂຈຸດທີ່ເໝາະສົມປູກຕື່ມອີກ ໂດຍຈະເນັ້ນໃສ່ຕາມແຄມທາງ. ນອກຈາກການປູກໄມ້ແລ້ວ, 2 ເມືອງຍັງຈະສ້າງໂຄງການກໍ່ສ້າງປະຕູເຂົ້າ - ອອກ ເມືອງຮ່ວມກັນ,ປັດຈຸບັນ ສໍາເລັດການອອກແບບ, ຢູ່ໃນຂັ້ນຕອນກະກຽມລົງມືກໍ່ສ້າງ ແລະ ກໍາລັງຄົ້ນຄວ້າທຸກວີທີທາງໃນການຊອກແຫຼ່ງທຶນເພື່ອມາສົມທົບກໍ່ສ້າງ.
 |
ທ່ານ ອາລຸນໄຊ ສູນນະລາດ ແລະ ທ່ານ ບຸນຫຼາຍ ບຸດທິ ໄດ້ຜັດປ່ຽນກັນມີຄໍາເຫັນ, ເນື້ອໃນສໍາຄັນ ໄດ້ຍົກໃຫ້ເຫັນຄວາມໝາຍສໍາຄັນຂອງພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ ກໍເພື່ອເປັນການປຸກລະດົມຂົນຂວາຍໃຫ້ທົ່ວປວງຊົນ ໂດຍສະເພາະແມ່ນປະຊາຊົນຢູ່ບໍລິເວນໃກ້ຄຽງ ເຂົ້າຮ່ວມໃນການຄຸ້ມຄອງ, ປົກປັກຮັກສາ ແລະພັດທະນາປ່າໄມ້, ສິ່ງແວດລ້ອມທໍາມະຊາດ ໃຫ້ມີຄວາມອຸດົມສົມບູນ, ຕາມທິດສີຂຽວ ແລະ ຍືນຍົງ ທັງເປັນການຮັດແໜ້ນສາຍພົວພັນມິດຕະພາບ ລະຫວ່າງ 2 ແຂວງ ຈໍາປາສັກ - ເຊກອງ ແລະ ເມືອງປາກຊ່ອງ - ເມືອງທ່າແຕງ.
ປ່າໄມ້ມີຄວາມສໍາຄັນທີ່ສຸດ ໃນການປົກປັກຮັກສາດິນ, ແຫຼ່ງນໍ້າ ແລະ ຊີວະນາໆພັນ ໃຫ້ມີຄວາມອຸດົມສົມບູນ, ປ້ອງກັນການປ່ຽນແປງດິນຟ້າອາກາດ ຊຶ່ງບົດບາດນີ້ ມະນຸດເຮົາບໍ່ສາມາດຈະເຮັດແທນໄດ້. ຍ້ອນແນວນັ້ນ, ຂໍຮຽກຮ້ອງໃຫ້ປະຊາຊົນ 2 ແຂວງ ກໍຄືຊາວເມືອງປາກຊ່ອງ ຈົ່ງເຊີດຊູສະຕິຮັກຊາດ, ຮັກສິ່ງແວດລ້ອມ ແລະ ຫວງແຫນປ່າໄມ້ ປະກອບສ່ວນຕາມເງື່ອນໄຂຄວາມສາມາດໃນການປູກໄມ້, ຟື້ນຟູປ່າ ໄປຄຽງຄູ່ກັບການຄຸ້ມຄອງ, ປົກປັກຮັກສາປ່າໄມ້ ອັນເປັນມໍລະດົກ ແລະ ຊັບສົມບັດຂອງວົງຄະນະຍາດແຫ່ງຊາດ ໃຫ້ນັບມື້ມີຄວາມອຸດົມສົມບູນ, ສ້າງໃຫ້ 2 ແຂວງ ຈໍາປາສັກ - ເຊກອງ ເຕັມໄປດ້ວຍພື້ນທີ່ສີຂຽວໃນອະນາຄົດ.
ໃນພິທີ, ຍັງໄດ້ມອບຂອງຂວັນໃຫ້ນ້ອງນ້ອຍນັກຮຽນ ເນື່ອງໃນໂອກາດວັນເດັກນ້ອຍສາກົນ ວັນທີ 1 ມິຖຸນາ 2026, ມອບໂດຍທ່ານ ພົນເອກ ວິໄລ ຫຼ້າຄໍາຟອງ, ທ່ານ ອາລຸນໄຊ ສູນນະລາດ, ທ່ານ ບຸນຫຼາຍ ບຸດທິ ແລະ ການນໍາ ພ້ອມດ້ວຍແຂກທີ່ເຂົ້າຮ່ວມງານ.
ຂ່າວ-ພາບ: ທູນທອງໃຈ
ຄໍາເຫັນ