 |
ໂອກາດນີ້, ທ່ານເຈົ້າແຂວງໄດ້ກ່າວສະແດງຄວາມຢື້ຢາມຖາມຂ່າວ, ນຳເອົາຄວາມເປັນຫ່ວງເປັນໃຍຂອງພັກ-ລັດມາຍັງພໍ່ແມ່ປະຊາຊົນເມືອງໝື່ນ, ພ້ອມນີ້ກໍໄດ້ຖືໂອກາດນີ້ ເຜີຍແຜ່ມູນເຊື້ອຂອງວັນສຳຄັນຕ່າງໆຂອງພັກ ຂອງຊາດ ຂອງແຂວງ ເປັນຕົ້ນແມ່ນ: ວັນສ້າງຕັ້ງແນວລາວສ້າງຊາດ ຄົບຮອບ 75 ປີ, ວັນສ້າງຕັ້ງແຂວງວຽງຈັນ ຄົບຮອບ 44 ປີ, ວັນສ້າງຕັ້ງສື່ມວນຊົນ ແລະ ພິມຈຳໜ່າຍ ຄົບຮອບ 75 ປີ, ວັນລັດຖະທຳມະນູນ ຄົບຮອບ 33 ປີ ແລະ ວັນອື່ນໆ. ຊຶ່ງທ່ານໄດ້ຍົກໃຫ້ເຫັນເຖິງຜົນງານຂອງບັນພະບຸລຸດ ໃນການຕໍ່ສູ້ກູ້ຊາດໃນປ່າງສົງຄາມຕ້ານຈັກກະພັດຜູ້ຮຸກຮານຢ່າງລະອິດລະອ້ຽວ, ເສຍເລືອດເນື້ອ, ເສຍສະຫຼະຊີວິດຂອງຜູ້ກ້າເປັນຈຳນວນຫຼາຍ ຈິ່ງສາມາດນຳເອົາສັນຕິພາບ ເອກະລາດ ແລະ ຄວາມສະຫງົບສຸກ ມາສູ່ລູກຫຼານໃຫ້ໄດ້ກິນດີຢູ່ດີໃນທຸກວັນນີ້. ສະນັ້ນ, ຈິ່ງໄດ້ມີການຫວນຄືນມູນເຊື້ອຂອງບັນພະບູລຸດໃນວັນສຳຄັນຕ່າງໆ ເພື່ອໃຫ້ຄົນຮຸ້ນລູກຮຸ້ນຫຼານໄດ້ຮັບຮູ້ເຂົ້າໃຈ ແລະ ຈົດຈຳບຸນຄຸນຂອງພວກທ່ານເຫຼົ່ານັ້ນຕະຫຼອດໄປ. ຕັ້ງໜ້າຝຶກຝົນຫຼ່ໍຫຼອມຕົນເອງໃຫ້ກາຍເປັນລູກຫຼານທີ່ດີ ເປັນຜູ້ສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຮຸ່ງເຮືອງຕໍ່ໄປ.
 |
ທ່ານເຈົ້າແຂວງ ຍັງໄດ້ເນັ້ນໃຫ້ພໍ່ແມ່ປະຊາຊົນ ສຸມໃສ່ການປູກ-ການລ້ຽງໃຫ້ຫຼາຍຂຶ້ນ ເພື່ອຄ້ຳປະກັນດ້ານສະບຽງອາຫານພາຍໃນເມືອງໃຫ້ກຸ້ມກິນ ແລະ ຜະລິດໃຫ້ຫຼາຍໃຫ້ກາຍເປັນສິນຄ້າສົ່ງອອກສ້າງລາຍຮັບໃຫ້ຄອບຄົວ, ນອກນີ້ ໃຫ້ເອົາໃຈໃສ່ຊຸກຍູ້ສົ່ງເສີມວຽກງານຫັດຖະກຳຈັກສານ ແລະ ການບໍລິການ-ຄ້າຂາຍເພື່ອສ້າງໃຫ້ທຸກຄົນ ທຸກຄອບຄົວມີອາຊີບ ສ້າງລາຍຮັບໃຫ້ແກ່ຄອບຄົວໃຫ້ມີຢູ່ມີກິນ; ປັບປຸງກຳລັງຫຼວງ ປກສ-ປກຊ, ປັບປຸງກຳລັງກອງຫຼອນບ້ານໃຫ້ມີຄວາມເຂັ້ມແຂງ, ເພີ່ມທະວີເອົາໃຈໃສ່ ການກວດກາສາລະເວ ສະພາບການພາຍໃນບ້ານ, ເມືອງໃຫ້ມີຄວາມສະຫງົບສຸກ, ປັບປຸງກົດລະບຽບຂອງບ້ານໃຫ້ມີຄວາມສັກສິດ ແລະ ເຂັ້ມງວດ, ຕີຕ້ານທຸກປະກົດການຫຍໍ້ທໍ້ທີ່ເກີດຂຶ້ນຢູ່ພາຍໃນເມືອງໃຫ້ຫຼຸດໜ້ອຍຖ້ອຍລົງເທື່ອລະກ້າວ, ສືບຕໍ່ສຶກສາອົບລູກຫຼານຂອງຕົນໃຫ້ກາຍເປັນຄົນຮູ້ຜູ້ດີຂອງຄອບຄົວ ເປັນຜູ້ສືບທອດທີ່ຂອງຊາດໃນຕໍ່ໜ້າ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ