ຮອງນາຍົກລັດຖະມົນຕີ ຕ້ອນຮັບແຂກຣັດເຊຍ

ໃນວັນທີ 30 ພະຈິກນີ້ ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບ ທ່ານ ອີເຣັກ ໄຟຊູລິນ (Irek Faizullin) ລັດຖະມົນຕີກະຊວງກໍ່ສ້າງ, ເຄຫາສະຖານ ແລະ ສາທາລະນຸປະໂພກ ແຫ່ງ ສະຫະພັນຣັດເຊຍ, ປະທານຄະນະກຳມາທິການຮ່ວມມື ຣັດເຊຍ-ລາວ, ໃນໂອກາດເດີນທາງມາຢ້ຽມ ຢາມ ແລະ ເຂົ້າຮ່ວມກອງປະຊຸມ ຄັ້ງທີ 17 ຂອງຄະນະກຳມາທິການຮ່ວມມື ດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລາວ-ຣັດເຊຍ ຢູ່ ສປປ ລາວ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ໃນຄັ້ງນີ້ ຂອງ ທ່ານ ອີເຣັກ ໄຟຊູລິນ ແລະ ຄະນະ ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສອງປະເທດ. ໃນຂະນະດຽວກັນ, ທ່ານ ອີເຣັກ ໄຟຊູລິນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ແຈ້ງໃຫ້ຊາບເຖິງຈຸດປະສົງຂອງການຢ້ຽມຢາມ ສປປ ລາວ ໃນຄັ້ງນີ້.
ໃນໂອກາດດຽວກັນນີ້, ສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງສອງປະເທດ, ຊຶ່ງການພົວພັນຮ່ວມມືຂອງສອງປະເທດໃນຖານະເພື່ອນມິດຍຸດທະສາດດ້ານຄວາມໝັ້ນຄົງໃນພາກພື້ນອາຊີ-ປາຊີຟິກ ໄດ້ສືບຕໍ່ຂະຫຍາຍຕົວຢ່າງໜັກແໜ້ນ ແລະ ລົງເລິກ ໃນຫຼາຍຂົງເຂດວຽກງານ.  ພ້ອມກັນນັ້ນ, ສອງຝ່າຍ ກໍໄດ້ແລກປ່ຽນຄໍາຄິດເຫັນ ເພື່ອສືບຕໍ່ເສີມຂະຫຍາຍການພົວພັນຮ່ວມມືໃນດ້ານຕ່າງໆທີ່ມີທ່າແຮງຮ່ວມກັນ ເປັນຕົ້ນ ດ້ານເສດຖະກິດ, ການຄ້າ, ການລົງທຶນ, ການເງິນ, ພະລັງງານ, ການສຶກສາ ແລະ ການທ່ອງທ່ຽວ ຮວມທັງການສືບຕໍ່ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.
ນອກນັ້ນ, ທ່ານ  ສະເຫຼີມໄຊ ກົມມະສິດ ຍັງໄດ້ແຈ້ງໃຫ້ຝ່າຍຣັດເຊຍຊາບເຖິງການກະກຽມຄວາມພ້ອມໃນການເປັນປະທານອາຊຽນ ຂອງ ສປປ ລາວ  ແລະ ເຊື້ອເຊີນນັກທ່ອງທ່ຽວຈາກຣັດເຊຍ ເຂົ້າມາທ່ອງທ່ຽວຢູ່ ສປປ ລາວ ໃນໂອກາດເປີດປີທ່ອງທ່ຽວລາວ ໃນປີ 2024 ນີ້. ທ່ານ ອີເຣັກ ໄຟຊູລິນ ພ້ອມດ້ວຍຄະນະ ກໍໄດ້ຖືໂອກາດນີ້ ນຳເອົາກະຕ່າດອກໄມ້ມາອວຍພອນ ເນື່ອງໃນໂອກາດວັນຊາດ ແຫ່ງ ສປປ ລາວ (2 ທັນວາ ຄົບຮອບ 48 ປີ), ທັງມີຄໍາເຫັນວ່າ ສອງຝ່າຍຈະພ້ອມກັນສືບຕໍ່ຊຸກຍູ້ວຽກງານການທ່ອງທ່ຽວສອງຝ່າຍໃຫ້ມີໝາກຜົນດີ ແລະ ຝ່າຍຣັດເຊຍກໍກຽມຄວາມພ້ອມເຮັດວຽກການຮ່ວມມືດ້ານການກໍ່ສ້າງກັບ ສປປ ລາວ ໃນຕໍ່ໜ້າໃຫ້ດີຂຶ້ນຕື່ມ. 
(ຂ່າວ-ພາບ: ກຕທ)