 |
ທ່ານ ນາງ ຄໍາໄພ ວິລະສານ ຫົວໜ້າຫ້ອງວ່າການ ສະພາປະຊາຊົນແຂວງ ໄດ້ລາຍງານການຈັດຕັ້ງປະຕິບັດ ການພົວພັນ ລະຫວ່າງ ສະພາປະຊາຊົນແຂວງ ກັບ ອົງການປົກຄອງແຂວງ ໃນໄລຍະ 6 ເດືອນທ້າຍປີ 2025 ຜ່ານມາ ໂດຍຄະນະປະຈໍາສະພາປະຊາຊົນແຂວງ ໄດ້ເອົາໃຈໃສ່ນໍາພາ-ຊີ້ນໍາຄະນະກຳມະການຍຸຕິທໍາ ແລະ ປກຊ-ປກສ ປະສານສົມທົບກັບອົງການປົກຄອງແຂວງ ເຄື່ອນໄຫວ ແລະ ຊຸກຍູ້ບັນດາພະແນກການ, ພາກສ່ວນທີ່ກ່ຽວຂ້ອງ ໃນການສ້າງ ແລະ ປັບປຸງນິຕິກຳໃຕ້ກົດໝາຍ ໄດ້ເກີນແຜນຂອງສະພາຊຸດທີ IV ກຳນົດ; ປະສານສົມທົບກັນ ກະກຽມບັນດາເນື້ອໃນກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງ ຊຸດທີ V ຈໍານວນ 10 ເນື້ອໃນ, ອອກເປັນມະຕິກອງປະຊຸມສະພາປະຊາຊົນແຂວງ ຈໍານວນ 9 ສະບັບ; ຊີ້ນໍາຄະນະກຳມະການທີ່ກ່ຽວຂ້ອງ ເຂົ້າຮ່ວມຄົ້ນຄວ້າປຶກສາຫາລືກ່ຽວກັບ ການແກ້ໄຂຄໍາຮ້ອງທຸກ, ຄໍາຮ້ອງຂໍຄວາມເປັນທໍາ ຂອງພໍ່ແມ່ປະຊາຊົນ ແລະ ຕິດຕາມຄໍາສະເໜີໃນປີຜ່ານມາ ມີຈໍານວນ 5 ເລື່ອງ, ໄດ້ແຈ້ງການໃຫ້ອົງການປົກຄອງແຂວງ ໂດຍສະເພາະ ພາກສ່ວນກ່ຽວຂ້ອງກັບຄໍາສະເໜີຂອງພໍ່ແມ່ປະຊາຊົນຜ່ານສາຍດ່ວນ ທີ່ສະເໜີໃນກອງປະຊຸມສະໄໝສາມັນ ເທື່ອທີ 10 ຂອງສະມາຊິກສະພາປະຊາຊົນແຂວງ ຊຸດທີ IV ຈໍານວນ 2 ເລື່ອງ; ເຄື່ອນ ໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ ແລະ ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ຢູ່ 4 ເມືອງ ໃນບັນດາເປົ້າໝາຍ ຂອງສະມາຊິກສະພາປະຊາຊົນແຂວງ ໄດ້ 7 ຄັ້ງ, ລົງຜັນຂະຫຍາຍຜົນສໍາເລັດກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ IV ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງ ຢູ່ 4 ເມືອງ ຈັດຕັ້ງປະຕິບັດໄດ້ 33 ຈຸດ, ມີຈຳນວນຜູ້ເຂົ້າຮ່ວມທັງໝົດ 15,636 ຄົນ ຍິງ 7,578 ຄົນ ຕິດພັນກັບການລົງໂຄສະນາຫາສຽງໃຫ້ແກ່ຜູ້ຮັບສະໝັກເລືອກຕັ້ງ ສສຊ-ສສຂ.
 |
ກອງປະຊຸມຄັ້ງນີ້, ຍັງໄດ້ຜ່ານຮ່າງແຜນການກະກຽມ ແລະ ດໍາເນີນກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງ ຊຸດທີ V; ລາຍງານການກະກຽມຄວາມພ້ອມດ້ານເນື້ອໃນຕ່າງໆ ຂອງອົງການປົກຄອງແຂວງ ແລະ ເອກະສານອື່ນໆທີ່ກ່ຽວຂ້ອງ ທີ່ຈະນໍາເຂົ້າພິຈາລະນາ, ຮັບຮອງເອົາໃນກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງ ຊຸດທີ V ທີ່ຈະໄຂຂຶ້ນໃນມໍ່ໆນີ້; ຈາກນັ້ນ, ຜູ້ເຂົ້າຮ່ວມ ໄດ້ພ້ອມກັນຄົ້ນຄ້ວາ ແລະ ປະກອບຄຳຄິດຄຳເຫັນໃສ່ບັນດາເນື້ອໃນເອກະສານສໍາຄັນດັ່ງກ່າວ ໃຫ້ສົມບູນ.
(ຂ່າວ: ພຸດທະສອນ)
ຄໍາເຫັນ