ຮອງເຈົ້າແຂວງຜົ້ງສາລີຊຸກຍູ້ບັນດາກິດຈະການທີ່ຈັດຕັ້ງປະຕິບັດຢູ່ເມືອງບຸນເໜືອ

ວັນທີ 26 ຕຸລາ ຜ່ານມາ, ທ່ານ ວິສອນ ລາວເມົາ ຮອງເຈົ້າແຂວງຜົ້ງສາລີ ຜູ້ຊີ້ນໍາຂົງເຂດເສດຖະກິດ-ຂັ້ນແຂວງ, ພ້ອມດ້ວຍບັນດາພະແນກການທີ່ກ່ຽວຂ້ອງຂົງເຂດເສະຖະກິດຂັ້ນແຂວງ ຂັ້ນເມືອງ ໄດ້ລົງຊຸກຍູ້ການບັນດາກິດຈະການທີ່ຈັດຕັ້ງປະຕິບັດຢູ່ເມືອງບຸນເໜືອ ໂດຍສະເພາະແມ່ນ ການລ້ຽງໄກ່ໄຂ່ ຂອງບໍລິສັດ ສຸກຈະເລີນຟາມລ້ຽງໄກ່ຄົບວົງຈອນ ຈຳກັດຜູ້ດຽວ ແລະ ໂຮງສີໝາກເດືອຍ ຂອງບໍລິສັດ ຢຸນເວີນ ຮຸ້ນສ່ວນຈຳກັດ ໂດຍມີທ່ານ ພອນໄຊ ແກ້ວສົມພັນ ເຈົ້າເມືອງບຸນເໜືອພ້ອມດ້ວຍຂະແໜງການທີ່ກ່ຽວຂ້ອງຂັ້ນເມືອງເຂົ້າຮ່ວມຕິດຕາມ.
ກິດຈະການການລ້ຽງໄກ່ໄຂ່ ຂອງບໍລິສັດ ສຸກຈະເລີນຟາມລ້ຽງໄກ່ຄົບວົງຈອນ ຈຳກັດຜູ້ດຽວ ແມ່ນໄດ້ດຳເນີນກິດຈະການໃນຕົ້ນເດືອນກໍລະກົດ ປີ 2022 ໃນໄລຍະຜ່ານມາທາງບໍລິສັດ ໄດ້ມີການກະກຽມ ແລະ ດຳເນີນການບຸກເບີກພື້ນຖານໂຄງລ່າງໂດຍສະເພາະແມ່ນ: ບຸກເບີກພື້ນທີ່, ກໍ່ສ້າງເສັ້ນທາງ ເຂົ້າຟາມ, ກໍ່ສ້າງຄອກລ້ຽງໄກ່ແບບເຄິ່ງຖາວອນ-ແບບຖາວອນ ແລະ ນຳເຂົ້າໄກ່ພັນໄຂ່ຈາກປະເທດໄທ (ເປັນໄກ່ພັນໄຂ່ໄຮບຣິດ). ມາຮອດປັດຈຸບັນໄດ້ສໍາເລັດການສ້າງຄອກໄກ່ໄຂ່ແບບເຄິ່ງຖາວອນ ຂະໜາດ 8x25 ແມັດ ຈໍານວນ 1 ຫຼັງ ບັນຈຸໄກ່ໄດ້ 500 ໂຕ, ສ່ວນການລ້ຽງໄກ່ໄຂ່ໃນໄລຍະ 3 ເດືອນຜ່ານມາ ການໃຫ້ຜົນຜະລິດ ໄຂ່ແມ່ນຢູ່ອັດຕາສ່ວນ ປະມານ 88,5% ສະເລ່ຍ 11.700 ໜ່ວຍຕໍ່ເດືອນ (ສະເລ່ຍໃຫ້ໄຂ່ 390 ໜ່ວຍຕໍ່ມື້) ສະເລ່ຍ ລາຍຮັບ 21 ລ້ານກີບຕໍ່ເດືອນ ແລະ ລາຍຈ່າຍສະເລ່ຍ 16 ລ້ານກີບຕໍ່ເດືອນ, ພ້ອມກັນນັ້ນທາງບໍລິສັດກຳລັງ ກໍ່ສ້າງຟາມໄກ່ໄຂ່ທີ່ສາມາດບັນຈຸໄກ່ໄຂ່ 10.000 ໂຕ ເພື່ອສາມາດສະໜອງໄກ່ໄຂ່ຢູ່ພາຍໃນເທດສະບານເມືອງບຸນເໜືອ, ຢູ່ໃນເມືອງຂອງແຂວງ ແລະ ບ່ອນອື່ນໆ (ສຳລັບແຜນການນໍາເຂົ້າໄກ່ພັນໄຂ່ໃນທ້າຍເດືອນ 12 ປີ 2023 ແມ່ນຈຳນວນ 2.000 ໂຕ ແລະ ໄດ້ສ້າງຟາມລ້ຽງໄກ່ຊີ້ນ 3 ສາຍພັນນັ້ນ ທີ່ສາມາດບັນຈຸໄດ້ 500 ໂຕ ແລະ ສ້າງໂຮງລູກໄກ່ ເພື່ອລອງ ແລະ ຂະຫຍາຍ ແນວພັນໄກ່ 3 ສາຍພັນ ເພື່ອສະໜອງຊີ້ນໄກ່ຢູ່ພາຍໃນເມືອງບຸນເໜືອ ກໍຄືພາຍໃນແຂວງ ແລະ ອື່ນໆຕາມຄວາມ ຕ້ອງການຂອງຕະຫຼາດ. ຈາກນັ້ນ ທ່ານຮອງເຈົ້າແຂວງ ພ້ອມດ້ວຍຄະນະໄດ້ໄປເບິ່ງໂຮງສີໝາກເດືອຍ ຂອງບໍລິສັດ ຢຸນເວີນ ຮຸ້ນສ່ວນຈຳກັດ ຊຶ່ງໂຮງງານດັ່ງກ່າວ ເລີ່ມດຳເນີນແຕ່ 2008-2009 ໂດຍຮ່ວມກັບບໍລິສັດອື່ນສົ່ງເສີມປູກໃນຮູບແບບ 2+3 ແລະ ເກັບຊື້ ເພື່ອສົ່ງອອກໄປຈີນ, ຕໍ່ມາໄດ້ລົງທຶນຮ່ວມ ກັບນັກທຸລະກິດຈີນ ສ້າງຕັ້ງເປັນບໍລິສັດສົ່ງເສີມກະສິກຳໄດ້ສົ່ງເສີມປູກ ແລະ ເກັບຊື້ໝາກເດືອຍ ໃນ 40 ກວ່າ ບ້ານເປົ້າໝາຍ ຢູ່ເມືອງບຸນເໜືອ ເຊັ່ນ: ບັນດາບ້ານເທດສະບານ ແລະ 5 ກຸ່ມຄື: ກຸ່ມບ້ານຍໍ້, ຕອນຊາຍ ບ້ານນໍ້າລູ, ພຽງຊາຍ ແລະ ງາຍເໜືອ ໃນແຕ່ລະປີໄດ້ລົງທຶນ ສົ່ງເສີມປູກຢ່າງໜ້ອຍ 30 ບ້ານ, ໃນເນື້ອທີ່ປະມານ 500-800 ເຮັກຕາ ສະເລ່ຍໄດ້ຮັບຜົນຜະລິດ 1 ພັນກວ່າໂຕນ, ນອກຈາກນີ້ໄດ້ສົ່ງເສີມ ປູກ ແລະ ເກັບຊື້ຕື່ມອີກ 5 ເມືອງ ສະເລ່ຍໄດ້ຮັບຜົນຜະລິດທັງໝົດປະມານ 2 ພັນກວ່າໂຕນ; ມາຮອດຕົ້ນປີ 2021 ໄດ້ສ້າງຕັ້ງໂຮງແກະໝາກເດືອຍ ໃນມູນຄ່າ 12 ຕື້ກວ່າກີບ ແລະ ປີ 2022 ໄດ້ເລີ່ມແກະໝາກເດືອຍ, ໝາກເດືອຍທີ່ນຳມາແກະ 2 ພັນໂຕນໄດ້ 1 ພັນໂຕນເຄິ່ງສຳເລັດຮູບ (ຜົນຜະລິດທີ່ແກະອອກຈາກໂຮງງານໃນປີ 2022 ແມ່ນໄດ້ສົ່ງອອກໄດ້ 1 ພັນກວ່າໂຕນ), ຄວາມສາມາດຂອງໂຮງແກະໝາກເດືອຍສະເລ່ຍ 60-70 ໂຕນ/ມື້, ຄວາມຕ້ອງການຜົນຜະລິດຂອງໂຮງແກະໝາກເດືອຍປະມານ 10 ພັນໂຕນ/ປີ; ມາຮອດປັດຈຸບັນໂຮງແກະໝາກເດືອຍມີກຳມະກອນ 16 ຄົນ, ຄາດຄະເນໃນປີ 2023 ຈະເກັບຊື້ ແລະ ມີຜົນຜະລິດ ມາປ່ອນໂຮງແກະໝາກເດືອຍໄດ້ຈຳນວນ 3 ພັນໂຕນ ລາຄາເກັບຊື້ 11 ພັນກີບ/ກິໂລ, ຈະສ້າງລາຍຮັບໃຫ້ປະຊາຊົນຄິດໄລ່ເປັນເງິນ 30 ຕື້ ກວ່າກີບ. (ຂ່າວ-ພາບ: ແສງຄຳ ສາລີວັນ)