ຫາລືວຽກສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ

 ສຳລັບການສຳຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ V ປີ 2025 ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ເພັດ ພົມພິພັກ ລັດຖະມົນຕີ ກະຊວງແຜນການ ແລະ ການລົງທຶນ ໄດ້ຍົກໃຫ້ເຫັນວ່າ: ໄລຍະຜ່ານມາ ສປປ ລາວ ໄດ້ດໍາເນີນການສໍາຫຼວດພົນລະເມືອງ ທີ່ຢູ່ອາໄສທົ່ວປະເທດມາແລ້ວ 4 ຄັ້ງ ຊຶ່ງໄດ້ດຳເນີນໃນທຸກໆ 10 ປີ ເລີ່ມແຕ່ປີ 1985 ແລະ ຄັ້ງນີ້ ເປັນຄັ້ງທີ 5 ຊຶ່ງຈະໄດ້ຈັດຕັ້ງປະຕິບັດໃນປີ 2025. ການສໍາຫຼວດຄັ້ງນີ້, ແມ່ນມີຄວາມໝາຍສຳຄັນທີ່ສຸດ ໃນການເກັບກໍາຂໍ້ມູນອັນສຳຄັນ ກ່ຽວກັບຄຸນລັກສະນະຂອງພົນລະເມືອງ ແລະ ທີ່ຢູ່ອາໄສ, ສະພາບການສຶກສາ, ແຮງງານ ແລະ ຄວາມພິການ, ການຍົກຍ້າຍ, ການເກີດ, ການຕາຍ ແລະ ດ້ານສຸຂະອະນາໄມ. ຂໍ້ມູນດັ່ງກ່າວ, ຈະສາມາດສ່ອງແສງໃຫ້ເຫັນໄດ້ເຖິງການປ່ຽນແປງ ທາງດ້ານຂະໜາດ, ໂຄງປະກອບ, ການຂະຫຍາຍຕົວ ແລະ ການ ແຈກຢາຍຂອງພົນລະເມືອງ ໃນຮອບ 10 ປີຜ່ານມາ ເພື່ອປະກອບສ່ວນ ເຂົ້າໃນການສ້າງນະໂຍບາຍ ແລະ ວາງແຜນຄຸ້ມຄອງພົນລະເມືອງ. ພ້ອມທັງເປັນຂໍ້ມູນພື້ນຖານໃນການຕິດຕາມ ແລະ ປະເມີນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ການສ້າງແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ພ້ອມທັງປະກອບສ່ວນເຂົ້າໃນການຕິດຕາມ ແລະ ປະເມີນຄວາມຄືບໜ້າຂອງເປົ້າໝາຍການພັດທະນາແບບຍືນຍົງ ເພື່ອເປັນຂໍ້ມູນໃນການສ້າງບົດລາຍງານແຫ່ງຊາດ ແບບສະໝັກໃຈເຫຼັ້ມທີ 3 (VNR 3) ຂອງລັດຖະບານ. ນອກຈາກນີ້, ຂໍ້ມູນດັ່ງກ່າວ ຈະປະກອບສ່ວນເຂົ້າໃນການປະເມີນການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ເປັນຕົ້ນການຄິດໄລ່ດັດຊະ ນີຊັບສິນມະນຸດ ຊຶ່ງເປັນດັດຊະນີໜຶ່ງ ໃນສາມມາດຕະຖານຂອງການປະເມີນ ການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ (ດັດຊະນີຊັບສິນມະນຸດ ປະກອບມີ: ອັດຕາສ່ວນພົນລະເມືອງທີ່ຂາດໂພຊະນາການ, ອັດຕາການຕາຍຂອງເດັກຕໍ່າກວ່າ 5 ປີ, ອັດຕາການເຂົ້າຮຽນລວມ ໃນຊັ້ນມັດທະຍົມ ແລະ ອັດຕາການຮູ້ໜັງສືຂອງຜູ້ໃຫຍ່).

ໂອກາດດຽວກັນ, ທ່ານ ກິແກ້ວ ໄຂຄຳພິທູນ ໄດ້ມີຄຳເຫັນໃຫ້ຄະນະຊີ້ນໍາແຕ່ລະຂັ້ນ ແລະ ອໍານາດການປົກຄອງທ້ອງຖິ່ນ ຕ້ອງຖືສຳຄັນວຽກງານສຳຫຼວດພົນລະເມືອງ ແລະ ທີ່ຢູ່ອາໄສ, ຖືວຽກງານນີ້ເປັນວຽກບຸລິມະສິດ, ຖືເປັນພັນທະໜ້າທີ່ໃຫ້ການຮ່ວມມື ແລະ ຕິດຕາມຊຸກຍູ້ວຽກງານດັ່ງກ່າວເປັນປະຈຳ ເພື່ອເຮັດໃຫ້ການສຳຫຼວດ ໄດ້ຮັບຂໍ້ມູນທີ່ມີຄຸນນະພາບ ຮັບໃຊ້ເຂົ້າໃນວຽກງານຕ່າງໆ ພ້ອມນີ້, ບັນດາຂະແໜງການ ແລະ ທ້ອງຖິ່ນທຸກຂັ້ນ ຕ້ອງໄດ້ສຸມໃສ່ວຽກງານໂຄສະນາເຜີຍແຜ່ ໂດຍໃຫ້ຜັນຂະຫຍາຍແຜນໂຄສະນາ ທີ່ສູນກາງວາງອອກ ຫັນເປັນແຜນວຽກຂອງຕົນ ເພື່ອປຸກລະດົມທົ່ວປວງຊົນເຂົ້າຮ່ວມການສຳຫຼວດ, ສ້າງຄວາມເຂົ້າໃຈໃຫ້ທຸກພາກສ່ວນ ກ່ຽວກັບຄວາມສໍາຄັນຂອງຂໍ້ມູນດ້ານພົນລະເມືອງ ເພື່ອບັນລຸຈຸດປະສົງ ໃນການພັດທະນາປະເທດຊາດ. ພ້ອມກັນນີ້, ກໍໃຫ້ມີການປະສານສົມທົບ ກັບພາກສ່ວນປ້ອງກັນຊາດ-ປ້ອງກັນຄວາມສະຫງົບ ຕ້ອງຊີ້ນຳຢ່າງໃກ້ຊິດ ເພື່ອຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນສັງຄົມ ໃຫ້ໄດ້ 100% ໂດຍສະເພາະເຂດຫ່າງໄກສອກຫຼີກ ແລະ ເຂດຊາຍແດນ; ການຈັດຫາ ແລະ ປະກອບຈຳນວນບຸກຄະລາກອນ ທີ່ຈະເປັນນັກເດີນສຳຫຼວດ ແລະ ການກວດກາ ໃຫ້ຄົບຖ້ວນຕາມແຜນທີ່ກຳນົດ ເອົາໃຈໃສ່ການຈັດຫາພະນັກງານ ທີ່ມີຄວາມຮູ້ຄວາມສາມາດ ທີ່ຈະນຳໃຊ້ເຕັກໂນໂລຊີທີ່ທັນສະໄໝ (ແທັບເລັດ) ພ້ອມກັນນັ້ນກໍໃຫ້ຄະນະຊີ້ນຳທຸກຂັ້ນ ສ້າງແຜນຢ່າງລະອຽດຄົບຖ້ວນຂອງການຝຶກອົບຮົມ ແລະ ແຜນການດຳເນີນການສຳຫຼວດຂອງຕົນ ແລະ ແຜນການລົງຕິດຕາມຊຸກຍູ້ແຕ່ຫົວທີ ເພື່ອຮັບປະກັນ ໃຫ້ການສໍາຫຼວດມີຄຸນນະພາບ ແລະ ຜົນສຳເລັດ.