ຮອງລັດຖະມົນຕີກະຊວງ ປກສ ຢ້ຽມຢາມໂອ້ລົມຄະນະນຳ ປກສ ແຂວງອັດຕະປື

ໂອກາດນີ້, ສະຫາຍ ພັອ ບູນເລີດ ແກ້ວພຸດທະວົງ ໄດ້ລາຍງານສະພາບປະກົດການຫຍໍ້ທໍ້ໂດຍລວມໃຫ້ທ່ານຮອງລັດຖະມົນຕີ ກະຊວງ ປກສ ພ້ອມດ້ວຍຄະນະຮັບຊາບ. ຊຶ່ງຕະຫຼອດໄລຍະ 6 ເດືອນຕົ້ນປີ 2026 ມີຄະດີເກີດຂຶ້ນທັງໝົດ 73 ເລື່ອງ, ກັກຜູ້ຖືກຫາໄດ້ 82 ຄົນ ຍິງ 10 ຄົນ, ຄົນຕ່າງປະເທດ 8 ຄົນ, ຄະດີອຸບັດເຫດເກີດຂຶ້ນ 193 ລາຍ, ພາຫະນະເປ່ເພ 314 ຄັນ, ມີຄົນໄດ້ຮັບບາດເຈັບ 286 ຄົນ ຍິງ 84 ຄົນ, ເສຍຊີວິດ 10 ຄົນ, ມີອັກຄີໄພເກີດຂຶ້ນ 2 ຄັ້ງ, ທັບມ້າງເປົ້າໝາຍຄ້າຂາຍຢາເສບຕິດໄດ້ 26 ເລື່ອງ ສາມາດກັກຜູ້ຖືກຫາໄດ້ 59 ຄົນ ຍິງ 3 ຄົນ, ຄົນຕ່າງປະເທດ 1 ຄົນ (ສັນຊາດຫວຽດນາມ), ຍຶດຂອງກາງຢາບ້າໄດ້ 25,125 ເມັດ ພ້ອມດ້ວຍວັດຖຸມີຄ່າຈຳນວນໜຶ່ງ. ນອກນັ້ນ, ສະຫາຍຍັງໄດ້ຍົກໃຫ້ເຫັນວຽກງານກໍ່ສ້າງຮາກຖານ, ວຽກງານກໍ່ສ້າງພະນັກງານ, ວຽກງານຄຸ້ມຄອງຄົນຕ່າງປະເທດ, ວຽກງານພະລາທິການ, ວຽກງານກວດກາຄົນເຂົ້າ-ອອກເມືອງ.

ສະຫາຍ ພົຕ ແອນ ອຸ່ນອະນົງນຸດ ໄດ້ຊີ້ນຳຕໍ່ຄະນະພັກ-ຄະນະກອງບັນຊາການແຕ່ລະຂັ້ນ ເອົາໃຈໃສ່ໃນການສຶກສາອົບຮົມ ການເມືອງ-ນຳພາແນວຄິດໃຫ້ພະນັກງານຫຼັກແຫຼ່ງ ນາຍ ແລະ ພົນຕຳຫຼວດທົ່ວກອງບັນຊາການໃຫ້ເປັນປົກກະຕິ ຕໍ່ເນື່ອງ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ກໍຄືຂອງກຳລັງ ປກສ ໃຫ້ມີຄວາມໜັກແໜ້ນເຂັ້ມແຂງທາງດ້ານການຈັດຕັ້ງ, ມີລະບຽບວິໃນເຂັ້ມງວດ, ປັບປຸງແບບ ແຜນວິທີເຮັດວຽກໃຫ້ທັນສະໄໝ, ມີຄວາມເປັນເອກະພາບພາຍໃນໝູ່ຄະນະ, ເອົາໃຈໃສ່ປັບປຸງເຮັດວຽກງານການຈັດຕັ້ງທຸກຂັ້ນໃຫ້ແທດເໝາະກັບຄວາມຮຽກຮ້ອງຕ້ອງການໃນໜ້າທີ່ການເມືອງ, ປະຕິບັດຫຼັກການລວມສູນປະຊາທິປະໄຕ, ມີຄວາມສາມັກຄີພາຍໃນຄະນະພັກ, ກຳໃຫ້ໄດ້ສະພາບປະກົດການຫຍໍ້ທໍ້ພາຍໃນກຳລັງ ພ້ອມທັງກຳແໜ້ນສະພາບການຂອງສັດຕູ-ກຸ່ມຄົນບໍ່ດີ, ແກ້ໄຂໜໍ່ແໜງກໍ່ຄວາມບໍ່ສະຫງົບທາງດ້ານການເມືອງ ແລະ ປະກົດການຫຍໍ້ທໍ້ໃນສັງຄົມໃຫ້ດີຂຶ້ນ, ຖືກຕ້ອງ, ຊັດເຊນ, ເອົາໃຈໃສ່ປັບປຸງວຽກງານສັນຕິບານເປັນຫຼັກ, ກຳ ແໜ້ນສະພາບການເຂົ້າ-ອອກເມືອງ, ສືບຕໍ່ຫັນພະນັກງານລົງກໍ່ສ້າງຮາກຖານຢູ່ບັນດາຈຸດສຸມ ແລະ ເຂດຫຼໍ່ແຫຼມ, ປຸກລະດົມປະຊາຊົນໃຫ້ເຂົ້າໃຈແນວທາງຂອງພັກ-ລັດ ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ສະຖຽນລະພາບທາງດ້ານການເມືອງ, ມີສະຕິລະວັງຕົວ ກຽມພ້ອມເຮັດສຳເລັດໜ້າທີ່ການເມືອງທີ່ໄດ້ຮັບມອບໝາຍ. ຂ່າວ: ປກສ