 |
ການຫົດສົງພະເຈົ້າແຖ່ນຄໍາເຫຼືອງຈະໄດ້ດຳເນີນໄປເປັນເວລາ 7 ວັນ ເລີ່ມແຕ່ວັນທີ 2-8 ເມສາ 2026 ຈຶ່ງຈະມີພິທີອັນເຊີນພະເຈົ້າແຖ່ນຄໍາເຫຼືອງຂຶ້ນປະດິດສະຖານໄວ້ໃນອົງພະທາດໂຜ່ນຕາມເດີມ. ພາຍໃນມີພະອາຈານ ສອນເພັດ ໂງ່ນລາຊະສິງ ເຈົ້າອະທິການວັດພະທາດໂຜ່ນ, ພາຍນອກມີ ທ່ານ ພົມມາ ສົງວິໄລ ປະທານຄະນະກໍາມະການປົກຄອງເມືອງ ພ້ອມຄະນະນໍາຂອງເມືອງ ແລະ ອອກຕົນຍາດໂຍມທີ່ເປັນລູກເຜິງຫຼານທຽນກໍໄດ້ເຂົ້າຮ່ວມຈໍານວນຫຼາຍ. ຈາກນັ້ນ, ພະເຖລະ ໄດ້ນຳພາຊາວພຸດທະສາຊະນິກະຊົນ ກ່າວຄຳຄາລະວະແດ່ພະເຈົ້າແຖ່ນຄໍາເຫຼືອງ ແລະ ຊາວພຸດທະສາຊະນິກະຊົນ ຈິ່ງໄດ້ດຳເນີນການຫົດສົງພະຢ່າງເປັນທາງການ.
 |
ພິທີອັນເຊີນພະເຈົ້າແຖ່ນຄໍາເຫຼືອງ ເລີ່ມຕົ້ນດ້ວຍການທໍາພິທີທາງສາສະໜາ ໂດຍພະເຖລານຸເຖລະ ໄດ້ນຳພາຊາວພຸດທະສາຊະນິກະຊົນ ກ່າວຄຳອາລາດຖະນາພະເຈົ້າແຖ່ນຄໍາເຫຼືອງ ເຄື່ອນຍ້າຍ ໄປປະດິດສະຖານຢູ່ບ່ອນທີ່ຈັດສັນໄວ້. ເພື່ອໃຫ້ປະຊາຊົນ, ນັກທ່ອວທ່ຽວພາຍໃນ ແລະ ຕ່າງປະເທດ ໄດ້ຫົດສົງ.
 |
ໃນປີໜຶ່ງແມ່ນຈະໄດ້ອັນເຊີນພະເຈົ້າແຖ່ນຄໍາເຫຼືອງ ລົງມາຄາລະວະ 2 ຄັ້ງຄື: ມື້ຂຶ້ນ 3 ຄໍ່າເດືອນ 3 ເພັງ ແລະ ມືີຂຶ້ນ 15 ຄໍ່າ ເດືອນ 5 ເພັງ ຂອງທຸກໆປີ ທາງເມືອງແມ່ນຈະໄດ້ນິມົນພະເຈົ້າແຖ່ນຄໍາເຫຼືອງ ພ້ອມດ້ວຍພະທີ່ເກົ່າແກ່ນ້ອຍ-ໃຫຍ່ຈໍານວນຫຼາຍ ໄດ້ນໍາອອກມາບູຊາຫົດສົງ ເພື່ອຂໍພອນໃຫ້ມີຄວາມຢູ່ເຢັນເປັນສຸກ, ທັງເປັນການຮັກສາຮີດຄອງປະເພນີ ແລະ ຮັກສາມູນເຊື້ອ, ວັດທະນະທຳ ອັນດີງາມຂອງຊາດລາວ ທີ່ເຄີຍປະຕິບັດກັນມາແຕ່ບູຮານ ເປັນຕົ້ນແມ່ນປະຕິບັດຕາມຮີດ 12 ຄອງ 14. ໂດຍຕິດພັນກັບກິດຈະກໍາບຸນປີໃໝ່ຂອງຊາວລາວ, ທີ່ສໍາຄັນຍັງເປັນການສົ່ງເສີມປະເພນີ ອັນເກົ່າແກ່ຂອງຊາວເມືອງໄຊພູທອງ ທີ່ປະຕິບັດກັນມາ ດຶງດູດເອົາການທ່ອງທ່ຽວຫຼາຍຂຶ້ນ ແລະ ເປັນການອະນຸລັກ ປົກປັກຮັກສາ ມໍລະດົກດ້ານວັດທະນະທໍາ ທີ່ເກົ່າແກ່ຂອງຊາດລາວເຮົາ ໃຫ້ຄູ່ກັບຊາວເມືອງໄຊພູທອງ ຊົ່ວກາຣະນານ.
(ຂ່າວ-ພາບ: ພັນທະມິດ ວົງສຸທິ)
ຄໍາເຫັນ