ໃນໂອກາດນີ້, ທ່ານ ນາງ ເຊ້ຍຕົ່ງ ກໍໄດ້ກ່າວສະແດງຄວາມຊົມເຊີຍຕໍ່ການເດີນທາງຢ້ຽມຢາມ ແລະ ເຮັດວຽກ ຢູ່ ສປ ຈີນ ຂອງທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະ ໃນຄັ້ງນີ້, ພ້ອມທັງລາຍງານໃຫ້ຊາບກ່ຽວກັບສະພາບການພັດທະນາທາງດ້ານເສດຖະກິດ-ສັງຄົມ ທີ່ພົ້ນເດັ່ນຂອງນະຄອນຊຽງໄຮ້; ສອງຝ່າຍໄດ້ແລກປ່ຽນຄໍາຄິດຄໍາເຫັນກ່ຽວກັບການພົວພັນຮ່ວມມືລະຫວ່າງນະຄອນຊຽງໄຮ້ ກັບ ສປປ ລາວ ເວົ້າລວມ, ເວົ້າສະເພາະ ລະຫວ່າງ ນະຄອນຊຽງໄຮ້ ກັບນະຄອນຫຼວງວຽງຈັນ ໃນໄລຍະທີ່ຜ່ານມາ; ພ້ອມທັງໄດ້ສະແດງຄວາມຍິນດີສືບຕໍ່ຮ່ວມມືກັບພາກສ່ວນກ່ຽວຂ້ອງ ຂອງ ສປປ ລາວ ລົງເລິກຈັດຕັ້ງປະຕິບັດບັນດາເອກະສານການຮ່ວມມື ທີ່ການນຳຂັ້ນສູງຂອງສອງປະເທດ ໄດ້ລົງນາມຮ່ວມກັນ ໃຫ້ປະກົດຜົນເປັນຈິງ;ສອງຝ່າຍຍິນດີທີ່ຈະສືບຕໍ່ເພີ່ມທະວີການຮ່ວມມືໃນຂົງເຂດວຽກງານເສດຖະກິດ, ການເຊື່ອມໂຍງເຊື່ອມຈອດ, ວັດທະນະທຳ-ສັງຄົມ, ການສຶກສາ ແລະ ການຮ່ວມມືໃນຖານະນະຄອນມິດຕະພາບ.ພິເສດໄດ້ກ່າວເຊື້ອເຊີນການນຳຂັ້ນສູງ ແລະ ບັນດາວິສາຫະກິດ ຂອງສປປ ລາວເຂົ້າຮ່ວມງານວາງສະແດງສິນຄ້ານຳເຂົ້າສາກົນ (China International Import Expo ຫຼືCIIE)ທີ່ນະຄອນຊຽງໄຮ້ ໃນເດືອນພະຈິກ 2025 ທີ່ຈະມາເຖິງນີ້.
ໃນໂອກາດດຽວກັນ, ທ່ານ ຮອງນາຍົກລັດຖະມົນຕີ ກໍໄດ້ສະແດງຄວາມຂອບໃຈຕໍ່ການອໍານວຍຄວາມສະດວກ ແລະ ໃຫ້ການຕ້ອນຮັບອັນອົບອຸ່ນ;ພ້ອມນີ້, ກໍໄດ້ແຈ້ງໃຫ້ຊາບກ່ຽວກັບຈຸດປະສົງຂອງການເດີນທາງຢ້ຽມຢາມ ແລະ ເຮັດວຽກ ຢູ່ ສປ ຈີນ ໃນຄັ້ງນີ້, ພ້ອມທັງ ສະແດງຄວາມຊົມເຊີຍ ຕໍ່ບັນດາຜົນສຳເລັດອັນພົ້ນເດັ່ນ ທີ່ຄະນະພັກ, ອົງການປົກຄອງ ແລະ ປະຊາຊົນນະຄອນຊຽງໄຮ້ ສາມາດຍາດມາໄດ້ ໃນພາລະກິດສ້າງສາພັດທະນາປະເທດຊາດພາຍໃຕ້ການຊີ້ນຳ-ນຳພາຂອງສູນກາງພັກກອມມູນິດຈີນຊຶ່ງໄດ້ເຮັດໃຫ້ເສດຖະກິດຂອງນະຄອນຊຽງໄຮ້ ຂະຫຍາຍຕົວຢ່າງວ່ອງໄວ, ສິ່ງສຳຄັນໄດ້ເຮັດໃຫ້ນະຄອນຊຽງໄຮ້ ກາຍເປັນສູນກາງທາງດ້ານເສດຖະກິດຂອງ ສປ ຈີນ, ສັງຄົມມີຄວາມທັນສະໄໝ ແລະ ກ້າວຂຶ້ນສູ່ການເປັນສູນກາງທາງດ້ານເສດຖະກິດ ແລະ ການເງິນຂອງພາກພື້ນ-ສາກົນ.
ນອກນີ້, ໃນໄລຍະເຄື່ອນໄຫວຢູ່ ນະຄອນເຊີນເຈີນ, ທ່ານຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ຕ້ອນຮັບຂອງທ່ານ ນາງ ຈ່າງ ຮົວຮອງເຈົ້າຄອງນະຄອນເຊີນເຈິນຊຶ່ງສອງຝ່າຍໄດ້ແລກປ່ຽນຄໍາຄິດຄໍາເຫັນ ເພື່ອຊຸກຍູ້ການພົວພັນຮ່ວມມືສອງຝ່າຍໃນຕໍ່ໜ້າ. ໃນໂອກາດນີ້, ຍັງໄດ້ໄປຢ້ຽມຢາມກຸ່ມບໍລິສັດພັດທະນາຕົວເມືອງອັດສະລິຍະ ນະຄອນເຊີນເຈີນ, ພົບປະ ແລະ ຢ້ຽມຢາມບັນດາຫົວໜ່ວຍທຸລະກິດຈຳນວນໜຶ່ງ ເພື່ອຮັບຟັງສະພາບການດຳເນີນທຸລະກິດ ແລະ ໄດ້ໂຄສະນາເຜີຍແຜ່ນະໂຍບາຍສົ່ງເສີມການຄ້າ-ການລົງທຶນຂອງ ສປປ ລາວ, ພ້ອມທັງເຊື້ອເຊີນ ບັນດາຫົວໜ່ວຍທຸລະກິດດັ່ງກ່າວ ເຂົ້າມາລົງທຶນ ຢູ່ ສປປ ລາວ ໃຫ້ນັບມື້ຫຼາຍຂຶ້ນ.
(ຂ່າວ ແລະ ພາບ: ກົມປະຊາສໍາພັນ ຫສນຍ)
ຄໍາເຫັນ