ພິທີລົງນາມດັ່ງກ່າວ ແມ່ນການເປັນເຈົ້າພາບຮ່ວມ ລະຫວ່າງ ສສ ຫວຽດນາມ ແລະ ອົງການສະຫະປະຊາຊາດ, ໂດຍການເປັນປະທານຂອງ ພະນະທ່ານ ເລືອງ ເກືອງ ປະທານປະເທດ ເເຫ່ງ ສສ ຫວຽດນາມ ແລະ ທ່ານ ອັນໂຕນີໂອ ກູເຕີເຣສ (Antonio Guterres) ເລຂາທິການໃຫຍ່ ອົງການສະຫະປະຊາຊາດ ຊຶ່ງ ທ່ານ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ຈະໄດ້ຕາງໜ້າໃຫ້ລັດຖະບານ ສປປ ລາວ ລົງນາມສົນທິສັນຍາດັ່ງກ່າວ ຊຶ່ງເປັນການສະແດງໃຫ້ເຫັນເຖິງຄວາມເອົາໃຈໃສ່ ແລະ ຄວາມຕັ້ງໜ້າຂອງ ສປປ ລາວ ໃນວຽກງານການສະກັດກັ້ນ ແລະ ຕ້ານອາຊະຍາກຳທາງໄຊເບີ. ສົນທິສັນຍາວ່າດ້ວຍການຕ້ານອາຊະຍາກຳທາງໄຊເບີນີ້ ໄດ້ລິເລີ່ມຂຶ້ນໂດຍການເຈລະຈາສ້າງຮ່າງສົນທິສັນຍາແຕ່ປີ 2021 ເປັນຕົ້ນມາ, ຊຶ່ງວົງຄະນະຍາດສາກົນໄດ້ຮ່ວມກັນປະກອບສ່ວນ ປະກອບຄຳຄິດເຫັນ ແລະ ເຫັນດີຕໍ່ຮ່າງສະບັບສຸດທ້າຍ ໃນນີ້ລວມເຖິງ ສປປ ລາວ.
ຄໍາເຫັນ