ທ່ານລັດຖະມົນຕີກະຊວງກະສິກໍາ ແລະ ສິ່ງແວດລ້ອມ ໂອ້ລົມ ພະແນກກະສິກໍາ ແລະ ສິ່ງແວດລ້ອມແຂວງຫຼວງພະບາງ

ໂອກາດນີ້, ທ່ານ ຊາຍພອນ ຈັນທຸມມາ ຫົວໜ້າພະແນກກະສິກຳ ແລະ ສິ່ງແວດລ້ອມ ແຂວງຫຼວງພະບາງ ໄດ້ຂຶ້ນລາຍ ງານການຈັດຕັ້ງປະຕິບັດວຽກງານຮອບດ້ານໃນໄລຍະ 10 ເດືອນ ປີ 2025 ໂດຍໄດ້ຍົກໃຫ້ເຫັນການ ນໍາພາ - ຊີ້ນໍາ ການຈັດຕັ້ງປະຕິບັດວຽກງານແຕ່ລະດ້ານ ເຊິ່ງມີທັງຜົນສໍາເລັດ, ດ້ານດີ, ດ້ານອ່ອນ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້. ຊຶ່ງໄດ້ໃຫ້ຮູ້ວ່າ: ພະແນກກະສິກໍາ ແລະ ສິ່ງແວດລ້ອມແຂວງຫຼວງພະບາງ ພາຍຫຼັງເຕົ້າໂຮມກັນ ມີ 11 ຂະແໜງການ ແລະ 2 ກອງ, ມີພະນັກງານທັງໝົດ 218 ຄົນ, ຍິງ 65 ຄົນ. ໃນໄລຍະ 10 ເດືອນໄດ້ສຸມໃສ່ຊຸກຍູ້ຂະບວນການຜະລິດ ເພື່ອຄໍ້າປະກັນສະບຽງອາຫານ ແລະ ຜະລິດເປັນສິນຄ້າ ຕິດພັນກັບການປົກປັກຮັກສາປ່າໄມ້, ບັນດາແຜນງານອື່ນໆຕາມຄວາມຮັບຜິດຊອບ, ການຜະລິດເຂົ້າທັງໝົດ ປະຕິບັດໄດ້ 41.800 ເຮັກຕາ ຄາດຄະເນເກັບກ່ຽວ 40.930 ເຮັກຕາ ຄາດຄະເນຜົນຜະລິດ 119.896 ໂຕນ ເທົ່າກັບ 90,57%; ການປູກພືດສະບຽງ ເຊັ່ນ: ພືດຜັກຕ່າງໆ ແລະ ພືດທາດແປ້ງ ປະຕິບັດຕົວຈິງມີເນື້ອທີ່ປູກທັງໝົດ 25,404 ເຮັກຕາ ຄາດຄະເນຜົນຜະລິດ 418,202 ໂຕນ ເທົ່າກັບ 99.31% ຂອງແຜນການ; ການປູກໄມ້ໃຫ້

ໝາກ ມີ 7,896 ເຮັກຕາ, ຄາດຄະເນຜົນຜະລິດ 127,390 ໂຕນ; ວຽກງານລ້ຽງສັດ: ງົວ ມີ 251,271 ໂຕ, ຄວາຍ ມີ 67,531 ໂຕ, ໝູ ມີ 285,376 ໂຕ, ແບ້ ມີ 112,805 ໂຕ, ສັດປີກ ມີ 6,330,570 ໂຕ; ການປະມົງ ທົ່ວແຂວງມີໜອງປາທັງໝົດ 3,157 ໜອງ, ລ້ຽງປາກະຊັງ ມີ 7 ຟາມ ສາມາດຜະລິດປາຊີ້ນໄດ້ 5,800 ໂຕນ/ປີ; ຊຸກຍູ້ພາກລັດ ແລະ ປະຊາຊົນຜະລິດລູກປານ້ອຍຕອບສະໜອງແກ່ການລ້ຽງໄດ້ທັງໝົດ 2.3 ລ້ານໂຕ; ຕອບສະໜອງຊີ້ນ, ປາ ແລະ ໄຂ່ ໄດ້ທັງໝົດ 23,392.37ໂຕນ, ສະເລ່ຍໄດ້ 48.13 ກິໂລ/ຄົນ/ປີ; ການສົ່ງອອກສິນຄ້າກະສິກຳ ແລະ ປ່າໄມ້ ປະເພດຕ່າງໆ ລວມມູນຄ່າທັງໝົດ 34,241 ຕື້ກີບ,ໃນນັ້ນ: ສິນຄ້າກະສິກຳ ມູນຄ່າ 33,921 ຕື້ກີບ, ໄມ້ສັກແປຮູບ ມູນຄ່າ 28.95 ຕື້ກີບ, ປະເພດເຄື່ອງປ່າຂອງດົງ ມູນຄ່າ 40.43 ຕື້ກີບ, ສັດລ້ຽງ ທັງໝົດ 67,984 ໂຕ ມູນຄ່າ 250,83 ຕື້ກີບ. ພ້ອມນີ້ ຍັງຍົກໃຫ້ເຫັນການຈັດຕັ້ງປະຕິບັດ ການຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລອ້ມ ເປັນຕົ້ນວຽກທີ່ດິນ, ວຽກສິ່ງ ແວດລ້ອມ ແລະ ຜ່ານທິດທາງແຜນການ ທ້າຍປີ 2025 ຕື່ມອີກ.

ໃນເວລາຕໍ່ມາ, ທ່ານ ລິນຄໍາ ດວງສະຫວັນ ໄດ້ໃຫ້ກຽດມີຄໍາເຫັນໂອ້ລົມ ຊຶ່ງເນື້ອໃນສໍາຄັນ ທີ່ທ່ານເນັ້ນໜັກໃຫ້ການນໍາຫຼັກແຫຼ່ງ, ສະມາຊິກພັກ, ພະນັກງານ-ລັດຖະກອນ ເອົາໃຈໃສ່ສືບຕໍ່ຮັກສາຄວາມສາມັກຄີພາຍໃນ ໃຫ້ເປັນປຶກແຜ່ນແໜ້ນໜາ, ເອົາໃຈໃສ່ຮຽນຮູ້ວຽກງານເຊິ່ງກັນ ແລະ ກັນ ໃຫ້ຮັບຮູ້ເຂົ້າໃຈຢ່າງໄວວາ ເພື່ອພ້ອມກັນຈັດຕັ້ງປະຕິບັດວຽກງານໃນຕໍ່ໜ້າ ໃຫ້ມີຜົນສໍາເລັດໃໝ່ໃຫຍ່ຫຼວງກວ່າເກົ່າ, ເປັນໃຈກາງໃນການຈັດຕັ້ງປະຕິບັດວຽກງານແຕ່ລະດ້ານ ພ້ອມທັງຄຸ້ມຄອງວຽກງານປ່າໄມ້, ການຄຸ້ມຄອງສໍາມະໂນຄົວທີ່ດິນ ແລະ ການອອກໃບຕາດິນໃຫ້ມີປະສິດທິພາບ ແລະ ປະສິດທິຜົນ, ນຳພາສຶກສາອົບຮົມສະມາຊິກພັກ, ພະນັກງານໃຫ້ມີທັດສະນະຫຼັກ ໝັ້ນ, ມີຄວາມໜັກແໜ້ນທາງດ້ານການເມືອງ, ປະຕິບັດແນວທາງຂອງພັກ ກໍ່ຄືຍຸດທະສາດການພັດທະນາກະສິກຳ ແລະ ສິ່ງແວດລ້ອມ ຕາມທິດສີຂຽວ ແລະ ຍືນຍົງ ພ້ອມທັງຫັນເປັນທັນສະໄໝ ໃຫ້ກ້ວາງຂວາງທົ່ວເຖິງ ແລະ ໃຫ້ເກີດປະໂຫຍດແກ່ການພັດທະນາ ເສດຖະກິດ-ສັງຄົມ ຂອງແຂວງຫຼວງພະບາງ ກໍ່ຄືຂອງຊາດໃຫ້ນັບມື້ຫຼາຍຂຶ້ນເລື້ອຍໆ.