ໂອກາດນີ້, ທ່ານ ເກົ້າລໍ່ເຈ່ຍກົ້ວ ຄະນະປະຈຳພັກເມືອງ ປະທານແນວລາວສ້າງຊາດ ເມືອງໜອງແຮດ ໄດ້ລາຍງານໂດຍຫຍໍ້ຜົນງານການເຄື່ອນໄຫວວຽກງານແນວລາວສ້າງຊາດ ໃນໄລຍະຜ່ານມາ ເປັນຕົ້ນ: ການກະກຽມ ແລະ ດຳເນີນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ໃຫ້ເປັນຂະບວນຟົດຟື້ນ ໂດຍມີການກະກຽມບັນດາກິດຈະກຳ ການລົງຢ້ຽມຢາມອວຍພອນອະດີດນັກຮົບວິລະຊົນ, ອະດີດການນຳແນວລາວສ້າງຊາດເມືອງ, ກິດຈະກຳແຂ່ງຂັນກິລາເປຕັງ, ເຕະບານ, ບານສົ່ງ, ງົວຊົນງົວ, ການສະແດງສິລະປະ-ວັນນະຄະດີ ແລະ ຈັດຕັ້ງປາຖະກະຖາ ຢູ່ 11 ກຸ່ມບ້ານພາຍໃນເມືອງ; ພ້ອມນີ້, ໄດ້ລາຍງານຜົນສຳເລັດກອງປະຊຸມໃຫຍ່ ຄັ້ງທີ X ແນວລາວສ້າງຊາດ ຂັ້ນເມືອງ ຊຶ່ງກອງປະຊຸມໄດ້ດຳເນີນດ້ວຍບັນຍາກາດທີ່ຟົດຟື້ນ ແລະ ໄດ້ເປັນເອກະສັນຮັບຮອງປະທານແນວລາວສ້າງຊາດ, ຮອງປະທານ 2 ທ່ານ ຍິງ 1 ທ່ານ ແລະ ຄະນະກຳມະການແນວລາວສ້າງຊາດເມືອງ 31 ທ່ານ ຍິງ 1 ທ່ານ.
ພ້ອມນີ້, ທ່ານຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວທີ່ຍາດມາໄດ້ໃນໄລຍະຜ່ານມາ; ພ້ອມທັງໄດ້ເນັ້ນຕື່ມບາງເນື້ອໃນ ວ່າ: ຄະນະກໍາມະການແນວລາວສ້າງຊາດ ສືບຕໍ່ເອົາໃຈໃສ່ໃນການປະກອບສ່ວນ ຍູ້ແຮງຂະບວນການລຶບລ້າງຄວາມທຸກຍາກ ແລະ ສ້າງບ້ານປອດຢາເສບຕິດ ຂອງແນວລາວສ້າງຊາດ ໃຫ້ມີຜົນສຳເລັດ ຕາມຄາດໝາຍ; ໂອກາດລົງເຄື່ອນໄຫວເຮັດວຽກຄັ້ງນີ້, ໄດ້ລົງຕິດຕາມ, ຊຸກຍູ້ໂຄງການກໍ່ສ້າງສາລາໂຮງທຳ ວັດສາມັກຄີໄຊ ຍະຣາມ ທີ່ບ້ານຖ້ຳໄຊ ເມືອງໜອງແຮດ ທີ່ໄດ້ມີພິທີວາງສີລາລືກກໍ່ສ້າງ ໃນວັນທີ 26 ທັນວາ 2024 ຊຶ່ງມາຮອດປັດຈຸບັນແມ່ນສຳເລັດໂດຍພື້ນຖານ ດ້ານໂຄ້ງສ້າງອາຄານ.
(ຂ່າວ-ພາບ: ພຽງ)
ຄໍາເຫັນ