ເຈົ້າໜ້າທີ່ ຈັບຕົວກຸ່ມສໍ້ໂກງຊັບທາງອອນລາຍ 

ເມື່ອບໍ່ດົນມານີ້,ກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄໍາ, ກົມຕໍາຫຼວດສືບສວນ-ສອບສວນ ກົມໃຫຍ່ຕໍາຫຼວດ,ເຈົ້າໜ້າທີ່ຕໍາຫຼວດ ສປ ຈີນ,ກອງບັນຊາການ ປກສ ແຂວງ ບໍ່ແກ້ວ, ກອງບັນຊາການທະຫານ ເມືອງຕົ້ນເຜິ້ງ, ໜ່ວຍຮັກສາຄວາມປອດໄພ ເຂດເສດຖະກິດພິເສດສາມຫຼ່ຽມຄຳ ໄດ້ສົມທົບກຳລັງເຂົ້າຈັບຕົວກຸ່ມສໍ້ໂກງຊັບທາງອອນລາຍ (Call Center) ຢູ່ພາຍໃນເຂດເສດຖະກິດພິເສດສາມຫຼ່ຽມຄໍາ ແລະ ຢູ່ເມືອງຕົ້ນເຜິ້ງ, ແຂວງບໍ່ແກ້ວ ຊຶ່ງຈັບຕົວໄດ້ທັງໝົດ 462 ຄົນ.
    ທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດພິເສດສາມຫຼ່ຽມຄຳ ໃຫ້ຮູ້ວ່າ: ໂດຍປະຕິບັດຕາມ ກົດໝາຍວ່າດ້ວຍການດໍາເນີນຄະດີອາຍາ ສະບັັບປັບປຸງ ປີ 2017 ມາດຕາ 53, 54ແລະ ອີງຕາມ ສັນຍາຮ່ວມມື 2 ກະຊວງປ້ອງກັນຄວາມສະຫງົບ ລາວ-ຈີນ ປະຈໍາປີ 2023 ແລະ ທິດຊີ້ນຳຂອງຂັ້ນເທິງ; ເພື່ອຮັບປະກັນໃຫ້ສັງຄົມ ກໍຄືພາຍໃນເຂດເສດຖະກິດພິເສດສາມຫຼ່ຽມຄຳ  ມີຄວາມສະຫງົບ ມີຄວາມເປັນລະບຽບຮຽບຮ້ອຍ ແລະ ການດຳເນີນທຸລະກິດໃຫ້ຖືກຕ້ອງຕາມກົດໝາຍ; ດັ່ງນັ້ນ, ເຈົ້າໜ້າທີ່ຈຶ່ງໄດ້ລົງເກັບກຳຂໍ້ມູນ ແລະ ແກ້ໄຂກຸ່ມສໍ້ໂກງຊັບທາງອອນລາຍ (Call Center) ຢູ່ພາຍໃນເຂດເສດຖະກິດພິເສດສາມຫຼຽມຄໍາ ແລະ ຢູ່ເມືອງຕົ້ນເຜິ້ງແຂວງບໍ່ແກ້ວ ຜ່ານການລົງແກ້ໄຂ ໃນພື້ນທີ່ 7 ຈຸດ ສາມາດຈັບຕົວໄດ້ຈຳນວນ 462 ຄົນຍິງ 41 ຄົນ, ພ້ອມດ້ວຍເຄື່ອງຂອງກາງ; ລົດໃຫຍ່ ຈໍານວນ 5 ຄັນ, ໂທລະສັບມືຖື 12 ແກັດ, ຄອມພີວເຕີ16 ແກັດ. ຈາກນັ້ນ, ໃນວັນທີ 29 ພະຈິກ 2023 ກໍໄດ້ມີພິທີ ມອບ-ຮັບ ຄົນສັນຊາດຈີນຈໍານວນດັ່ງກ່າວ ພ້ອມເຄື່ອງຂອງກາງໃຫ້ເຈົ້າໜ້າທີ່ຝ່າຍຈີນຢູ່ຊາຍແດນລາວ-ຈີນ ດ່ານບໍ່ເຕ່ນ-ບໍ່ຫານ ເພື່ອໄປດຳເນີນຄະດີຕາມກົດໝາຍ.
    ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ ກ່າວຕື່ມອີກວ່າ: ໃນໄລຍະຜ່ານມາ ພວກເຮົາໄດ້ເອົາໃຈໃສ່ຢ່າງສຸດຄວາມສາມາດໃນການຕິດຕາມ, ກວດກາ, ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ຕ່າງໆ ຊຶ່ງມີຄະດີເກີດຂຶ້ນ ທັງໝົດ 191 ເລື່ອງ, ແກ້ໄຂແລ້ວມີ 58 ເລື່ອງ; ມາເຖິງປັດຈຸບັນນີ້ ສະພາບຢູ່ພາຍໃນເຂດເສດຖະກິດພິເສດສາມຫຼ່ຽມຄຳ ແມ່ນມີຄວາມສະຫງົບໂດຍພື້ນຖານ ແລະ ໃນອະນາຄົດພວກເຮົາຍັງຈະສືບຕໍ່ເອົາໃຈໃສ່ໂຄສະນາເຜີຍແຜ່ກົດໝາຍໃຫ້ປະຊາຊົນ ກໍຄືຜູ້ປະກອບການທຸລະກິດ, ນັກທ່ອງທ່ຽວ ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ ພ້ອມທັງເຂັ້ມງວດໃນການສະກັດກັ້ນ-ແກ້ໄຂ ປະກົດການຫຍໍ້ທໍ້ຢູ່ໃນເຂດເສດຖະກິດພິເສດສາມຫຼ່ຽມຄຳໃຫ້ຫຼຸດລົງເທື່ອລະກ້າວ. 
ຂ່າວ-ພາບ: ພັຕ ຄຳແສງ ປັນຍາ