ທ່ານ ພົຕ ສົມຫວັງ ທໍາມະສິດ ກ່າວວ່າ: ການກໍາເນີດ ແລະ ເຕີບໃຫຍ່ຂອງກໍາລັງ ປກສ ປະຊາຊົນລາວ ແມ່ນມີຄວາມໝາຍສໍາຄັນທາງດ້ານການເມືອງອັນໃຫຍ່ຫຼວງ ໃນປະຫວັດສາດຂອງຊາດລາວ ໃນໄລຍະ 65 ປີກ່ອນໜ້ານີ້, ຊຶ່ງເປັນໄລຍະທີ່ພັກປະຊາຊົນ ປະຕິວັດລາວ ໄດ້ນໍາພາກອງທັບ ແລະ ປະຊາຊົນລາວບັນດາເຜົ່າ, ດໍາເນີນການຕໍ່ສູ້ເພື່ອປົກປັກຮັກສາສອງແຂວງເຕົ້າໂຮມ ໃຫ້ເປັນເຂດທີ່ໝັ້ນຂອງການປະຕິວັດ ແລະ ເພື່ອຕີເອົາຊະນະສົງຄາມພິເສດ ແລະ ສົງຄາມພິເສດເພີ່ມທະວີຂອງຈັກກະພັດລ່າເມືອງຂຶ້ນແບບໃໝ່ ເພື່ອຕອບສະໜອງຄວາມຮຽກຮ້ອງຕ້ອງການຂອງການປະຕິວັດ. ດັ່ງນັ້ນ, ສູນກາງພັກ ຈຶ່ງໄດ້ເປີດກອງປະຊຸມຂຶ້ນຢູ່ຄັງໄຂ ແຂວງຊຽງຂວາງໃນລະຫວ່າງວັນທີ 5-12 ເມສາ 1961 ກອງປະຊຸມໄດ້ຄົ້ນຄວ້າ ແລະ ໄດ້ຕົກລົງປັບປຸງກໍ່ສ້າງກໍາລັງປ້ອງກັນພາຍໃນ ຢູ່ຂອບເຂດທົ່ວປະເທດ ແລະ ກອງປະຊຸມຍັງໄດ້ຕົກລົງປ່ຽນຊື່ຈາກ “ຄະນະປ້ອງກັນພາຍໃນ” ມາເປັນ “ຫ້ອງການປ້ອງກັນຄວາມສະຫງົບສູນກາງ” ໂດຍແມ່ນທ່ານ ສີສົມພອນ ລໍວັນໄຊ ເປັນຜູ້ຊີ້ນໍາ, ຜ່ານໄລຍະປະຫວັດສາດດັ່ງກ່າວ, ສູນກາງພັກ, ລັດຖະບານ ຈຶ່ງໄດ້ຕົກລົງອອກດໍາລັດສະບັບເລກທີ 277/ນຍ, ລົງວັນທີ 1 ກັນຍາ 2005 ຮັບຮອງເອົາວັນທີ 5 ເມສາ 1961 ເປັນວັນສ້າງຕັ້ງກໍາລັງ ປກສ ຢ່າງເປັນທາງການ.
ຫຼັງຈາກມີຜູ້ນໍາພາບັນຊາແລ້ວ, ກໍາລັງ ປກສ ປະຊາຊົນລາວ ກໍໄດ້ຮ່ວມກັບກອງທັບ ແລະ ປະຊາຊົນລາວບັນດາເຜົ່າ ດໍາເນີນການຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ ແລະ ສາມາດຕີເອົາຊະນະສັດຕູຈາກບັ້ນຮົບນີ້ ສູ່ບັນຮົບໃໝ່ເພີ່ມຂຶ້ນເລື້ອຍໆ ຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ໄດ້ສະຖາປະນາ ເປັນສາທາລະ ນະລັດ ປະຊາທິປະໄຕ ປະຊາຊົນລາວໃນວັນທີ 2 ທັນວາ 1975 ແລະ ໄດ້ສືບຕໍ່ເປັນກໍາລັງຫຼັກແຫຼ່ງໃນການປະຕິບັດ 2 ໜ້າທີ່ຍຸດທະສາດຂອງພັກ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ພົ້ນເດັ່ນແມ່ນການຈັດຕັ້ງຜັນຂະຫຍາຍແນວທາງປ່ຽນແປງໃໝ່ຮອບດ້ານຂອງພັກ ແລະ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ.
ຜ່ານການຕໍ່ສູ້ຮ່ວມກັບກອງທັບ ແລະ ປະຊາຊົນລາວບັນດາເຜົ່າໃນບັ້ນຮົບຕ່າງໆ ພ້ອມທັງການປະຕິບັດ 2 ໜ້າທີ່ຍຸດທະສາດຂອງພັກ ໃນຕະຫຼອດ 65 ປີຜ່ານມາ, ໄດ້ມີກໍາລັງ ປກສ ຈໍານວນບໍ່ໜ້ອຍທີ່ໄດ້ເສຍສະຫຼະຊີວິດ, ເລືອດເນື້ອ, ເຫື່ອແຮງ ແລະ ສະຕິບັນຍາຂອງຕົນ ເຮັດໃຫ້ພະນັງານໃນກໍາລັງ ປກສ ຫຼາຍສະຫາຍໄດ້ກາຍເປັນນັກຮົບດີເດັ່ນ, ນັກຮົບແຂ່ງຂັນ, ວິລະຊົນແຫ່ງຊາດ ແລະ ໄດ້ກາຍເປັນການນໍາຂັ້ນສູງຂອງພັກ-ລັດ.
ໃນຂະນະດຽວກັນ, ເຖິງແມ່ນວ່າກໍາລັງ ປກສ ພວກເຮົາ ໄດ້ເຮັດສໍາເລັດໜ້າທີ່ ແລະ ມີຜົນງານຢ່າງຫຼວງ ຫຼາຍມາແລ້ວກໍດີ, ຖ້າອີງໃສ່ຄວາມຮຽກຮ້ອງຕ້ອງການ ແລະ ໃນສະພາບການໃໝ່ຂອງໂລກ, ພາກພື້ນ ແລະ ຢູ່ພາຍໃນຊາດ ກໍາລັງ ປກສ ຍັງຕ້ອງໄດ້ເສີມຂະຫຍາຍທາດແທ້ ແລະ ມູນເຊື້ອຂອງກໍາລັງ ປກສ ປະຊາຊົນໄປພ້ອມກັນກັບການປະຕິບັດໜ້າທີ່ການເມືອງຂອງຕົນໃຫ້ສູງຂຶ້ນອີກບາດກ້າວໜຶ່ງ ເພື່ອຄວາມສະຫງົບປອດໄພຂອງສັງຄົມ ແລະ ເພື່ອຄວາມຈະເລີນຮຸ່ງເຮືອງສີວິໄລໃຫ້ຊາດລາວວິລະຊົນ.
ເນື່ອງໃນໂອກາດອັນມີຄວາມໝາຍສຳຄັນນີ້, ຂໍອວຍພອນໄຊແດ່ການນໍາພັກ-ລັດ ຈົ່ງມີສຸຂະພາບເຂັ້ມແຂງ ນໍາພາປະເທດຊາດໃຫ້ຈະເລີນຮຸ່ງເຮືອງ ເຂັ້ມແຂງໃນທຸກດ້ານ, ອວຍພອນໄຊແດ່ການນໍາພາ-ບັນຊາ ຂອງກະຊວງ ປກສ ແລະ ພະນັກງານ-ນັບຮົບທຸກສະຫາຍ ຈົ່ງມີສຸຂະພາບເຂັ້ມແຂງອອກແຮງແຂ່ງຂັນກັນ ນໍາພາ-ບັນຊາ ແລະ ຈັດຕັ້ງປະຕິບັດພາລະກິດປ້ອງກັນຄວາມສະຫງົບໃຫ້ມີຄວາມໜັກແໜ້ນ, ເຂັ້ມແຂງຂຶ້ນເລື້ອຍໆ. ອວຍພອນພະນັກ ງານປະຕິວັດອາວຸໂສບໍານານ ຈົ່ງມີສຸຂະພາບແຮງແຮງ ຈົ່ງຮັກສາມູນເຊື້ອປະຕິວັດ ແລະ ເປັນແບບຢ່າງໃຫ້ລູກຫຼານໃນກໍາລັງ ປກສ ໃນການດໍາລົງຊີວິດບັ້ນປາຍຂອງພວກເຮົາ.
ຄໍາເຫັນ