ຝຶກອົບຮົມການບັງຄັບໃຊ້ກົດໝາຍປົກປ້ອງລິຂະສິດ ໃຫ້ແຂວງອັດຕະປື

ທ່ານ ກິແກ້ວ ວໍລະວົງສາ ກ່າວວ່າ: ການຝຶກອົບຮົມຄັ້ງນີ້ເປັນເວທີສຳຄັນໃນການແລກປ່ຽນຄວາມຮູ້ ແລະ ປະສົບການ ກ່ຽວກັບການຈັດຕັ້ງປະຕິບັດກົດໝາຍຊັບສິນທາງປັນຍາ ລວມທັງການແກ້ໄຂຂໍ້ຂັດແຍ່ງ ເພື່ອໃຫ້ພະນັກງານລັດ, ນັກທຸລະກິດ ແລະ ພາກສ່ວນກ່ຽວຂ້ອງ ສາມາດນຳຄວາມຮູ້ໄປປັບໃຊ້ໃນວຽກງານຕົວຈິງ.

ປັດຈຸບັນ ກົມຊັບສິນທາງປັນຍາໄດ້ສຳເລັດການສ້າງແຜນຍຸດທະສາດຊັບສິນທາງປັນຍາແຫ່ງຊາດ ໄລຍະປີ 2026-2035 ແລະ ມີວິໄສທັດຮອດປີ 2045 ໂດຍໄດ້ຮັບການສະໜັບສະໜູນຈາກອົງການຊັບສິນທາງປັນຍາໂລກ (WIPO). ແຜນຍຸດທະສາດດັ່ງກ່າວເນັ້ນໃສ່ການສົ່ງເສີມແນວຄິດສ້າງສັນ ແລະ ນະວັດຕະກຳ ເພື່ອປ່ຽນຜົນງານ ແລະ ແນວຄິດຂອງຄົນລາວໃຫ້ເປັນຊັບສິນທີ່ສ້າງມູນຄ່າທາງເສດຖະກິດ ແລະ ປະກອບສ່ວນຕໍ່ການພັດທະນາປະເທດຢ່າງຍືນຍົງ.

ນອກຈາກນັ້ນ ວຽກງານຊັບສິນທາງປັນຍາຍັງເປັນໜຶ່ງໃນ 7 ຈຸດສຸມຂອງແຜນພັດທະນາອຸດສາຫະກຳ ແລະ ການຄ້າ 5 ປີ (2026-2030) ໂດຍເນັ້ນການປົກປ້ອງສິດຊັບສິນທາງປັນຍາ ແລະ ການແກ້ ໄຂຂໍ້ຂັດແຍ່ງ. ຜ່ານມາ ກົມຊັບສິນທາງປັນຍາໄດ້ສຸມໃສ່ປັບປຸງກົດໝາຍໃຫ້ສອດຄ່ອງກັບຂໍ້ຕົກ ລົງສາກົນ ເຊັ່ນ: ສັນຍາ TRIPS ຂອງອົງການການຄ້າໂລກ ແລະ ແຜນປະຕິບັດວຽກງານຊັບສິນທາງປັນຍາອາຊຽນ (ASEAN IPR Action Plan) ພ້ອມທັງປະສານງານກັບພາກສ່ວນກ່ຽວຂ້ອງໃນການກວດກາ ແລະ ຢຶດສິນຄ້າປອມແປງ ລວມເຖິງການນຳໃຊ້ມາດຕະການທາງບໍລິຫານຕໍ່ຜູ້ລະເມີດ ເພື່ອປົກປ້ອງສິດຂອງເຈົ້າຂອງຜົນງານ ແລະ ສ້າງຄວາມເຊື່ອໝັ້ນໃຫ້ແກ່ການຄ້າ ແລະ ການລົງທຶນ.

ສຳລັບເນື້ອໃນການອົບຮົມ ປະກອບມີ: ການບັນຍາຍ ແລະ ແລກປ່ຽນບົດຮຽນຈາກວິທະຍາກອນສູນກາງ ໃນຫົວຂໍ້ການບັງຄັບໃຊ້ກົດໝາຍຊັບສິນທາງປັນຍາ, ການຄຸ້ມຄອງລິຂະສິດ ແລະ ສິດກ່ຽວຂ້ອງ, ການປົກປ້ອງເຄື່ອງໝາຍການຄ້າ ແລະ ການແກ້ໄຂຂໍ້ຂັດແຍ່ງດ້ານຊັບສິນທາງປັນຍາ ເພື່ອເສີມສ້າງຄວາມເຂັ້ມແຂງໃຫ້ແກ່ວຽກງານບັງຄັບໃຊ້ກົດໝາຍໃນທ້ອງຖິ່ນ.

ຂ່າວ: ວັດທະນາ