ແລະ ແຂວງບໍລິຄໍາໄຊ, ທິດຕາເວັນຕົກຕິດກັບແຂວງໄຊຍະບູລີ; ແຂວງວຽງຈັນ ຍັງມີຊາຍແດນຕິດກັບຈັງຫວັດເລີຍ ຣາຊະອານາຈັກໄທ ຢູ່ທາງທິດຕາເວັນອອກສ່ຽງໃຕ້ ຊຶ່ງມີແມ່ນໍ້າຂອງເປັນຊາຍແດນຮ່ວມກັນ ມີລວງຍາວທັງໝົດ 97 ກິໂລແມັດ; ແຂວງວຽງຈັນ, ເປັນຕັ້ງຍຸດທະສາດທີ່ສຳຄັນ ເປັນຈຸດເຊື່ອມໂຍງ-ເຊື່ອມຈອດ ການບໍລິການຂົນສົ່ງ ໂດຍສະເພາະມີດ່ານສາກົນບ້ານວັງ ທີ່ເປັນທີ່ຕັ້ງຍຸດທະສາດ ຊຸກຍູ້ການພັດທະນາເສດຖະກິດ-ສັງຄົມຂອງບັນດາເມືອງ, ແຂວງວຽງຈັນ ແລະ ຂອງປະເທດໂດຍລວມ.
ດ່ານສາກົນບ້ານວັງ ເມືອງໝື່ນ ແຂວງວຽງຈັນ ຕັ້ງຢູ່ຈຸດຜ່ານລະຫວ່າງເສັ້ນທາງເລກທີ11 ຈາກນະຄອນຫຼວງວຽງຈັນໄປລຽບຕາມເສັ້ນທາງແຄມຂອງ ຜ່ານເມືອງສີໂຄດຕະບອງ, ເມືອງສັງທອງ ແລະ ເສັ້ນທາງຫຼວງຂອງແຂວງວຽງຈັນ ເລກທີ 4510 ຫ່າງຈາກນະຄອນຫຼວງວຽງຈັນ ປະມານ 99 ກິໂລແມັດຊຶ່ງດ່ານດັ່ງກ່າວມີທ່າເຮືອບັກ ແລະ ການບໍລິການເຮືອບັກທີ່ສາມາດຂົນສົ່ງສິນຄ້າ, ລົດບັນທຸກຂົນສົ່ງ ແລະ ລົດໂດຍສານຂອງ 2 ປະເທດ ລາວ ແລະ ໄທ; ດ່ານສາກົນບ້ານວັງ ແມ່ນຢູ່ກົງກັນຂ້າມກັບບ້ານຄົກໄຜ່ ຕໍາບົນປາກຊົມ ອຳເພີປາກຊົມຂອງຈັງຫວັດເລີຍ ຊຶ່ງເປັນຈຸດຍຸດທະສາດທີ່ສອດຄ່ອງກັບແຜນແມ່ບົດການພັດທະນາທີ່ເປັນປັດໄຈສຳຄັນ, ເປັນພື້ນຖານ ແລະ ກຳລັງດັນໃຫ້ແກ່ການພັດທະນາເສດຖະກິດ-ສັງຄົມ. ການຍົກລະດັບດ່ານບ້ານວັງ ຈາກດ່ານທ້ອງຖິ່ນມາເປັນດ່ານສາກົນ ເປັນທາງເລືອກໃນການຕອບສະໜອງແກ່ການບໍລິການຜູ້ໂດຍສານທາງບົກຈາກຈັງຫວັດເລີຍ ຣາຊະອານາຈັກໄທ ທີ່ຕ້ອງການໄປຍັງນະຄອນຫຼວງວຽງຈັນ ຫຼື ຜ່ານໄປຍັງບັນດາແຂວງພາກເໜືອ ແລະ ພາກຕາເວັນອອກຂອງ ສປປ ລາວ.
ໃນເມື່ອກ່ອນ, ການເດີນທາງ ທາງບົກ ຈາກຈັງຫວັດເລີຍ ມານະຄອນຫຼວງວຽງຈັນ ຫຼື ຜ່ານໄປຍັງບັນດາແຂວງຕ່າງໆ ລ້ວນແຕ່ໃຊ້ເສັ້ນທາງຜ່ານທາງຂົວມິດຕະພາບລາວ-ໄທແຫ່ງທີ1ເຮັດໃຫ້ດ່ານຂົວມິດຕະພາບທີ1ມີຄວາມແອອັດສົ່ງຜົນໃຫ້ການບໍລິການຂົນສົ່ງເລີ່ມມີຄວາມຊັກຊ້າ. ສະນັ້ນ, ໄດ້ມີປະຊາຊົນຊາວໄທແລະຊາວຕ່າງປະເທດ, ບໍລິສັດສັດທີ່ຂົນສົ່ງສິນຄ້າເຂົ້າ-ອອກສປປລາວໄດ້ຊອກຫາທາງເລືອກນໍາເຂົ້າໃໝ່ທີ່ສະດວກແລະມີຄ່າສິ້ນເປືອງຕໍ່າກວ່າ. ທາງເລືອກທີ 1, ແມ່ນເອົາເຂົ້າທາງດ່ານສາກົນປາກຊັນແຂວງບໍລິຄໍາໄຊແຕ່ອີງໃສ່ໄລຍະທາງຈາກປາກຊັນເຖິງນະຄອນຫຼວງວຽງຈັນແມ່ນປະມານ158 ກິໂລແມັດບວກກັບເສັ້ນທາງເລກ13ໃຕ້ຂອງສປປລາວທີ່ຍັງບໍ່ທັນສະດວກເພາະມີການສັນຈອນໄປມາຂອງຜູ້ໂດຍສານທົ່ວໄປເປັນຈໍານວນຫຼາຍເຮັດໃຫ້ການຂົນສົ່ງສິນຄ້າມີຄວາມຫຍຸ້ງຍາກຊຶ່ງສ່ວນໃຫຍ່ກໍຍັງຈໍາກັດເວລາເດີນທາງເພື່ອຮັບປະກັນຄວາມປອດໄພ. ທາງເລືອກທີ2, ແມ່ນເຂົ້າ-ອອກຜ່ານດ່ານບ້ານນາກະເຊັງເມືອງແກ່ນທ້າວແຂວງໄຊຍະບູລີ ແຕ່ຍັງຕ້ອງໄດ້ໃຊ້ເສັ້ນທາງຜ່ານບ້ານຄົກເຂົ້າດໍເມືອງຊະນະຄາມ ແຂວງວຽງຈັນ ຜ່ານມາທາງດ່ານບ້ານວັງເຂົ້າເມືອງສັງທອງໄປຍັງນະຄອນຫຼວງວຽງຈັນລວມໄລຍະທາງປະມານ249ກິໂລແມັດແຕ່ຫຼາຍບໍລິສັດກໍຍັງເລືອກຂົນສົ່ງເສັ້ນທາງນີ້ຂຶ້ນກັບໄລຍະທາງເບື້ອງຝັ່ງຣາຊະອານາຈັກໄທ.
ການຂົນສົ່ງເຂົ້າ-ອອກຜ່ານດ່ານບ້ານວັງຈຶ່ງແມ່ນທາງເລືອກທີ່ຫຼາຍບໍລິສັດຂົນສົ່ງມີຄວາມຮຽກຮ້ອງຕ້ອງການເພື່ອເຮັດໃຫ້ຄ່າສິ້ນເປືອງຫຼຸດລົງເນື່ອງຈາກໄລຍະທາງແຕ່ຈຸດດ່ານບ້ານວັງໄປຫານະຄອນຫຼວງວຽງຈັນເມື່ອສົມທຽບກັບເສັ້ນທາງອື່ນແມ່ນສັ້ນກວ່າ. ດັ່ງນັ້ນ,ຫຼາຍບໍລິສັດໃຫ້ບໍລິການຂົນສົ່ງສິນຄ້າເຂົ້າ-ອອກຈຶ່ງໄດ້ສະເໜີຂໍນໍາໃຊ້ເສັ້ນທາງຜ່ານດ່ານບ້ານວັງໂດຍສະເພາະແມ່ນການຂົນສົ່ງແຮ່ທາດ, ນໍ້າມັນເຊື້ອໄຟແລະສິນຄ້າອື່ນໆ.
ຈຸດທີ່ຕັ້ງຂອງດ່ານບ້ານວັງແມ່ນຈຸດຍຸດທະສາດດ້ານພູມສັນຖານທີ່ມີຄວາມສໍາຄັນຕໍ່ການເຊື່ອມໂຍງດ້ານເສດຖະກິດຂອງພາກພື້ນ ໂດຍສະເພາະການເຊື່ອມໂຍງເຂດນິຄົມອຸດສາຫະກໍາ ແລະ ເຂດເສດຖະກິດທາງພາກເໜືອ ແລະ ຕາເວັນອອກສ່ຽງເໜືອຂອງຣາຊະອານາຈັກໄທຄື: ເຂດເສດຖະກິດພິເສດຊຽງລາຍ, ເຂດອຸດສາຫະກໍາລໍາພັນ 1 ແລະ 2, ເຂດຣາຊະທານີແຫ່ງປະເທດໄທ, ເຂດເສດຖະກິດພິເສດໜອງຄາຍ, ເຂດນິຄົມອຸດສາຫະກໍາພາກເໜືອແຫ່ງຣາຊະອານາຈັກໄທ ແລະ ອື່ນໆ ເຊື່ອມໂຍງກັບແລວເສດຖະກິດລາວ-ຈີນຄື: ເສັ້ນທາງລົດໄຟ ລາວ-ຈີນ ແລະ ເສັ້ນທາງດ່ວນນະຄອນຫຼວງວຽງຈັນ-ບໍ່ເຕ່ນ. ດ່ານບ້ານວັງ ໄດ້ເປີດໂອກາດໃຫ້ການເຊື່ອມໂຍງເສດຖະກິດ ຈາກເຂດເສດຖະກິດທາງພາກເໜືອ ແລະ ຕາເວັນອອກສ່ຽງເໜືອແຫ່ງ ຣາຊະອານາຈັກໄທກັບ ສປຈີນ ຜ່ານ ສປປ ລາວ ຈະຫຼຸດໄລຍະທາງ ແລະ ການສິ້ນເປືອງລົງ ໂດຍຜ່ານດ່ານບ້ານວັງ ເພື່ອເຊື່ອມຕໍ່ກັບເສັ້ນທາງລົດໄຟລາວ-ຈີນ ທີ່ໂພນໂຮງ ຫຼື ທາງດ່ວນທີ່ເມືອງຫີນເຫີບ ແລະ ເມືອງໂພນໂຮງຂອງແຂວງວຽງຈັນ. ການເຊື່ອມໂຍງດັ່ງກ່າວ, ຈະເປັນໂອກາດທີ່ດີຊຸກຍູ້ໃຫ້ແກ່ການພັດທະນາເສດຖະກິດພາກເໜືອຂອງ ສປປ ລາວ ໂດຍເຊື່ອມໂຍງກັບການພັດທະນາເສດຖະກິດຂອງພາກເໜືອ ແລະ ຕາເວັນອອກສ່ຽງເໜືອຂອງຣາຊະອານາຈັກໄທ ກັບພາກໃຕ້ຂອງ ສປ ຈີນ ແລະ ພາກເໜືອຂອງ ສສ ຫວຽດນາມ.
ທີ່ຕັ້ງຍຸດທະສາດດັ່ງກ່າວ,ຍັງອຳນວຍຄວາມສະດວກສໍາລັບການເດີນທາງເຂົ້າ-ອອກຂອງຜູ້ໂດຍສານ, ນັກທ່ອງທ່ຽວຈາກຣາຊະອານາຈັກໄທ ແລະ ຕ່າງປະເທດ ທີ່ມີຈຸດປະສົງມາທ່ອງທ່ຽວນະຄອນຫຼວງວຽງຈັນ, ວັງວຽງ, ຫຼວງພະບາງ ແລະ ສະຖານທີ່ຕ່າງໆຢູ່ພາກເໜືອຂອງ ສປປ ລາວ.ນອກຈາກເດີນທາງເຂົ້າ-ອອກ ໂດຍນໍາໃຊ້ເສັ້ນທາງສະໜາມບິນ, ດ່ານສາກົນຂົວມິດຕະພາບແຫ່ງທີ 1ແລ້ວ, ຈໍານວນຫຼາຍກໍໄດ້ນໍາໃຊ້ເສັ້ນທາງເຮືອມາທາງນໍ້າຂອງ ຫຼື ເສັ້ນທາງຜ່ານແຂວງໄຊຍະບູລີ. ປັດຈຸບັນ, ສະຖານທີ່ທ່ອງທ່ຽວຢູ່ແຂວງ ວຽງຈັນ ໄດ້ມີຫຼາຍແຫ່ງກາຍເປັນຈຸດໝາຍເສັ້ນທາງທ່ອງທ່ຽວຂອງບັນດານັກທ່ອງທ່ຽວຈາກຣາຊະອານາຈັກໄທ ແລະ ຕ່າງປະເທດ; ສະນັ້ນ, ການເດີນທາງເຂົ້າ-ອອກຈຸດດ່ານບ້ານວັງ ຈຶ່ງກາຍເປັນທາງເລືອກ, ເປັນເສັ້ນທາງຂອງນັກທ່ອງທ່ຽວເຫຼົ່ານັ້ນ ຊຶ່ງຈະເຊື່ອມໂຍງກັບແຜນພັດທະນາການທ່ອງທ່ຽວບັນດາແຂວງພາກເໜືອຂອງ ສປປ ລາວ ຕາມແຜນແມ່ບົດພັດທະນາ 9ແຂວງພາກເໜືອ ຂອງ ສປປ ລາວ.
ເຫັນໄດ້ວ່າ, ດ່ານສາກົນບ້ານວັງ ແມ່ນປັດໄຈໜຶ່ງທີ່ສຳຄັນໃນການຊຸກຍູ້ການພັດທະນາເສດຖະກິດ-ສັງຄົມ ຂອງບັນດາເມືອງ, ແຂວງ ແລະ ການພັດທະນາໂດຍລວມຂອງປະເທດ ດ້ວຍທ່າແຮງໃນການຈັດຕັ້ງຜັນຂະຫຍາຍຈຸດພິເສດທີ່ຕັ້ງຍຸດທະສາດດ້ານພູມສັນຖານທີ່ສຳຄັນ ໂດຍສະເພາະອີງຕາມແຜນແມ່ບົດພັດທະນາ 9 ແຂວງພາກເໜືອຂອງ ສປປ ລາວ ກຳນົດໃນປີ 2008, ເຖິງວ່າແຂວງວຽງຈັນ ຢູ່ພາກກາງແຕ່ກໍໄດ້ຖືກຈັດເຂົ້າໃນກຸ່ມບັນດາແຂວງພາກເໜືອ ທີ່ໄດ້ມີການກຳນົດຮູບແບບການພັດທະນາຕາມທິດ 1334 ຄື: 1 ສູນກາງພັດທະນາເສດຖະກິດ ທີ່ເມືອງຫຼວງພະບາງ; 3 ແລວທາງເສດຖະກິດ ເພື່ອເຊື່ອມຕໍ່ບັນດາແຂວງພາກເໜືອ ກັບບັນດາປະເທດອ້ອມຂ້າງ, 3 ເຂດພັດທະນາອຸດສາຫະກຳ ເພື່ອເປັນສູນກາງພັດທະນາອຸດສາຫະກຳຢູ່ເຂດພາກເໜືອ ຂອງ ສປປ ລາວ ແລະ 4 ເຂດຮ່ວມມືເສດຖະກິດຊາຍແດນ ເພື່ອເປັນປະຕູເຊື່ອມຕໍ່ບັນດາປະເທດອ້ອມຂ້າງ, ພາກພື້ນ ແລະ ສາກົນ.
ຄໍາເຫັນ