ຫ້ອງການກະສິກໍາ-ປ່າໄມ້ ເມືອງພີນ ຈັດພິທີສັກຢາປ້ອງກັນພະຍາດສັດ

ຫ້ອງການສິກະກໍາ ແລະປ່າໄມ້ເມືອງພີນ ແຂວງສະຫວັນນະເຂດ ໄດ້ຈັດພິທີສັກຢາກັນພະຍາດສັດແຫ່ງຊາດ ທີ່ບ້ານຫີນສະໂງມ, ໂດຍມີທ່ານ ຈິດສະໝອນ ດອນປະເສີດ ຮອງເຈົ້າເມືອງພີນ, ບັນດາຫົວໜ້າ-ຄະນະຫ້ອງການ, ພະນັກງານ, ທະຫານ, ຕໍາຫຼວດ ພ້ອມດ້ວຍປະຊາຊົນພາຍໃນບ້ານ ແລະບ້ານອ້ອມຂ້າງເຂົ້າຮ່ວມ.
       ໃນໂອກາດນີ້, ທ່ານ ນາງ ໜູ ຄໍາຫຼວຍ ຫົວໜ້າຫ້ອງການກະສິກໍາ ແລະປ່າໄມ້ເມືອງ ກໍໄດ້ກ່າວຈຸດປະສົງຂອງການຈັດງານ ໃນຄັ້ງນີ້ວ່າ: ເພື່ອເປັນການສ້າງຂະບວນການ ແລະຈັດຕັ້ງປະຕິບັດກົດໝາຍ ວ່າດ້ວຍການລ້ຽງສັດ ແລະ ສັດຕະວະແພດ ຊຶ່ງໄດ້ກໍານົດເອົາວັນທີ 11 ພະຈິກ ຂອງທຸກໆປີ ເປັນວັນສັກຢາກັນພະຍາດສັດແຫ່ງຊາດຂອງລາວເຮົາ ແລະຖືເອົາວັນດັ່ງກ່າວນີ້ເປັນການເລີ່ມສັກຢາປ້ອງກັນພະຍາດສັດຂອງທຸກປີ ເນື່ອງຈາກວ່າເປັນໄລຍະກ້າວເຂົ້າສູ່ລະດູໜາວ ພະຍາດຈະມັກເກີດກັບສັດໄດ້ງ່າຍ ແລະເພື່ອສ້າງຈິດສໍານຶກໃຫ້ ປະຊາຊົນຫັນມາເອົາໃຈໃສ່ ຫຼັກວິຊາການເຕັກນິກການປ້ອງກັນພະຍາດສັດຢ່າງຖືກວິທີ, ປຸກລະດົມສ້າງຂະບວນການສັກຢາປ້ອງກັນພະຍາດສັດລ້ຽງໃຫ້ຟົດຟື້ນ, ເພື່ອເປັນການຜະລິດສະບຽງອາຫານ, ສ້າງແຫຼ່ງເສດຖະກິດ, ສ້າງສະຕິ ແລະປົກປັກຮັກສາຄຸ້ມຄອງສັດລ້ຽງຂອງຊາວກະສິກອນບັນດາເຜົ່າ ໃຫ້ມີການຂະຫຍາຍຕົວເພີ່ມຂຶ້ນ, ອະນຸລັກແນວພັນສັດພື້ນເມືອງບໍ່ໃຫ້ສູນພັນ, ເຮັດໃຫ້ສັດມີສຸຂະພາບແຂງແຮງທົນທານຕໍ່ພະຍາດ, ລ້ຽງງ່າຍ, ໃຫຍ່ໄວ, ໃນປັດຈຸບັນທົ່ວເມືອງພີນ ມີອາສາສະໝັກສັດຕະວະແພດຂັ້ນບ້ານທັງໝົດ 198 ຄົນ ເຮັດໜ້າທີ່ໃນການຕິດຕາມກວດກາພະຍາດສັດລ້ຽງ, ສັກຢາກັນພະຍາດສັດລ້ຽງຂອງຊາວກະສິກອນ ໃນບ້ານຂອງຕົນ, ທົ່ວເມືອງມີຝູງສັດລ້ຽງ ລວມທັງໝົດມີ: 379.913 ໂຕ, ໃນນັ້ນມີ: ຄວາຍ 16.016ໂຕ, ງົວ 24.688 ໂຕ, ໝູ 18.796 ໂຕ, ແບ້ 23.642 ໂຕ, ສັດປີກ 296.771 ໂຕ. ການຜະລິດສັດລ້ຽງເປັນສິນຄ້າ: ມີຟາມງົວ 2 ຟາມ, ຕົວແບບລ້ຽງງົວ 1 ຄອບຄົວ, ມີງົວລ້ຽງ ລວມ 407 ໂຕ, ມີຟາມໝູ 5 ຟາມ, ກຸ່ມຊາວກະສິກອນລ້ຽງໝູ 51 ຄອບຄົວ, ມີໝູລ້ຽງລວມ 7.586ໂຕ.
ໃນໄລຍະ 9 ເດືອນ ປີ 2023 ຜ່ານມານີ້, ຊາວກະສິກອນເອົາໃຈໃສ່ສັກຢາປ້ອງກັນພະຍາດສັດຂອງຕົນບັນລຸໄດ້ຄື: ຄວາຍ 709ໂຕເທົ່າກັບ 4,4% ຂອງຝູງຄວາຍ, ງົວ 2.892ໂຕເທົ່າກັບ 11,7%; ມີການສະໜອງຜະລິດສັດລ້ຽງໃຫ້ຕະຫຼາດພາຍໃນເມືອງ ແລະ ສົ່ງອອກນອກເມືອງບັນລຸໄດ້: ຄວາຍ 125 ໂຕ, ງົວ 495 ໂຕ, ແບ້ 765 ໂຕ, ໝູ 4.861 ໂຕ ແລະ ສັດປີກ 8.420 ໂຕ ແລະ ຄາດໝາຍສູ້ຊົນດໍາເນີນການສັກຢາປ້ອງກັນພະຍາດສັດລ້ຽງໃນແຕ່ລະປະເພດໃຫ້ບັນລຸໄດ້ ຄວາຍ 80% ງົວ 80% ໝູ 30% ແລະສັດປີກ 40%.
ຂ່າວ-ພາບ: ສະຫວັນນະເຂດ