 |
ທ່ານ ຄຳຂອດ ໝື່ນຫຼວງ ໄດ້ຍົກໃຫ້ເຫັນຄວາມສຳຄັນຂອງການຈັດຕັ້ງປະຕິບັດວຽກງານການເງິນ ຊຶ່ງເປັນໜຶ່ງໃນບັນດາເສົາຄ້ຳສຳຄັນໃນການພັດທະນາເສດຖະກິດ-ສັງຄົມຂອງເມືອງ ພ້ອມທັງເນັ້ນໜັກໃຫ້ທຸກພາກສ່ວນເອົາໃຈໃສ່ເພີ່ມທະວີຄວາມຮັບຜິດຊອບ ເພື່ອສືບຕໍ່ຍູ້ແຮງວຽກງານການເງິນໃຫ້ມີປະສິດທິພາບ ແລະ ປະສິດທິຜົນສູງຂຶ້ນ.
ທ່ານ ໄພທູນ ໄຊນະໄພລີ ຫົວໜ້າຫ້ອງການການເງິນເມືອງປາກຊ່ອງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານການເງິນປະຈຳປີ 2025, ຊຶ່ງສະແດງໃຫ້ເຫັນຜົນງານທີ່ຍາດມາໄດ້ ໃນການຈັດເກັບລາຍຮັບເຂົ້າງົບປະມານ, ການຈັດສັນງົບປະມານ ແລະ ການຄຸ້ມຄອງການເງິນຂັ້ນທ້ອງຖິ່ນ ພ້ອມທັງຊີ້ໃຫ້ເຫັນບັນດາຂໍ້ຄົງຄ້າງ ແລະ ສິ່ງທ້າທາຍ ຊຶ່ງນັບແຕ່ປີ 2022 ເປັນຕົ້ນມາ ເມືອງປາກຊ່ອງ ສາມາດເປັນເມືອງທີ່ກຸ້ມຕົນເອງ ທາງດ້ານລາຍຮັບ-ລາຍຈ່າຍ ເພື່ອແກ້ໄຂຊິວິດການເປັນຢູ່ຂອງພະນັກງານ-ລັດຖະກອນພາຍໃນເມືອງ, ເປັນຕົ້ນແມ່ນການເບີກຈ່າຍເງິນເດືອນ, ເງິນອຸດໜຸນ, ເງິນບໍລິຫານ, ເງິນດັດສົມສົ່ງເສີມ ໄດ້ຢ່າງພຽງພໍ ແລະ ທັນການ, ຕິດພັນກັບຜົນຜະລິດໝາກກາເຟ, ຜຶດຜັກລາຄາສູງສົມຄວນ ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າຊາວເມືອງປາກຊ່ອງດີຂຶ້ນເທື່ອລະກ້າວ.
 |
ສຳລັບໃນປີ 2025 ທີ່ຜ່ານມາ, ແຜນຈັດເກັບລາຍຮັບງົບປະມານຂອງເມືອງທີ່ແຂວງດຸນໃຫ້ທັງໝົດ 26 ຕື້ 655 ລ້ານກີບ ສາມາດຈັດຕັ້ງປະຕິບັດໄດ້ 38 ຕື້ 416 ລ້ານກີບ, ລື່ນແຜນ 11 ຕື້ 532 ລ້ານກີບເທົ່າກັບ 144%. ທຽບໃສ່ GDP ເທົ່າກັບ 0.37% ທຽບໃສ່ໄລຍະດຽວຂອງປີກ່ອນ(2024) ເທົ່າກັບ 139%, ລື່ນ 10 ຕື້ 876 ລ້ານກີບ, ເຮັດໃຫ້ເສດຖະກິດມະຫາພາກລວມຍອດຜະລິດຕະພັນພາຍໃນເມືອງ GDP ໃນໄລຍະ 1 ປີທີ່ຜ່ານມາ, ປະຕິບັດໄດ້ 10 ຕື້ 578 ລ້ານ ກວ່າກີບ, ທຽບໃສ່ແຜນປະຕິບັດໄດ້ 103,49%. ອັດຕາການຂະຫຍາຍຕົວທາງດ້ານເສດຖະກິດ 8,10% ສະເລ່ຍຕໍ່ຫົວຄົນເທົ່າກັບ 113,284,395 ກີບ/ປີ ຫຼື ເທົ່າກັບ 5,394 ໂດລາສະຫະລັດ ໂຄງປະກອບທາງດ້ານເສດຖະກິດ ຂະແໜງກະສິກຳກວມ 78.76%, ຂະແໜງອຸດສະຫະກຳກວມ 12.57% ແລະ ຂະແໜງການບໍລິການກວມ 8.65%. ຈາກນັ້ນ, ກອງປະຊຸມຍັງໄດ້ຮັບຟັງຕົວເລກແຜນການຈັດເກັບລາຍຮັບຂອງກຸ່ມ ແລະ ບ້ານ, ຕົວເລກລາຍຮັບວິຊາການ ແລະ ແຜນປີ 2026 ຂອງບັນດາຫ້ອງການອ້ອມຂ້າງເມືອງ ແລະ ການປະກອບຄຳຄິດເຫັນ, ສາເຫດທີ່ພາໃຫ້ປະຕິບັດໄດ້ລື່ນແຜນ ແລະ ບໍ່ໄດ້ຕາມແຜນ ຈາກພະແນກການເງິນແຂວງ, ບັນດາຫ້ອງການ, ຕາແສງ, ບ້ານ ຢ່າງກົງໄປກົງມາ ເພື່ອເຮັດໃຫ້ວຽກງານການເງິນຂອງເມືອງປາກຊ່ອງ ສືບຕໍ່ມີການຂະຫຍາຍຕົວ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງ ໃຫ້ນັບມື້ນັບຈະເລີນກ້າວໜ້າ.
ໂອກາດນີ້, ກໍໄດ້ມີການມອບໃບຍ້ອງຍໍໃຫ້ກົມກອງ, ຫ້ອງການ, ກຸ່ມ, ບ້ານ, ບໍລິສັດ, ຫົວໜ້າທຸລະກິດຜູ້ປະກອບການພາຍໃນເມືອງ ທີ່ມີຜົນງານດີເດັ່ນໃນການຊຸກຍູ້ຕິດຕາມ, ປະກອບສ່ວນ ໃນການຈັດເກັບລາຍຮັບເຂົ້າງົບປະມານຂອງເມືອງ ແລະ ມີການມອບຂອງຂວັນຕື່ມອີກ.
(ຂ່າວ: ທ. ສອນໄຊ ຈັນທະວີ)
ຄໍາເຫັນ