ຜູ້ຕາງໜ້າຄົນໃໝ່ຂອງອົງການອຸຍນີເຊັບປະຈຳ ສປປ ລາວໃນວັນທີ 12ສິງຫານີ້ ທີ່ກະຊວງການຕ່າງປະເທດ.
ໃນໂອກາດດັ່ງກ່າວ, ທ່ານຮອງລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ດູຣານີທີ່ຖືກແຕ່ງຕັ້ງເປັນຜູ້ຕາງໜ້າອົງການ ອຸຍນີເຊັບປະຈໍາ ສປປ ລາວຄົນໃໝ່, ພ້ອມທັງໄດ້ສະແດງຄວາມຂອບໃຈ ຕໍ່ການສະໜັບສະໜູນ ແລະ ການຮ່ວມມືຢ່າງໃກ້ຊິດຂອງອົງການໃນໄລຍະ 5 ທົດສະວັດທີ່ຜ່ານມາ ແລະ ໄດ້ສະແດງຄວາມເຊື່ອໝັ້ນວ່າ ອົງການອຸຍນີເຊັບ ພາຍໃຕ້ການນໍາພາຂອງຜູ້ຕາງໜ້າຄົນໃໝ່ ຈະສືບຕໍ່ປະກອບສ່ວນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ, ໂດຍສະເພາະໃນຂະແໜງການສຶກສາ, ສາທາລະນະສຸກ, ໂພຊະນາການ, ສຸຂະພິບານ, ຄວາມສະເໝີພາບລະຫວ່າງຍິງ-ຊາຍ, ການສ້າງຄວາມເຂັ້ມແຂງໃຫ້ກັບແມ່ຍິງ ແລະ ໄວໜຸ່ມ, ການປົກປ້ອງເດັກ ແລະ ອື່ນໆ, ໂດຍຜ່ານການຈັດຕັ້ງປະຕິບັດ ແຜນງານການຮ່ວມມືລະຫວ່າງ ສປປ ລາວ ແລະ ອົງການອຸຍນີເຊັບ ສົກປີ 2022-2026 ມູນຄ່າປະມານ 100 ລ້ານ ໂດລາ.
ໃນໂອກາດດຽວກັນນີ້, ທ່ານ ດູຣານີ ໄດ້ສະແດງຄວາມຮູ້ສຶກເປັນກຽດ ທີ່ໄດ້ຮັບການແຕ່ງຕັ້ງເປັນຜູ້ຕາງໜ້າອົງການອຸຍນີເຊັບ ປະຈໍາ ສປປ ລາວຄົນໃໝ່ ແລະ ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ການຮ່ວມມື ຂອງລັດຖະບານ ສປປ ລາວ, ພ້ອມທັງໃຫ້ຄໍາໝັ້ນວ່າໃນໄລຍະເວລາທີ່ປະຕິບັດໜ້າທີ່ຢູ່ ສປປ ລາວ ຈະນໍາພາອົງການອຸຍນີເຊັບ ສືບຕໍ່ຮ່ວມມືຢ່າງໃກ້ຊິດກັບລັດຖະບານ ສປປ ລາວໃນການສົ່ງເສີມສິດທິເດັກໃນ ສປປ ລາວ, ໂດຍສະເພາະການຈັດຕັ້ງປະຕິບັດ ແຜນງານການຮ່ວມມືລະຫວ່າງລັດຖະບານ ສປປ ລາວ ແລະ ອົງການອຸຍນີເຊບ ສົກປີ 2022 – 2026 ໃຫ້ສໍາເລັດຕາມເປົ້າໝາຍທີ່ວາງໄວ້, ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ແລະ ປັບປຸງຊີວິດການເປັນຢູ່ຂອງແມ່ ແລະ ເດັກນ້ອຍໃນຂອບເຂດທົ່ວປະເທດໃຫ້ດີຍິ່ງຂຶ້ນ.
ຂ່າວ-ພາບ: ກະຊວງການຕ່າງປະເທດ
ຄໍາເຫັນ