ຮອງນາຍົກລັດຖະມົນຕີ ຕິດຕາມຄວາມເປັນໄປໄດ້ໃນການກໍ່ສ້າງຊົນລະປະທານ ເຊລະມັງ

ຕາມການສຶກສາຄວາມເປັນໄປໄດ້ ແລະ ຜົນການສໍາຫຼວດອອກແບບ ໂຄງການກໍ່ສ້າງຊົນລະປະທານ, ຈະກໍ່ສ້າງຫົວງານ ເປັນເບຕົງເສີມເຫຼັກ, ເປັນອ່າງເກັບນ້ຳ ໃນເນື້ອທີ່ 50 ກວ່າເຮັກຕາ, ເຂື່ອນສູງ 17 ແມັດ, ຄວາມຍາວປະມານ 379 ແມັດ, ສັນເຂື່ອນກວ້າງ 6 ແມັດ, ມີປະຕູລະບາຍນໍ້າລົ້ນ 4 ປ່ອງ, ກວ້າງ 5 ແມັດ, ມີບໍລິມາດນໍ້າເກັບກັກ ໃຊ້ໄດ້ 20 ລ້ານແມັດກ້ອນຕໍ່ປີ ສາມາດຫົດເນື້ອທີ່ໄດ້ 2,500 ເຮັກຕາ. ປະຊາຊົນໃນຈໍານວນ 9 ບ້ານ ຈະໄດ້ຮັບຜົນປະໂຫຍດທາງກົງ, ພົນລະເມືອງ ປະມານ 6 ພັນກວ່າຄົນ. ໂຄງການດັ່ງກ່າວ, ສາມາດຕອບສະໜອງໃຫ້ແກ່ການຜະລິດກະສິກໍາ, ປູກຝັງ-ລ້ຽງສັດ ແລະ ພັດທະນາຊົນນະບົດ ແກ້ໄຂຊີວິດການເປັນຢູ່ຂອງປະຊາຊົນ ບັນດາເຜົ່າ, ຊຶ່ງການຂະຫຍາຍເນື້ອທີ່ທຳການຜະລິດກະສິກໍາ ເປັນເງື່ອນໄຂທີ່ດີ ເພື່ອເຮັດໃຫ້ການຜະລິດຂອງປະຊາຊົນ ຫຼາຍຂຶ້ນ ກ້າວໄປສູ່ການຜະລິດເປັນສິນຄ້າ ແລະ ຫຼຸດຜ່ອນການຖ່າງປ່າເຮັດໄຮ່, ຈັດສັນອາຊີບຄົງທີ່ ໄດ້ຢ່າງໝັ້ນຄົງ.

ເມືອງຕະໂອ້ຍ ແມ່ນໜຶ່ງໃນເມືອງທຸກຍາກ ຂອງແຂວງ ກໍຄືຂອງປະເທດ, ຫ່າງຈາກເທສະບານແຂວງ ປະມານ 75 ກິໂລແມັດ, ມີ 56 ບ້ານ, ປະຊາຊົນ ສ່ວນໃຫຍ່ຍຶດຖືອາຊີບປູກຝັງ-ການລ້ຽງສັດ. ທົ່ວເມືອງ ມີເນື້ອທີ່ປູກເຂົ້ານາປີ ທັງໝົດ 1,459 ເຮັກຕາ, ເນື້ອທີ່ນາແຊງ 230 ເຮັກຕາ, ເນື້ອທີ່ໄຮ່ 350 ເຮັກຕາ ແລະ ເນື້ອທີ່ປູກພຶຶດຕ່າງໆ 7 ພັນກວ່າເຮັກຕາ, ມີບ້ານພັດທະນາ 1 ບ້ານ, ບ້ານພົ້ນທຸກແລ້ວ 11 ບ້ານ ແລະ ບ້ານທຸກຍາກ ມີຈຳນວນ 45 ບ້ານ.

ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ມອບງົບປະມານຈໍານວນໜຶ່ງ ໃຫ້ແກ່ອໍານາດການປົກຄອງ ຈໍານວນ 5 ບ້ານ ຄື: ບ້ານຕະຮວກ, ຕຸງໂກຼງ, ອາດື, ເຕົາຕຸງແຕງ ແລະ ບ້ານປະຈູເຈີນ ຂອງເມືອງຕະໂອ້ຍ ເພື່ອນໍາໃຊ້ເຂົ້າເປັນກອງທຶນພັດທະນາພາຍໃນບ້ານ ຕື່ມອີກ.

(ຂ່າວ-ພາບ: ວິໄລວອນ ສິດທິໄຊ)