ຮອງຫົວໜ້າ ຄອສພ ພ້ອມການນຳເມືອງໄຊຈຳພອນ ພົບປະຊາຊົນ ບ້ານວັງບານ

ທ່ານ ໄກຢາງ ເຢຍປາວ ນາຍບ້ານວັງບານ ໄດ້ລາຍງານຫຍໍ້ໃຫ້ຮູ້ວ່າ: ບ້ານວັງບານເປັນບ້ານເປົ້າໝາຍໃນການພັດທະນາຂອງເມືອງໄຊຈຳພອນ, ປະກອບມີ 110 ຄົວເຮືອນ, ມີປະຊາກອນ 767 ຄົນ ຍິງ 335 ຄົນ, ມີ 158 ຄອບຄົວ, ມີເນື້ອທີ່ບ້ານທັງໝົດ 77 ພັນກວ່າຕາແມັດ, ປະຊາຊົນພາຍໃນບ້ານແມ່ນເຮັດໄຮ່, ເຮັດນາ, ປູກຝັງ ແລະ ລ້ຽງສັດເປັນອາຊີບຫຼັກ, ປະກອບມີ 3 ຊົນເຜົ່າຄື: ຊົນເຜົ່າມົ້ງ, ຕູມ ແລະ ຊົນເຜົ່າລາວ, ມີໂຮງຮຽນປະຖົມ 1 ແຫ່ງ, ມີ 1 ໜ່ວຍພັກ.

ໃນໂອກາດຢ້ຽມຢາມ ແລະ ພົບປະປະຊາຊົນບ້ານດັ່ງກ່າວ, ທ່ານ ລາວປາວຊົ່ງ ນະວົງໄຊ ໄດ້ອະທິບາຍໃຫ້ປະຊາຊົນພາຍໃນບ້ານຮູ້ກ່ຽວກັບຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກປະຊາຊົນ ປະຕິວັດລາວ, ກ່ຽວກັບການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ກ່ຽວກັບພາລະບົດບາດຂອງເລຂາພັກມືອງ, ຄະນະກຳມະການປົກຄອງເມືອງ. ໃນນັ້ນ, ໄດ້ເນັ້ນໃຫ້ປະຊາຊົນບ້ານວັງບານຈົ່ງພ້ອມກັນສາມັກຄີກັນເປັນປຶກແຜ່ນ ແລະ ຊ່ວຍເຫຼືອ ຊຶ່ງກັນ ແລະ ກັນ, ພ້ອມກັນປະຕິບັດຕາມຄຳສັ່ງຂອງເມືອງວາງອອກ ກໍຄືຂອງພັກ ແລະ ລັດຖະບານຢ່າງຖືກຕ້ອງ, ແຕ່ລະເຜົ່າຕ້ອງຢູ່ຮ່ວມກັນດ້ວຍຄວາມສາມັກຄີປອງດອງ ພ້ອມກັນພັດທະນາບ້ານ, ເມືອງ ແລະ ປະເທດຊາດໃຫ້ມີຄວາມຈະເລີນກ້າວໜາຂຶ້ນເລື້ອຍໆ, ຕ້ອງຮູ້ຈັກປົກປັກຮັກສາສິ່ງແວດລ້ອມ, ຮູ້ຈັກນຳໃຊ້ທິ່ດິນ ແລະ ສິດນຳໃຊ້ທີ່ດິນໃຫ້ຖືກຕ້ອງ, ໃນນັ້ນ, ຈົ່ງພ້ອມກັນເອົາໃຈໃສ່ຕໍ່ວຽກງານສາທາລະນະສຸກ, ໂດຍເພາະແມ່ມານຖືພາຈົ່ງໝັ່ນໄປຕິດຕາມຢູ່ໂຮງໝໍເພື່ອຄວາມປອດໄພໃນເວລາເກີດລູກ, ພ້ອມກັນນັ້ນຈົ່ງຊຸກຍູ້ສົ່ງເສີມບັນດາລູກຫຼານໃຫ້ໄດ້ເຂົ້າໂຮງຮຽນຢ່າງຕໍ່ເນື່ອງ.

ໂອກາດດັ່ງກ່າວ, ອົງການປົກຄອງເມືອງໄຊຈຳພອນ ຍັງໄດ້ມອບດອກໄຟໂຊລາເຊວ ຈຳວນ 10 ດອກ ລວມມີມູນຄ່າ 13 ລ້ານກີບໃຫ້ແກ່ບ້ານດັ່ງກ່າວ.

(ຂ່າວ-ພາບ: ສຳນານ)