 |
ສະຫາຍ ຄໍາຄ່ອງ ພົມມະປັນຍາ ໄດ້ລາຍງານຫຍໍ້ ສະພາບການຈັດຕັ້ງປະຕິບັດວຽກງານໂຄສະນາອົບຮົມໃນໄລຍະຜ່ານມາວ່າ: ຄະນະໂຄສະນາອົບຮົມແຂວງ ແມ່ນອົງການຈັດຕັ້ງໜຶ່ງ ຊຶ່ງມີຖານະທຽບເທົ່າກັບພະແນກ ການ-ອົງການຈັດຕັ້ງຕ່າງໆຂັ້ນແຂວງ ມີພາລະບົດບາດ, ໜ້າທີ່ເປັນເສນາທິການດ້ານວຽກງານການເມືອງ-ແນວຄິດ, ທິດສະດີຂອງພັກໃຫ້ຄະນະປະຈໍາພັກແຂວງໃນການຈັດຕັ້ງຄົ້ນຄວ້າ, ເຜີຍແຜ່-ເຊື່ອມຊຶມ ແລະ ຈັດຕັ້ງຜັນຂະຫຍາຍແນວທາງ-ນະໂຍບາຍ, ມະຕິ, ຄໍາສັ່ງຂອງພັກ-ລັດວາງອອກໃນແຕ່ລະໄລຍະ ພ້ອມທັງຕິດຕາມ, ເກັບກໍາສະພາບແນວຄິດຈິດໃຈ-ຫາງສຽງສັງຄົມທົ່ວແຂວງ ເພື່ອຮັບຮູ້ຕໍ່ການປະຕິບັດແນວທາງ-ນະໂຍບາຍ, ລະບຽບກົດໝາຍ, ດ້ານຕັ້ງໜ້າ ແລະ ດ້ານຫຍໍ້ທໍ້ເພື່ອສັງລວມ-ລາຍງານໃຫ້ຄະນະພັກຂັ້ນເທິງ, ພາຍຫຼັງໄດ້ປະກາດໂອນມອບ-ຮັບຜ່ານມາ, ພະນັກງານພາຍໃນຄະນະໂຄສະນາອົບຮົມແຂວງເພີ່ມເປັນ 63 ຄົນ ຍິງ 18 ຄົນ ປະກອບມີ 5 ຂະແໜງການຄື: ຂະແໜງໂຄສະນາ, ຂະແໜງອົບຮົມ, ຂະແໜງສັງລວມ ແລະ ຂໍ້ມູນຂ່າວ ສານ, ຂະແໜງສື່ມວນຊົນ ແລະ ຂະແໜງບໍລິຫານ. ໃນນັ້ນ, ດ້ານວິຊາສະເພາະ ຂະແໜງໂຄສະນາໄດ້ເອົາໃຈ ໃສ່ຈັດຕັ້ງເຜີຍແຜ່-ເຊື່ອມຊຶມ ແລະ ຜັນຂະຫຍາຍບັນດາມະຕິກອງປະຊຸມໃຫຍ່ທີ່ສຳຄັນຂອງພັກ, ໂຄສະນາ-ປາຖະກະຖາວັນປະຫວັດສາດທີ່ສຳຄັນຂອງພັກ-ຂອງຊາດ ຂອງສາກົນ, ຂະແໜງສື່ມວນຊົນໄດ້ເຄື່ອນໄຫວຢ່າງແຂງແຮງໃນການປະຕິບັດໜ້າທີ່ສື່ມວນຊົນ ເປັນຕົ້ນແມ່ນຄຸ້ມຄອງ-ນໍາໃຊ້ພາຫະນະສື່, ຕິດຕາມເກັບກຳຂ່າວ-ຂຽນຂ່າວ, ບົດຕ່າງໆ ອອກທາງວິທະຍຸ, ໂທລະພາບ, ໜັງສືພິມ, ວາລະສານ, ເວັບໄຊ, ເຟສບຸກ. ສຳລັບວຽກງານການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກແຂວງ ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ໄດ້ເຜີຍແຜ່ອອກທາງສື່ຕ່າງໆໃນທົ່ວແຂວງ. ນອກນັ້ນ, ກໍຍັງໄດ້ຮ່າງນິຕິກໍາ (ເອກະສານເຊື່ອຊຶມ).
 |
ໂອກາດນີ້, ສະຫາຍ ຄໍາມອນ ຈັນທະຈິດ ໄດ້ສະແດງຄວາມຍ້ອງຍໍຊົມເຊີຍຕໍ່ຈິດໃຈບຸກບືນຫ້າວຫັນຂອງຄະນະພັກ, ຄະນະນໍາໃນການຈັດຕັ້ງປະຕິບັດວຽກງານທີ່ມີຜົນສໍາເລັດໃນໄລຍະທີ່ຜ່ານມາ ແລະ ໄດ້ເນັ້ນໃຫ້ສືບຕໍ່ນໍາພາ-ຊີ້ນໍາວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກພັກ-ພະນັກງານມີຄວາມເຊື່ອໝັ້ນຕໍ່ການນຳພາຂອງພັກ ແລະ ປະຕິບັດກົດລະບຽບຂອງພັກຢ່າງຖືກຕ້ອງ. ໃນນັ້ນ, ເອົາໃຈໃສ່ຊີ້ນຳວຽກງານຫ້ອງການໃຫ້ຖືກຕ້ອງຕາມພາລະບົບາດ ຕິດຕາມເອົາໃຈໃສ່ວຽກງານຫາງສຽງສັງຄົມ, ເອົາໃຈໃສ່ວຽກງານໂຄສະນາແນວທາງນະໂຍບາຍຂອງພັກ ແລະ ວຽກງານພັດທະນາເສດຖະກິດ-ສັງຄົມໃຫ້ມີຄວາມວ່ອງໄວ, ທັນການ. ໃນນັ້ນ, ວຽກງານອົບຮົມເຮັດແນວໃດເພື່ອໃຫ້ປະຊາຊົນບັນດາເຜົ່າມີຄວາມເຂົ້າໃຈຕໍ່ແນວທາງນະໂຍບາຍຂອງພັກ ແລະ ສ້າງຄວາມຮັບຮູ້ເຂົ້າໃຈໃຫ້ປະຊາຊົນ ປະກອບສ່ວນເຂົ້າໃນການພັດທະນາ ແລະ ສ້າງສາປະເທດຊາດ, ນຳພາ-ຊີ້ນຳ ວຽກງານສື່ມວນຊົນ, ສ້າງເຄືອຂ່າຍສື່ມວນຊົນ ແລະ ນັກສື່ມວນຊົນໃຫ້ຫຼາກຫຼາຍ ແລະ ວຽກງານອື່ນໆ.
 |
ໂອກາດດັ່ງກ່າວ, ທ່ານ ຄໍາມອນ ຈັນທະຈິດ ໄດ້ມອບປຶ້ມທິດສະດີ ແລະ ພຶດຕິກໍາ ສ້າງປະຖົມປັດໄຈຕາມເສັ້ນທາງກ້າວຂຶ້ນສັງຄົມນິຍົມ, ການສ້າງລັດທີ່ປົກຄອງດ້ວຍກົດໝາຍຢູ່ສປປ ລາວ ແລະ ສະຫຼຸບ 40 ປີແຫ່ງການປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກປະຊາຊົນ ປະຕິບັດລາວຈໍານວນ 30 ຫົວໃຫ້ຄະນະໂຄສະນາອົບຮົມແຂວງຫຼວງພະບາງ ເພື່ອນຳໃຊ້ເຂົ້າໃນການເຄື່ອນໄຫວວຽກງານໂຄສະນາຂອງແຂວງ.
ຂ່າວ: ວັນເພັງ, ພາບ: ຄະນະໂຄສະນາອົບຮົມແຂວງຫຼວງພະບາງ
ຄໍາເຫັນ