 |
ສະຫາຍ ພົຈວ ຄໍາແຝງ ວັນດີໄຊ ຮອງປະທານກໍາມາທິການ ປກຊ-ປກສ ສະພາແຫ່ງຊາດ ໄດ້ສະຫຼຸບການເຄື່ອນໄຫວວຽກງານ ປະຈຳປີ 2026 ແລະ ທິດທາງແຜນການ ປະຈຳປີ 2027 ວ່າ: ຕະຫຼອດໄລຍະ 1 ປີຜ່ານມາ ກໍາມາທິການ ປກຊ-ປກສ ສະພາແຫ່ງຊາດ ໄດ້ຮັບການຊີ້ນໍາຈາກຄະນະປະຈຳສະພາແຫ່ງຊາດ ການປະສານງານທີ່ໂລ່ງລ່ຽນ ກັບທຸກພາກສ່ວນທີ່ກ່ຽວຂ້ອງ ບວກໃສ່ຄວາມຕັດສິນໃຈຂອງຄະນະກໍາມາທິການ, ບັນດາກຳມະການສັງກັດກຳມາທິການ ທີ່ປະຈຳຢູ່ແຕ່ລະເຂດເລືອກຕັ້ງ ຕະຫຼອດຮອດພະນັກ ງານ, ວິຊາການຊ່ວຍວຽກຂອງກຳມາທິການ ເຮັດໃຫ້ແຜນການວຽກງານ ປະຈຳປີ 2026 ໄດ້ຮັບການຈັດຕັ້ງປະຕິບັດມີຜົນສໍາເລັດຫຼາຍດ້ານ. ໂດຍສະເພາະດ້ານນິຕິບັນຍັດ ໄດ້ຈັດຕັ້ງຜັນຂະຫຍາຍແຜນການສ້າງ ແລະ ປັບປຸງກົດໝາຍ 5 ປີ (2026-2030) ທີ່ສະພາແຫ່ງຊາດຮັບເອົາແລ້ວ 6 ສະບັບ. ໃນນັ້ນ, ກົດໝາຍສ້າງ ໃໝ່ 1 ສະບັບ ແລະ ປັບປຸງໃໝ່ ຈຳນວນ 5 ສະບັບ, ມີຄໍາເຫັນໃສ່ຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026, ເຂົ້າຮ່ວມກອງປະຊຸມກວດກາເນື້ອໃນຮອບດ້ານ ແລະ ທາບທາມຮ່າງກົດໝາຍຕ່າງໆ.
ກອງປະຊຸມຄັ້ງນີ້, ສະຫາຍຜູ້ເຂົ້າຮ່ວມໄດ້ຮັບຟັງຮ່າງບົດລາຍງານ ຜົນການເຄື່ອນໄຫວຕິດຕາມກວດ ກາວຽກງານ ປກຊ-ປກສ ແລະ ສະຫະພັນນັກຮົບເກົ່າແຫ່ງຊາດລາວ ປະຈຳປີ 2026, ຮັບຟັງລາຍງານກ່ຽວກັບການເຄື່ອນໄຫວຂອງກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ລາຍງານກ່ຽວກັບການຍົກສູງບົດບາດຂອງນັກຮົບເກົ່າ ໃນການເປັນແບບຢ່າງຮັກສາ ແລະ ເສີມຂະຫຍາຍທາດແທ້ມູນເຊື້ອອັນດີງາມຂອງພັກ ຂອງກໍາລັງປະກອບອາວຸດປະຕິວັດ ຕິດພັນກັບວຽກງານ ປກຊ-ປກສ ທົ່ວປວງຊົນຮອບດ້ານໃນກອງປະຊຸມກໍາມາທິການ. ພ້ອມນັ້ນ, ປກຊ-ປກສ ແຕ່ລະເຂດຍັງໄດ້ຜັດປ່ຽນກັນປະກອບຄໍາຄິດເຫັນຢ່າງກົງໄປກົງມາ.
 |
ໂອກາດນີ້, ສະຫາຍ ສອນໄຊ ສີພັນດອນ ໄດ້ໃຫ້ກຽດໂອ້ລົມເນັ້ນໜັກໃຫ້ຄະນະກຳມາທິການ ປກຊ-ປກສ ສະພາແຫ່ງຊາດ ສືບຕໍ່ປະສານສົມທົບກັບກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ກຳມາທິການກົດໝາຍ ແລະ ຍຸຕິທຳສະພາແຫ່ງຊາດ ໃນການສ້າງ ແລະ ປັບປຸງກົດໝາຍ ນິຕິກຳໃຕ້ກົດ ໝາຍ ໃຫ້ກົມກຽວກັນ ໂດຍມີການເຂົ້າຮ່ວມເພື່ອຕິດຕາມກວດການໍາແຕ່ຫົວທີ ເຮັດໃຫ້ການປະຕິບັດພາລະບົດບາດ ສິດ ແລະ ໜ້າທີ່, ດ້ານນິຕິບັນຍັດສອດຄ່ອງຕາມກົດໝາຍທີ່ກໍານົດໄວ້; ເພີ່ມທະວີການປະສານສົມທົບວຽກງານ ລະຫວ່າງກຳມາທິການ ແລະ ບັນດາກະຊວງອົງການ ເພື່ອປຶກສາຫາລືວຽກງານຕ່າງໆໃນຂົງເຂດ ປກຊ-ປກສ ແລະ ສະຫະພັນນັກຮົບເກົ່າໃຫ້ເປັນປົກກະຕິ ສືບຕໍ່ເພີ່ມທະວີໃນການຕິດຕາມກວດກາການປະຕິບັດກົດໝາຍ ຫຼື ການປະຕິບັດໜ້າທີ່ການເມືອງຂອງກຳລັງ ປກຊ-ປກສ ແລະ ສະຫະພັນນັກຮົບເກົ່າ ຕິດພັນກັບການຕິດຕາມກວດກາ ຢູ່ບັນດາກົມກອງທ້ອງຖິ່ນຕົວຈິງ; ສືບຕໍ່ປັບປຸງການຈັດຕັ້ງຂັ້ນກົມ, ຂັ້ນພະແນກ ໂດຍປະກອບບຸກຄະລະກອນຢ່າງພຽງພໍ ຕິດພັນກັບການຈັດຕັ້ງຝຶກອົບຮົມ, ຍົກສູງຂີດຄວາມສາ ມາດ ໃນການປະຕິບັດໜ້າທີ່ວຽກງານໃຫ້ມີຄຸນນະພາບ ສືບຕໍ່ພົວພັນກັບກຳມາທິການຕ່າງປະເທດ ກ່ຽວກັບແຜນການເຄື່ອນໄຫວຢ້ຽມຢາມແລກປ່ຽນບົດຮຽນ ກັບບັນດາປະເທດເພື່ອນມິດຍຸດທະສາດ ແລະ ສາກົນ ໃຫ້ເປັນປົກກະຕິ; ເອົາໃຈໃສ່ປະສານສົມທົບກັບສະພາປະຊາຊົນຂັ້ນແຂວງ ຄະນະກຳມະການ ປກຊ-ປກສ ຂັ້ນແຂວງ 2 ກອງບັນຊາການ (ທະຫານ-ຕຳຫຼວດ), ສະຫະພັນນັກຮົບເກົ່າຂອງແຂວງ ເພື່ອຈັດຕັ້ງປະຕິບັດພາ ລະບົດບາດ ເປັນເສນາທິການໃຫ້ກຳມາທິການ ປກຊ-ປກສ ແລະ ຄະນະປະຈຳສະພາແຫ່ງຊາດ ທາງດ້ານວຽກງານ ປກຊ-ປກສ ແລະ ສະຫະພັນນັກຮົບເກົ່າຢູ່ຂັ້ນທ້ອງຖິ່ນຕົນ ໃຫ້ນັບມື້ມີປະສິດທິຜົນດີຂຶ້ນ.
(ຂ່າວ: ວັນເພັງ, ຂໍ້ມູນ-ພາບ: ວຽງຈັນໃໝ່)
ຄໍາເຫັນ