ເຈົ້າແຂວງໄຊຍະບູລີ ຕ້ອນຮັບ ຮອງປະທານສະພາແຫ່ງຊາດ

ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ຕ້ອນຮັບ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ພ້ອມຄະນະ ໃນວັນທີ 18 ທັນວານີ້, ທີ່ຫ້ອງວ່າການແຂວງໄຊຍະບູລີ ໃນໂອກາດມາຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ; ທ່ານ ສົມມາດ ພົນເສນາ ໄດ້ແຈ້ງຈຸດປະສົງທີ່ມາຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ ເປັນຕົ້ນແມ່ນ ເຂົ້າຮ່ວມກອງປະຊຸມກັບສະພາປະຊາຊົນແຂວງ ແລະ ບັນດາພະແນກການທີ່ກ່ຽວຂ້ອງຂອງແຂວງ ເພື່ອຮັບຟັງການລາຍງານກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດສັນງົບປະມານໂຄງການລົງທຶນຂອງລັດ, ການຈັດຕັ້ງປະຕິບັດແຜນງົບປະມານແຫ່ງລັດ ແລະ ການແກ້ໄຂໜີ້ສິນຂອງແຂວງ, ສະພາບການອອກໃບຕາດິນ, ການຄຸ້ມຄອງໂຄງການຂຸດຄົ້ນແຮ່ທາດ, ການຄຸ້ມຄອງໂຄງການຕ້ານຕາຝັ່ງເຈື່ອນ, ການສົ່ງເສີມ ແລະ ພັດທະນາໂຮງຮຽນວິຊາຊີບ ແລະ ໂຮງຮຽນມັດທະຍົມສົມບູນຊົນເຜົ່າ, ພ້ອມດຽວກັນ ກໍໄດ້ລາຍງານຕໍ່ເຈົ້າແຂວງກ່ຽວກັບແຜນການເຄື່ອນໄຫວຢູ່ບັນດາເມືອງຂອງແຂວງໄຊຍະບູລີຕື່ມອີກ.
ໂອກາດດັ່ງກ່າວ, ທ່ານ ພົງສະຫວັນ ສິດທະວົງ ໄດ້ສະແດງຄວາມຕ້ອນຮັບ ພ້ອມທັງລາຍງານສະພາບການພັດທະນາເສດຖະກິດຂອງແຂວງ ວ່າ: ຈີດີພີ ຂອງແຂວງໄຊຍະບູລີ ເຕີບໂຕໃນລະດັບ 5%, ສ້າງມູນຄ່າເພີ່ມໄດ້ 14.693 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 2.081 ໂດລາ ເທົ່າກັບ 35.38 ລ້ານກີບ, ຮອດປັດຈຸບັນເກັບລາຍຮັບໄດ້ 1.500 ຕື້ກວ່າກີບ, ເກີນແຜນ 8%, ສິນຄ້າສົ່ງອອກ 80 ລ້ານກວ່າໂດລາ, ນໍາເຂົ້າ 50 ລ້ານກວ່າໂດລາ, ການລົງທຶນຕ່າງໆໂດຍລວມແລ້ວແມ່ນໄດ້ຮັບການຈັດຕັ້ງປະຕິບັດຕາມແຜນການ ແລະ ສອດຄ່ອງຕາມລະບຽບກົດໝາຍ, ນອກນີ້, ຍັງມີທຶນຂອງສູນກາງທີ່ມາຈັດຕັ້ງປະຕິບັດຢູ່ແຂວງ ແລະ ທຶນຊ່ວຍເຫຼືອລ້າຈໍານວນໜຶ່ງ, ພ້ອມທັງພື້ນຖານໂຄງລ່າງກໍໄດ້ຮັບການພັດທະນາເປັນກ້າວໆ.
(ຂ່າວ-ພາບ: ອຸ່ນເຮືອນ ໂພທິລັກຂ.ໄຊຍະບູລີ)