ບ້ານຊ່ວຍເຫຼືອເດັກນ້ອຍ SOS ຫຼວງພະບາງ ໄດ້ຮັບການຊຸກຍູ້ວຽກງານລ້ຽງດູເດັກ

ການຢ້ຽມຢາມຄັ້ງນີ້, ເພື່ອຕິດຕາມ, ປຶກສາຫາລື-ຊຸກຍູ້ການດຳເນີນວຽກງານລ້ຽງດູເດັກ ໃຫ້ສອດຄ່ອງກັບມາດຕະຖານ ແລະ ແນວທາງການດຳເນີນງານຂອງເອັສໂອເອັສ, ພ້ອມທັງເນັ້ນໃສ່ການສົ່ງເສີມສະຫວັດດີການເດັກ, ການຄຸ້ມຄອງດູແລເດັກໃຫ້ເໝາະສົມ, ການສ້າງສະພາບແວດລ້ອມທີ່ປອດໄພ ແລະ ເອື້ອອຳນວຍຕໍ່ການຮຽນຮູ້, ການພັດທະນາທັກສະ ແລະ ການມີສ່ວນຮ່ວມຂອງເດັກໃນທຸກດ້ານ.

ໂອກາດນີ້, ທ່ານ ເບດດິລູ ເຊີກິນ ແລະ ທ່ານ ສິນນະສອນ ນະດອນໄຮ່ ໄດ້ພົບປະຫາລືກັບອຳນວຍການບ້ານ ແລະ ພະນັກງານ ພ້ອມທັງຮັບຟັງການລາຍງານ ສະພາບການດຳເນີນວຽກງານຂອງບ້ານໃນປັດຈຸບັນ ລວມທັງຜົນສຳເລັດ, ສິ່ງທ້າທາຍ ແລະ ບັນຫາທີ່ຕ້ອງການ ການສະໜັບສະໜູນ. ພ້ອມດຽວກັນນີ້, ທີມງານໄດ້ແລກປ່ຽນຄຳເຫັນ, ເພື່ອໃຫ້ຫັນໄປຕາມແນວທາງນະໂຍບາຍ ການປ່ຽນແປງໃໝ່ຂອງໂຄງການ. ການລົງຊຸກຍູ້ໃນຄັ້ງນີ້ ສະແດງໃຫ້ເຫັນເຖິງຄວາມເປັນຫ່ວງເປັນໄຍ ແລະ ເອົາໃສ່ໃຈການຮ່ວມມືຂອງອົງການບ້ານ SOS ສາກົນ ແລະ SOS ລາວ ໃນການສະໜັບສະໜູນ ທີມງານຜູ້ປະຕິບັດວຽກງານລ້ຽງດູເດັກ ເພື່ອໃຫ້ການດູແລເດັກມີຄຸນນະພາບ, ຕອບສະໜອງຕໍ່ຄວາມຈຳເປັນຂອງເດັກແຕ່ລະຄົນ ແລະ ສົ່ງເສີມໃຫ້ເດັກເຕີບໃຫຍ່ຢ່າງມີຄວາມສຸກ, ມີຄວາມໝັ້ນຄົງ ແລະ ມີໂອກາດພັດທະນາສັກກະຍະພາບຂອງຕົນຢ່າງເຕັມທີ່ໃນການປັບປຸງ ແລະ ພັດທະນາວຽກງານລ້ຽງດູເດັກຢ່າງຕໍ່ເນື່ອງ ໂດຍຍຶດຖືຜົນປະໂຫຍດສູງສຸດຂອງເດັກ. ຂ່າວ-ພາບ: ແຫຼ້ ສຸລິນພອນ