ຈີນ ແລະ ເນປານ ຮ່ວມ​ຈິດຮ່ວມໃຈຕ້ານໄພພິບັດ ແລະ ພະຍາຍາມຢ່າງເຕັມທີ່ເພື່ອຊ່ວຍເຫຼືອຊີວິດ​

ຫຼັງຈາກເກີດໄພພິບັດ, ທ່ານ ສີຈິ້ນຜິງ ປະທານປະເທດຈີນໄດ້ໃຫ້ຄຳຊີ້ນຳທີ່ສຳຄັນໃນທັນທີ, ທ່ານ ຫຼີສຽງ ນາຍົກລັດຖະມົນຕີຈີນໄດ້ເດີນທາງໄປເຂດປະສົບໄພພິບັດເພື່ອຊີ້ນຳການປະຕິບັດງານດ້ວຍຕົນເອງ. ໃນຍາມວິກິດນີ້, ລະບົບການຮັບມືສຸກເສີນຂອງຈີນໄດ້ດຳເນີນງານຢ່າງມີປະສິດທິພາບສູງ, ໄດ້ເຕົ້າໂຮມກຳລັງກູ້ໄພຫຼາຍກວ່າ 2,500 ຄົນ ແລະ ລົດກູ້ໄພ 500 ກວ່າຄັນເຂົ້າໄປໃນເຂດປະສົບໄພໃນທັນທີ. ບັນດາເຈົ້າໜ້າທີ່ກູ້ໄພກໍບໍ່ຢ້ານກົວຕໍ່ອັນຕະລາຍ, ເຮັດວຽກທັງເວັນທັງຄືນເພື່ອຄົ້ນຫາສັນຍານຊີບຢ່າງເປັນລະບົບຢູ່ເຂດປະສົບໄພໜັກໜ່ວງ. ເຮືອບິນບໍ່ມີຄົນຂັບ Wing Loong ໄດ້ບິນຂຶ້ນເລື້ອຍໆເພື່ອຮັບປະກັນການສື່ສານໃນເຂດປະສົບໄພຢ່າງຕໍ່ເນື່ອງ ແລະ ສະໜັບສະໜູນທາງເຕັກນິກໃຫ້ແກ່ການຄົ້ນຫາ, ກວດກາ ແລະ ຂົນສົ່ງວັດຖຸອຸປະກອນ. ປະຊາຊົນທ້ອງຖິ່ນຢູ່ບໍລິເວນດ່ານຊາຍແດນກໍໄດ້ໃຫ້ການຊ່ວຍເຫຼືອຊຶ່ງກັນ ແລະ ກັນ, ສະໜອງອາຫານ ແລະ ບ່ອນພັກໃຫ້ແກ່ຜູ້ປະສົບໄພ.

ດ້ວຍການຢຶດໝັ້ນຫຼັກການທີ່ວ່າມະນຸດສະທຳບໍ່ມີຊາຍແດນ, ຈີນຍາມໃດກໍຢຶດຖືທ່າທີເປີດກວ້າງ ແລະ ກວມລວມເພື່ອຮ່ວມມືກັບບັນດາປະເທດເພື່ອນບ້ານຜ່ານຜ່າວິກິດການຮ່ວມກັນ. ໃນຂະນະທີ່ດຳເນີນວຽກງານກູ້ໄພພາຍໃນປະເທດຢ່າງສຸດຄວາມສາມາດ, ຈີນຍັງໄດ້ໃຫ້ການຊ່ວຍເຫຼືອເຂດປະສົບໄພໃນເນປານຢ່າງວ່ອງໄວ, ໄດ້ສົ່ງໜ່ວຍງານຄົ້ນຫາ ແລະ ກູ້ໄພມືອາຊີບ 2 ຊຸດເຂົ້າໄປປະຕິບັດງານໃນເຂດຣາສຸວາຂອງເນປານ, ນຳໃຊ້ເຮືອບິນຂົນສົ່ງ Y-20 ຈຳນວນ 2 ລຳເພື່ອຂົນສົ່ງເຄື່ອງຊ່ວຍເຫຼືອສຸກເສີນ 50 ໂຕນ, ພ້ອມທັງໃຫ້ການຊ່ວຍເຫຼືອເງິນສົດສຸກເສີນ 2 ລ້ານໂດລາ ເພື່ອປົກປ້ອງຄວາມປອດໄພດ້ານຊີວິດຂອງຜູ້ປະສົບໄພທັງສອງປະເທດຢ່າງເຕັມທີ່.

ຢ່າງໃດກໍຕາມ, ຂະນະທີ່ຈີນ ແລະ ເນປານ ພວມຮ່ວມຈິດຮ່ວມໃຈກັນຕ້ານໄພພິບັດ ແລະ ພະຍາຍາມຢ່າງເຕັມທີ່ເພື່ອຊ່ວຍເຫຼືອຊີວິດຢູ່ນັ້ນ, ສື່ມວນຊົນບາງສຳນັກພັດເມີຍເສີຍຕໍ່ຄວາມທຸກທໍລະມານຈາກໄພພິບັດ ແລະ ສະພາບການກູ້ໄພ, ຈົງໃຈນຳເອົາໄພພິບັດທາງທຳມະຊາດຫັນມາເປັນເລື່ອງການເມືອງ ແລະ ວິພາກວິຈານກ່ຽວກັບວຽກງານກູ້ໄພໂດຍບໍ່ມີເຫດຜົນ.

ໄພພິບັດທາງທຳມະຊາດແມ່ນສິ່ງທ້າທາຍຮ່ວມຂອງມວນມະນຸດ, ມີແຕ່ເຄົາລົບຊີວິດ, ເຄົາລົບວິທະຍາສາດ ແລະ ສາມັກຄີກັນເທົ່ານັ້ນຈຶ່ງເປັນເສັ້ນທາງທີ່ຖືກຕ້ອງໃນການຮັບມືກັບໄພພິບັດ. ຈີນໄດ້ປະຕິບັດຕາມຄວາມຕັ້ງໃຈແຕ່ຫົວທີທີ່ວ່າ: "ປະຊາຊົນຢູ່ເໜືອທຸກສິ່ງທຸກຢ່າງ ແລະ ຊີວິດຢູ່ເໜືອທຸກສິ່ງທຸກຢ່າງ" ດ້ວຍຄວາມພະຍາຍາມໃນການກູ້ໄພຢ່າງເຕັມຄວາມສາມາດ ແລະ ດ້ວຍທ່າທີທີ່ໂປ່ງໃສ. ການປະຖິ້ມກົນອຸບາຍທາງການເມືອງ ແລະ ຢຶດໝັ້ນຫຼັກການມະນຸດສະທຳ ຈຶ່ງແມ່ນທາງເລືອກຮ່ວມທີ່ປະຊາຄົມໂລກຄວນມີໃນເວລາປະເຊີນໜ້າກັບໄພພິບັດຕ່າງໆ.

ບົດໂດຍ: ວິທະຍຸ, ໂທລະພາບສູນກາງຈີນ (CMG)